އިންޑިއާގައި އަމިއްލައަށް އުފައްދައިގެން ދުއްވާ ފުރަތަމަ ހައިޑްރޮޖެން ރޭލު، "ނަމޯ ގްރީން ރެއިލް" ރަސްމީކޮށް އިފުތިތާހުކޮށް، އެ ގައުމުގެ ދަތުރުފަތުރުގެ ނިޒާމު ފެހި ހަކަތައަށް ބަދަލުކުރުމުގެ މަސައްކަތަށް ބޮޑު ކުރިއެރުމެއް ހޯދައިފިއެވެ. މިއަދު މި ރޭލު އިފުތިތާހުކޮށްފައިވަނީ އިންޑިއާގެ އުތުރުގައި އޮންނަ ހަރިޔާނާ ސްޓޭޓްގެ ޖިންދުގައެވެ. މިއާއެކު، ޖައްވަށް ވިހަ ގޭސް ބޭރުނުކުރާ ޒީރޯ-އެމިޝަން ޓެކްނޮލޮޖީ ރޭލު ވިއުގައިގައި ބޭނުންކުރާ މަދު ގައުމުތަކުގެ ލިސްޓުގައި އިންޑިއާ ވަނީ ހިމެނިފައެވެ. ޖިންދު ރޭލު ސްޓޭޝަންގައި ބޭއްވި ރަސްމިއްޔާތެއްގައި މި ރޭލުގެ ދަތުރުތައް ފައްޓަވައިދެއްވީ އިންޑިއާގެ ބޮޑުވަޒީރު ނަރެންދުރަ މޯދީއެވެ. މި ރަސްމިއްޔާތުގައި އިންޑިއާގެ ރޭލްވޭ މިނިސްޓަރު އަޝްވިނީ ވައިޝްނޯ އާއި ހަރިޔާނާގެ ޗީފް މިނިސްޓަރު ނަޔަބް ސިންގް ސައިނީ ވެސް ބައިވެރިވެވަޑައިގަތެވެ. ބޮޑުވަޒީރު މޯދީ ވިދާޅުވި ގޮތުގައި، މިއީ އަމިއްލަ ފައިމައްޗަށް ތެދުވުމަށާއި ތިމާވެއްޓާ ރައްޓެހި ގޮތަކަށް ގައުމު ބިނާކުރުމަށް އިންޑިއާއިން ކުރަމުންދާ މަސައްކަތުގައި ވަރަށް ތާރީޚީ ދުވަހެކެވެ. މިއީ ބޯޓުދެލީގެ ބަދަލުގައި ސާފު ހަކަތައަށް ބަދަލުވުމަށް އެޅުނު މުހިންމު ފިޔަވަޅެއް ކަމަށް ރޭލްވޭ މިނިސްޓަރު ވެސް ވަނީ ފާހަގަކުރައްވާފައެވެ. ބޮޑުވަޒީރުގެ ނަންފުޅުގެ އަކުރުތައް ހިމަނައިގެން "ނަމޯ ގްރީން ރެއިލް" ގެ ނަމުން ނަންދީފައިވާ މި ރޭލު ދަތުރުކުރާނީ ހަރިޔާނާގެ ޖިންދު އިން ފެށިގެން ސޯނިޕަޓް އާ ދެމެދު އޮންނަ 89 ކިލޯމީޓަރުގެ ރާސްތާއެއްގައެވެ. ދުވާލަކު ދެ ދަތުރުކުރުމަށް ހަމަޖެހިފައިވާ މި ރޭލަކީ 10 ކޯޗު ހިމެނޭ ގޮތަށް ފަރުމާކޮށްފައިވާ، އެއްފަހަރާ 2,600 ފަސިންޖަރުންނަށް ދަތުރުކުރެވޭނެ ޖާގައިގެ ރޭލެކެވެ. މިއީ މިވަގުތު ދުނިޔޭގައިވެސް އޮތް އެންމެ ޖާގަ ބޮޑު އެއް ހައިޑްރޮޖެން ރޭލެވެ. މި ދަތުރުގައި ޕާންޑޫ ޕިންޑާރާ ޖަންކްޝަން، ލަލިތު ޚޭރާ، ބަމްބޭވާ އަދި ގޯހާނާ ފަދަ ސްޓޭޝަންތަކުގައި ރޭލު މަޑުކުރާނެއެވެ. އިންޑިއާގެ އިންޓެގްރަލް ކޯޗް ފެކްޓަރީން ފަރުމާކޮށް އުފައްދާފައިވާ މި ރޭލު އާންމު ދަތުރުތަކުގައި ދުއްވާނީ ގަޑިއަކު 75 ކިލޯމީޓަރުގެ ބާރުމިނުގައެވެ. ނަމަވެސް މިއީ ގަޑިއަކު 110 ކިލޯމީޓަރަށް ދުއްވޭ ގޮތަށް ފަރުމާކޮށްފައިވާ ރޭލެކެވެ. ޑީސަލް އިންޖީނުތަކާ ޚިލާފަށް، މި ރޭލުގައި ބޭނުންކުރަނީ 1,200 ކިލޯވޮޓްގެ ޕްރޮޓޯން އެކްސްޗޭންޖް މެމްބްރޭން (ޕީއީއެމް) ފިއުލް ސެލް ޓެކްނޮލޮޖީއެވެ. މި ނިޒާމުގެ ތެރެއިން ހައިޑްރޮޖެން އާއި އޮކްސިޖަން ގުޅިގެން ކަރަންޓު އުފައްދާއިރު، ބޭރުވަނީ ހަމައެކަނި އާތްވައި ހޫނެވެ. މި ރޭލަށް ބޭނުންވާ ހައިޑްރޮޖެން ފޯރުކޮށްދިނުމަށްޓަކައި ޖިންދުގައި ވަނީ 3,000 ކިލޯގެ ހައިޑްރޮޖެން ރައްކާކުރެވޭނެ ޚާއްސަ ފެސިލިޓީއެއް ގާއިމުކޮށްފައެވެ. ދުނިޔޭގެ އެންމެ ބޮޑު އެއް ރޭލު ވިއުގަ އޮންނަ އިންޑިއާގެ 70,000 ކިލޯމީޓަރުގެ ރޭލު ނެޓްވޯކްގެ ބޮޑު ބައެއް މިހާރު ވަނީ ކަރަންޓަށް ބަދަލުކޮށްފައެވެ. ނަމަވެސް ކަރަންޓު ކޭބަލް އެޅުމަށް ދަތި ސަރަހައްދުތަކުގައި ހައިޑްރޮޖެން ރޭލުތައް ބޭނުންކުރުމަކީ އިންޑިއާގެ އަމާޒެކެވެ. މި މަޝްރޫއަކީ 2030 ވަނަ އަހަރުގެ ނިޔަލަށް އިންޑިއާގެ ރޭލު ވިއުގަ އަކީ ކާބަން ނެޓް-ޒީރޯ ނިޒާމަކަށް ހެދުމަށް ސަރުކާރުން ކަނޑައަޅާފައިވާ ލަނޑުދަނޑި ހާސިލުކުރުމަށާއި، "ނޭޝަނަލް ގްރީން ހައިޑްރޮޖެން މިޝަން" ގެ ދަށުން އެޅޭ ވަރަށް މުހިންމު ފިޔަވަޅެކެވެ. ހައިޑްރޮޖެން ރޭލުގެ ޓެކްނޮލޮޖީއަކީ މުޅި ދުނިޔޭގައިވެސް އަދި ވަރަށް އާ ޓެކްނޮލޮޖީއެކެވެ. ދެހާސް ބާވީސް ވަނަ އަހަރު ދުނިޔޭގެ ފުރަތަމަ ހައިޑްރޮޖެން ރޭލު ފްލީޓް ތަޢާރަފުކުރީ ޖަރުމަނުވިލާތުންނެވެ. އޭގެ ފަހުން ޖަޕާނާއި، ޗައިނާ އަދި އެމެރިކާ ފަދަ ގައުމުތަކުންވެސް ވަނީ މި ޓެކްނޮލޮޖީ ބޭނުންކުރަން ފަށާފައެވެ. އިންޑިއާއިން މި ލިސްޓާ ގުޅުމަކީ އެ ގައުމުގެ ޓެކްނޮލޮޖީގެ ކުރިއެރުން ދައްކުވައިދޭ ކަމެކެވެ. މޫސުމީ ބަދަލުތަކާ ދެކޮޅަށް ހަރުދަނާ ސިޔާސަތުތަކެއް ތަންފީޒުކުރުމުގައި އިންޑިއާއަށް ގޮންޖެހުންތަކެއް ހުރި ނަމަވެސް، ބޮޑުވަޒީރު މޯދީ ގެންދަވަނީ އިއާދަކުރަނިވި ހަކަތައާއި ނިއުކްލިއާ ހަކަތަ ފުޅާކުރުމަށް ބާރުއަޅުއްވަމުންނެވެ. ނަމޯ ގްރީން ރެއިލްގެ ދަތުރުތައް ފެށުމާއެކު، ކުރިއަށް އޮތް ތަނުގައި ކާލްކާ-ޝިމްލާ ފަދަ އިންޑިއާގެ ތާރީޚީ ރޭލު ރޫޓުތަކުގައިވެސް މިފަދަ ހައިޑްރޮޖެން ރޭލުތައް ބޭނުންކުރުމަށް އިންޑިއަން ރޭލްވޭސް އިން ވަނީ ނިންމާފައެވެ.