މި ސަރުކާރުގެ ތިންވަނަ ޕޮލިސް ކޮމިޝަނަރު ކަމަށް ކުރިމަތިލާން ފުލުހުން ހުޅުވައިލި މުއްދަތުގައި އެއްވެސް މީހަކު އެ މަގާމަށް ކުރިމަތިނުލުމުން ދޭހަވަނީ ސިޔާސީ ލީޑަޝިޕަށް އިތުބާރު ނެތްކަން ކަމަށް ކުރީގެ ހޯމް މިނިސްޓަރު އުމަރު ނަސީރު މިއަދު ވިދާޅުވެއްޖެއެވެ. އުމަރު އެފަދައިން ވިދާޅުވެފައި ވަނީ ހުސްވެފައިވާ ޕޮލިސް ކޮމިޝަނަރު ކަމަށް ކުރިމަތިލާން ހުޅުވައިލު މުއްދަތުގައި، އެ މަގާމަށް އެއްވެސް ބޭފުޅަކު ކުރިމަތިލާފައި ނުވާ މި ދަނޑިވަޅުގައެވެ. ބައެއް ނޫސްތަކުން ރިޕޯޓުކޮށްފައިވާ ގޮތުގައި އިއްޔެގެ ނިޔަލަށް އެ މުއްދަތު ހަމަވިއިރު ވެސް އެއްވެސް ބޭފުޅަކު ކުރިމަތިލާފައެއް ނެތެވެ. އަދި މިހާރު އެ މަގާމަށް ކުރިމަތިލުމުގެ މުއްދަތު ވެސް ވަނީ އިތުރުކޮށްފައެވެ. އެކަމާ ގުޅިގެން އުމަރު ވިދާޅުވި ގޮތުގައި ފުލުހުންގެ އެންމެ މަތީ މަގާމަށް ކުރިމަތިލާނެ ބޭފުޅަކު ނުވުމުން، އެކަމުން ދައްކައިދެނީ ގައުމުގެ ސިޔާސީ ލީޑަޝިޕަށް އެއްވެސް އިތުބާރެއް ނެތް ކަމެވެ. އަދި 'ޑުރަގް ޑީލަރުން' ރައްޔިތުންގެ މަޖިލީހަށް އިންތިޚާބުވެ، 'ވަގުން' ވެރިކަމުގެ ކޮއިލު ތެރެއަށް ވަނުމުން، ފުލުހުންނަށް އޮތީ ވަގުންނަށް ސެލިއުޓް ކުރުން ކަމަށް އުމަރު ތުހުމަތުކުރެއްވިއެވެ. އަދި އެއީ ފުލުހުންގެ އިސް ސަފުން، ސިޔާސީ ވެރިންނަށް ދިން މެސެޖެއް ކަމަށާއި، އެއީ އިތުބާރު ނެތްކަން ވެސް އަންގައިދިން މެސެޖެއް ކަމަށް އުމަރު ވިދާޅުވިއެވެ. ފާހަގަކޮށްލެވޭ ގޮތުގައި ސީޕީގެ މަގާމަށް ބޭފުޅަކު ހޯދަން އިއުލާނުކުރީ، މިދިޔަ މަހުގެ 18އިން ފެށިގެން އެ މަގާމުގައި ހުންނެވި އިސްމާއިލް ނަވީން ފުލުހުންގެ ވަޒީފާއިން ޝަރަފުވެރިކަމާއެކު، ރިޓަޔާކުރެއްވުމުންނެވެ. https://sun.mv/218757 އެހެންވެ، ފުލުހުންގެ އިދާރާގެ ހިންގުން ވަގުތީ ގޮތުން ޑެޕިއުޓީ ކޮމިޝަނާ އޮފް ޕޮލިސް ފަރުހާދު ފިކުރީއާ ހަވާލުކުރެއްވީ، އެ މަހުގެ 19ގައެވެ. މިދިޔަ ޖޫން މަހުގެ 10 ވަނަ ދުވަހު ނަވީން ސީޕީކަމާ ހަވާލުވެވަޑައިގެންނެވީ ކުރިން އެ މަގާމުގައި ހުންނެވި އަލީ ޝުޖާއު ކުއްލި ގޮތަކަށް، މިދިޔަ އަހަރުގެ އޭޕްރީލް 26ގައި އިސްތިއުފާ ދެއްވުމުންނެވެ. ޝުޖާއު ވެސް ވަނީ ރިޓަޔާ ކުރައްވައިފައެވެ. ސީޕީ ކަމުގެ މަގާމަށް ނަވީންގެ އިތުރުން ފަރުހާދާއި ސައުތު ޕޮލިސް ކޮމާންޑަރު އެސިސްޓެންޓް ކޮމިޝަނަރު އަހްމަދު ޝަމީމް ވެސް އޭރު ކުރިމަތިލެއްވިއެވެ. މި ސަރުކާރުން އެންމެ ފުރަތަމަ ޕޮލިސް ކޮމިޝަނަރަކަށް ފުރުސަތު ހުޅުވާލުމުން އެ މަގާމަށް ވާދަ ކުރެއްވީ ވެސް ޝުޖާއުއާއި ނަވީންއެވެ.