އިންޑިއާ ކަނޑުގައި ދަތުރުކުރަމުންދިޔަ އީރާނުގެ ހަނގުރާމަމަތީ މަނަވަރަކަށް އެމެރިކާގެ ސަބްމެރިންއަކުން އިއްޔެ ދިން ހަމަލާއަކުން ސަލާމަތްވި ފަޅުވެރިންނަށް ސްރީ ލަންކާގެ ގޯލް ސިޓީގެ ހޮސްޕިޓަލެއްގައި ފަރުވާދެމުންދާ ކަމަށް އެ ގައުމުގެ ކަމާބެހޭ ފަރާތްތަކުން މިއަދު ބުނެފި އެވެ.
މި ހާދިސާގައި މަރުވި މީހުންގެ އަދަދު މިހާރު ވަނީ ވަރަށް ބޮޑަށް އިތުރުވެފަ އެވެ.
ގޯލްގެ ނޭޝަނަލް ހޮސްޕިޓަލުގެ އޮފިޝަލުން ވިދާޅުވި ގޮތުގައި، އިއްޔެ އެހީއަށް އެދި ގޮވުމަށް ފަހު އަޑިއަށްދިޔަ އީރާނުގެ ފްރިގޭޓް އައިއާރުއައިއެސް ދަނާ އިން މަރުވި 87 މީހެއްގެ ހަށިގަނޑު މިހާތަނަށް ވަނީ އެއްގަމަށް ގެނެސްފަ އެވެ.
ގެއްލިފައިވާ ކަމަށް ބެލެވޭ 60 ފަޅުވެރިން ހޯދުމުގެ މަސައްކަތް އަދިވެސް ކުރިއަށްދާއިރު، ސަލާމަތްވި 32 ފަޅުވެރިންނަށް ލިބިފައިވާ ކުދި އަނިޔާތަކަށް ފަރުވާ ދިނުމަށް ފަހު، ވަރަށް އަވަހަށް ހޮސްޕިޓަލުން ދޫކޮށްލާނެ ކަމަށްވެ އެވެ.
އެމެރިކާގެ ޑިފެންސް ސެކްރެޓަރީ ޕީޓް ހެގްސެތު ވަނީ މި ހަމަލާ ދީފައިވަނީ އެމެރިކާގެ ސަބްމެރިންއަކުން ކަމަށް ކަށަވަރުކޮށްދެއްވާފަ އެވެ. އޭނާ ވިދާޅުވީ، ބައިނަލްއަގުވާމީ ކަނޑުގެ ސަރަހައްދުގައި ރައްކާތެރިކަމާ އެކު އޮތް ކަމަށް އީރާނުން ހީކުރި ހަނގުރާމަމަތީ މަނަވަރު، އެމެރިކާގެ ސަބްމެރިންއަކުން ފޮނުވާލި ޓޯޕިޑޯ ހަމަލާއެއްގައި ފައްތާލާފައިވާ ކަމަށެވެ.
މި ހަމަލާ ދީފައިވަނީ ގަލްފް ސަރަހައްދާ އެތައް ސަތޭކަ މޭލެއް ދުރުންނެވެ. އެމެރިކާ އާއި އިޒްރޭލުގެ ސިފައިން މިހާރު ވެސް އީރާނާ ދެކޮޅަށް އަސްކަރީ ހަރަކާތްތައް ހިންގަމުންދާ ދަނޑިވަޅެއްގައި، އިންޑިއާ ކަނޑުގައި މިފަދަ ހަމަލާއެއް ދިނުމަކީ މި ހަމަނުޖެހުން މުޅި ސަރަހައްދަށް ފެތުރިގެން ހިނގައިދާނެ ކަމުގެ ބިރު ބޮޑުވެގެންދިޔަ ކަމެކެވެ.