ވޯލްޑް ކަޕް ކާމިޔާބުކުރުމަށް މަދުވަނީ "ޖިގްސޯގެ ފަހު އެތިކޮޅު": ކޭން
2026 ވަނަ އަހަރުގެ ވޯލްޑް ކަޕްގެ ސެމީ ފައިނަލުގައި އާޖެންޓީނާ އަތުން ބަލިވުމާ ގުޅިގެން، އިންގްލެންޑް ޓީމަށް އަދިވެސް މަދުވަނީ "ޖިގްސޯ ޕަޒްލްގެ އެންމެ ފަހު އެތިކޮޅު" ކަމަށާއި، މިއަށްވުރެ ރަނގަޅުވާނެ ގޮތްތަކެއް ހޯދަންޖެހޭ ކަމަށް އެ ޓީމުގެ ކެޕްޓަން ހެރީ ކޭން ބުނެފި އެވެ.
އެޓްލާންޓާގައި ކުޅުނު މި މެޗުގައި "ތުރީ ލަޔަންސް" އިން ފުރަތަމަ ލީޑު ނެގި ނަމަވެސް، 2-1 އިން އެ ޓީމު ވަނީ ބަލިވެފަ އެވެ. ލީޑު ލިބުމާއެކު ޓީމު މާ ބޮޑަށް ބެކްވޯޑަށް ޖެހި، ޑިފެންސިވް ގޭމެއް ކުޅުމުން ކޯޗު ތޯމަސް ޓުޗެލް އަށާއި ޓީމަށް ބޮޑެތި ފާޑުކިޔުންތަކެއް ވަނީ އަމާޒުވެފަ އެވެ.
"މިވަގުތު ހިތަށް ލިބިފައިވާ ހުސްކަން ބަޔާންކޮށްދޭނެ އެއްވެސް ބަހެއް ނެތް،" މުބާރާތާ މެދު ހިޔާލު ފާޅުކުރުމަށް އިންގްލެންޑްގެ ގިނަ ކުޅުންތެރިންތަކެއް ސޯޝަލް މީޑިއާ ބޭނުންކުރަމުންދާއިރު، ކޭން ލިޔެފައިވެ އެވެ.
"އަހަރެމެން ތިބީ ފައިނަލަކާ ވަރަށް، ވަރަށް ގާތުގައި. އެކަމަކު އެވަރުން ފުދޭގޮތެއް ނުވި. ވޭތުވެދިޔަ ހަތް ހަފްތާގައި އަހަރެމެން ހުރިހާ އެއްޗެއް ޤުރުބާންކުރިން. އެހެންކަމުން މިގޮތަށް ބަލިވުން ބަލައިގަންނަން އުނދަގޫ."
"އަހަރެންނަށް އެނގޭ އުންމީދުތައް ހުރީ ވަރަށް މަތީގައިކަން، އަދި އެއީ ޙައްޤު މިންވަރެއް. ވޭތުވެދިޔަ އަށް އަހަރު އަހަރެމެން މިދަނީ ކާމިޔާބީގެ ދޮރުގައި ޓަކިޖަހަމުން. އެކަމަކު އަދިވެސް އެ ފަހު އެތިކޮޅު އެބަ މަދުވޭ! އެހެންވީމާ އަހަރެމެން މިކަމުން ދުރުވެ، ވިސްނާ، މިއަށްވުރެ ރަނގަޅުވާނެ ގޮތްތައް ހޯދަންޖެހޭ."
އާޖެންޓީނާއާ ދެކޮޅަށް ކުޅުނު މެޗުގެ 55 ވަނަ މިނެޓުގައި އެންތަނީ ގޯޑަން ޖެހި ލަނޑުން އިންގްލެންޑަށް ލީޑު ލިބުނެވެ. ނަމަވެސް އޭގެ ފަހުން އިންގްލެންޑުން ފަހަތަށް ޖެހުމުގެ ފުރުސަތު ބޭނުން ހިފައި، އާޖެންޓީނާގެ އެންޒޯ ފެނާންޑޭޒް އަދި ލައުޓާރޯ މާޓިނޭޒް ފަހުވަގުތު ޖެހި ދެ ލަނޑާއެކު މެޗު ކާމިޔާބުކުރީ އެވެ.
މެޗަށްފަހު، އިންގްލެންޑްގެ ކުރީގެ ކެޕްޓަން ވޭން ރޫނީ ބުނީ، 1966 ގެ ފަހުން ފުރަތަމަ ފަހަރަށް ވޯލްޑް ކަޕް ފައިނަލަށް ދިއުމަށް ލިބުނު ފުރުސަތު ގެއްލުނުއިރު، ޓުޗެލްގެ ޓީމު "ރޫޅި"، މާ ބޮޑަށް "ޕެސިވް" (ހަރަކާތްތެރިކަން ކުޑަ) ވީ ކަމަށެވެ.
ޓުޗެލް ގެނައި ޑިފެންސިވް ބަދަލުތަކަށް ވެސް ފާޑުކިޔުން އަމާޒުވެފައިވެ އެވެ. ތަފާސްހިސާބުތަކަށް ބަލާއިރު، އިންގްލެންޑުން ލީޑު ނެގި ފަހުން، މެޗުގެ 92 ވަނަ މިނެޓުގައި ދެވަނަ ލަނޑު ވަނުމާ ހަމައަށް އެ ޓީމަށް ބޯޅަ ހިފެހެއްޓުނީ އެންމެ 12 އިންސައްތަ ވަގުތުގަ އެވެ.
ބީބީސީ ސްޕޯޓްސްއިން ރިޕޯޓްކޮށްފައިވާ ގޮތުގައި، މެޗުގެ ފަހު ދަނޑިވަޅުތަކުގައި ޓީމުން ކުޅުނު ވިސްނުމާމެދު ބައެއް މުހިންމު ކުޅުންތެރިން ތިބީ ވަރަށް ބޮޑަށް މާޔޫސްވެފަ އެވެ. ނަމަވެސް ޓުޗެލް ބުނީ ފަހަތަށް ޖެހުމަކީ ދުވަހަކުވެސް ރޭވި ގޮތެއް ނޫން ކަމަށާއި، ބޯޅަ ހިފަހައްޓައިގެން މެޗު ކޮންޓްރޯލް ކުރުމަކީ "އަހަރެމެންގެ ޑީއެންއޭ ގައި ނެތް ކަމަކަށް ވެދާނެ" ކަމަށެވެ.
އިންގްލެންޑްގެ ހެޑް ކޯޗު ތޯމަސް ޓުޝެލް--- ފޮޓޯ: މެޓް އިމްޕޭ/ޝަޓާސްޓޮކް
އެއްބައިވަންތަކަމަށް ބެލިންގްހަމް ގޮވާލައިފި
މުހިންމު މެޗުތަކުގައި އިންގްލެންޑުން މާ ބޮޑަށް ޑިފެންސިވްކޮށް ކުޅޭ ކަމަށް ތުހުމަތު ކުރެވުނު މިއީ ފުރަތަމަ ފަހަރެއް ނޫނެވެ. ކުރީގެ ކޯޗު ގަރެތު ސައުތުގޭޓްގެ އިރުޝާދުގެ ދަށުން ޔޫރޯ 2021 ގެ ފައިނަލުގައި އިޓަލީއާ ދެކޮޅަށް 1-0 އިން ލީޑު ނަގާފައިވަނިކޮށް، ބައިކޮޅަށް ލަނޑެއް ވަދެ، އެންމެ ފަހުން ޕެނަލްޓީގައި ބަލިވީ ވެސް މިފަދަ ހާލަތެއްގަ އެވެ.
މީގެ އިތުރުން ސައުތުގޭޓްގެ ދަށުން 2018 ގެ ވޯލްޑް ކަޕް ސެމީ ފައިނަލުން ކްރޮއޭޝިއާ އަތުން އަދި ޔޫރޯ 2024 ގެ ފައިނަލުން ސްޕެއިން އަތުން ވެސް އިންގްލެންޑް ބަލިވި އެވެ. އޮޕްޓާ (Opta) ގެ ތަފާސްހިސާބުތައް ދައްކާގޮތުން، 1998 ވަނަ އަހަރުގެ ފަހުން ވޯލްޑް ކަޕްގެ ނޮކައުޓް ބުރުގައި ދުނިޔޭގެ ގަދަ 10 އެއްގެ ޓީމަކާ ވާދަކުރަން ޖެހިއްޖެ ނަމަ ކޮންމެ ފަހަރަކު ވެސް އިންގްލެންޑް ވަނީ މުބާރާތުން ކަޓާފަ އެވެ.
"ކާމިޔާބީއަށް އުންމީދު ކުރުމަކީ ކޮންމެ ފަހަރަކު އެކަން ވާނެ ކަމެއް ނޫން،" މުބާރާތުގައި 6 ލަނޑު ޖަހާފައިވާ ބަޔާން މިއުނިކްގެ ފޯވާޑް ކޭން އިތުރަށް ބުންޏެވެ. "އެކަމަށްޓަކައި ހަނގުރާމަކުރަންޖެހޭ، ވެއްޓުމުން އަލުން ތެދުވެ ކުރިއަށްދާންޖެހޭ. އަހަރެމެން ކުރާނެ ކަމަކީ އެއީ. އިތުބާރުކޮށް، ކުރިއަށް ދިއުން ނޫން އެހެން ގޮތެއް ނެތް."
މި މުބާރާތް އިންގްލެންޑުން ފެށީ ފުރަތަމަ ހާފު 2-2 އިން އެއްވަރުވެފައި އޮއްވައި، ފަހުން ކްރޮއޭޝިއާ 4-2 އިން ބަލިކޮށްގެންނެވެ. އެ މެޗަށްފަހު ކޭން ބުނީ، ދެވަނަ ހާފުގައި ޓީމުގެ ކުޅުން ރަނގަޅުވީ، ހާފް-ޓައިމްގައި ޓުޗެލް "ބަލިވިޔަސް ބަލިވާނީ އަހަރެމެންގެ އަމިއްލަ ސްޓައިލްގައި" ކަމަށް ބުނެ ހިތްވަރު ދިނުމުން ކަމަށެވެ.
އޭގެ ފަހުން ގާނާއާ 0-0 އިން އެއްވަރުވެ، ޕެނަމާ 2-0 އިން ބަލިކޮށް އިންގްލެންޑުން ގްރޫޕުގެ އެއްވަނަ ހޯދިއެވެ. އަދި ގަދަ 32 ގެ ބުރުގައި ޑީއާރު ކޮންގޯ އަތުން 1-0 އިން ބަލިވާން އޮއްވައި ފަހަތުން އަރައި 2-1 އިން މެޗު ކާމިޔާބުކުރިއެވެ. ގަދަ 16 ގައި މެކްސިކޯއާ ދެކޮޅަށް ކުޅުނު މެޗުގައި އިންގްލެންޑްގެ ކުޅުންތެރިއަކަށް ރަތް ކާޑު ދެއްކި ނަމަވެސް، 3-2 އިން މެޗު ކާމިޔާބުކުރި އެވެ. އަދި ކުއާޓާ ފައިނަލުގައި ނޯވޭ އަތުން މޮޅުވީ އިތުރު ވަގުތު ކުޅެގެން 2-1 އިންނެވެ.
"ތުރީ ލަޔަންސް" ދެން ވާދަކުރަން ޖެހޭނީ ހޮނިހިރު ދުވަހު (ރާއްޖޭގަޑިން ދަންވަރު 2:00 ގައި) ފްރާންސާ ދެކޮޅަށް ކުޅޭ ތިންވަނަ ހޮވާ މެޗުގަ އެވެ. ފްރާންސް ސެމީން ކެޓީ ސްޕެއިން އަތުންނެވެ.
އިންގްލެންޑްގެ އެޓޭކިންގ މިޑްފީލްޑަރު ޖޫޑް ބެލިންގްހަމް ވެސް ވަނީ ކޭންއެކޭ އެއްގޮތަށް މި މުބާރާތުގައި 6 ލަނޑު ޖަހާފަ އެވެ. އޭނާ ބުނީ ޓީމު ކެޓުމުން "ބުނާނެ ރަނގަޅު ބަހެއް ހޯދަން ވަރަށް އުނދަގޫވި" ކަމަށެވެ. ނަމަވެސް ޓީމުގެ ޑްރައިވަރު މައިކަލް ޗެންޑްލާ ލިޔެފައިވާ 'ދަ ލަޔަންސް ވޭ' ކިޔާ ހަތަރު ސަފުހާގެ ޅެމެއް އޭނާ ހިއްސާކުރި އެވެ. ބެލިންގްހަމް ބުނިގޮތުގައި އެ ޅެމުން ހުރިހާ ވާހަކައެއް ވަރަށް ފުރިހަމައަށް ސިފަކޮށްދެ އެވެ.
އެންތަނީ ގޯޑަން އާޖެންޓީނާ ކޮޅަށް ލަނޑުޖެހުމަށްފަހު އުފާފާޅުކުރަނީ--- ފޮޓޯ: ގެޓީ އިމޭޖަސް
އެ ޅެން ނިމެނީ "ވަރުގަދަ އަދި ޔަގީންކަން ލިބިގެންވާ ފުރާނައެއް" މި ބަހުންނެވެ. ބެލިންގްހަމް ވެސް ވަނީ ބަލިވުމަށްފަހު ޤައުމީ އެއްބައިވަންތަކަމަށް ގޮވާލާފަ އެވެ.
"މި މުބާރާތާއެކު އަހަރެމެންގެ ޤައުމުން ފެނުނު އެއްބައިވަންތަކަމާއި ލޯބި ނިމުނަ ނުދީ. އަހަރެމެން އެކުގައި ތިބެގެން ބޮޑެތި ކާމިޔާބީތައް ހޯދޭނެ،" ރެއާލް މެޑްރިޑްގެ ކުޅުންތެރިޔާ ބުންޏެވެ.
އެސްޓަން ވިލާގެ މިޑްފީލްޑަރު މޯގަން ރޮޖާސް، އާޖެންޓީނާ މެޗުގައި ގޯޑަންއަށް ލަނޑު ޖަހަން ފުރުސަތު ތަނަވަސްކޮށްދިނުމަށްފަހު ބުނީ މި ނަތީޖާއިން އޭނާ "ރޫޅިއްޖެ" ކަމަށެވެ. "މިހާ ހިސާބަށް އައުމަށް އަހަރެމެން ވަރަށް މަސައްކަތް ކުރިން، އެހެންވެ މިގޮތަށް ނިމުމުން ވަރަށް ދެރަވޭ،" އޭނާ ބުންޏެވެ.
ބާސެލޯނާއަށް ބަދަލުވެފައިވާ އެންތަނީ ގޯޑަން އިތުރަށް ބުނީ، "މިއީ ގިނަ އަހަރުތަކަކަށްފަހު އަހަރެމެންނަށް މުބާރާތް ކާމިޔާބު ކުރެވޭނެ ފަހަރު ކަމަށް ހިތުގެ އަޑިން ގަބޫލުކުރެވުނު، އެކަމަކު އެގޮތެއް ނުވި. މީގެ ދެރަ އަދި ވަރަށް ދުވަހު ހުންނާނެ،" ކަމަށެވެ.
ޔޫރޯ 2028 އަށް ޓީމު ކޮޅަށް ޖެހުމަށް އެފްއޭ އިން ޓުޗެލްއަށް އިތުބާރުކުރަނީ
މި ދަނޑިވަޅުގައި، އިނގިރޭސި ފުޓްބޯޅަ އެސޯސިއޭޝަން (FA) ގެ ޗީފް އެގްޒެކެޓިވް ވަނީ، އާޖެންޓީނާ އަތުން ވީ ބަލިން "ފިލާވަޅު ލިބިގަނެ"، 2028 ވަނަ އަހަރު އަމިއްލަ ޤައުމުގައި ބާއްވާ ޔޫރަޕްގެ މުބާރާތުގައި ތަށި ހޯދުމަށް އިންގްލެންޑުން މަސައްކަތް ކުރާނެ ކަމަށް ބުނެފައެވެ.
މާކް ބުލިންގްހަމް ބުނީ، އެޓްލާންޓާގައި ވޯލްޑް ކަޕުން ކެޓުމަށްފަހު، ކޯޗު ޓުޗެލް ޓީމުގެ އެންމެންގެ ހިތްވަރު އަލުން "އާލާކޮށްދޭނެ" ކަމަށް އުންމީދުކުރާ ކަމަށެވެ. ޖެހިގެން އަންނަ ޔޫރޯ މުބާރާތް ބާއްވާ ހަތަރު ޤައުމުގެ ތެރޭގައި އިންގްލެންޑް ހިމެނެ އެވެ (ވޭލްސް، ސްކޮޓްލޭންޑް އަދި ރިޕަބްލިކް އޮފް އަޔަރލޭންޑާއެކު). 2021 އަދި 2024 ގެ ޔޫރޯ ފައިނަލުން ބަލިވި އިންގްލެންޑުން އުންމީދު ކުރަނީ މިފަހަރު ތަށި ހޯދުމަށެވެ.
"ތޯމަސް އާއި ކޯޗުން އެންމެންގެ ހިތްވަރު އާލާކޮށް، 2028 ގެ ޔޫރޯ ކޮލިފިކޭޝަނަށް އަހަރެމެން ގޮވައިގެން ނުކުންނާނެ،" ބުލިންގްހަމް ބުންޏެވެ. "މިއީ އަހަރެމެންގެ ފިރިހެން ޓީމަށް ތައްޓަކަށް ވާދަކުރަން ލިބޭނެ އިތުރު ރަން ފުރުސަތެއް. މި މުބާރާތުން ދަސްވި ކަންތައްތަކާއެކު، ސަޕޯޓަރުންގެ އެހީތެރިކަމާއެކު އަހަރެމެން ކުރިއަށްދާނަން."