ރާއްޖޭގައި ވަރަށް އަވަހަށް ޕޭޕަލްގެ ހިދުމަތް ފަށާނެ ކަމަށާއި މިހާރު ކުރިއަށްދަނީ ލޯންޗުކުރުމުގެ ކުރިން ކުރިއަށް ގެންދަންޖެހޭ ޓެސްޓިން މަރުހަލާތައް ކަމަށް އިކޮނޮމިކް މިނިސްޓަރު މުހައްމަދު ސައީދު މިއަދު ވިދާޅުވެއްޖެ އެވެ.ރާއްޖެއަށް ޕޭޕަލް ގެނައުމަށް އެ ކުންފުންޏަށް ޕްރޮޕޯސަލް ހުށަހަޅާފައިވާ ކަމަށް އިކޮނޮމިކް މިނިސްޓަރު މުހައްމަދު ސައީދު 2024ގެ އޮގަސްޓުގައި ވަނީ ވިދާޅުވެފަ އެވެ.މިދިޔަ ޖޫންގައި އެމްއެމްއޭ އިން ބުނެފައިވާ ގޮތުގައި ޕޭޕަލް ހިދުމަތަށް ރާއްޖޭގައި އެކަށީގެންވާ ޑިމާންޑެއް އޮތް ކަމަށް އާންމުންގެ ހިޔާލުތަކުން ދޭހަވާތީ ޕޭޕަލްގެ ސަރަހައްދީ އޮފީހާ އެކު 2020 ވަނަ އަހަރުން ފެށިގެން 2021 ވަނަ އަހަރާ ހަމައަށް މަޝްވަރާ ކުރި އެވެ.އެކަމަކު އެ ހިދުމަތް ރާއްޖޭގައި ނުފެށި އޮތީ އެ ކަމަށް ގާނޫނީ ހުރަސްތަކެއް ހުރުމަށް ވުރެ ބޮޑަށް އެ ކުންފުނީގެ އިސްތިރާޖީ ނުވަަތަ ވިޔަފާރީގެ ނިންމުމަކާ ގުޅިގެން ކަމަށް އޭރު ބުނެފައިވެ އެވެ.އޭގެ ފަހުން މިދިޔަ އަހަރުގެ އޮކްޓޫބަރުގައި ރާއްޖޭގައި ޕޭޕަލްގެ ހިދުމަތް ފެށުމުގެ އިންތިޒާމުތައް ހަމަޖެހިފައިވާކަން ވަނީ އިއުލާންކޮށްފަ އެވެ. އެއީ އުރީދޫ ފިންޓެކް އާއި ޕޭޕަލް ގުޅިގެންނެވެ.ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު ވިދާޅުވީ، ޕޭޕަލްއަކީ ރައީސްގެ ވައުދުފުޅެއް ކަމަށާއި ރައީސްގެ މެނިފެސްޓޯގައި ވެސް ހިމެނޭ ކަމެއް ކަމަށާއި އެހެންކަމުން އެ މަސައްކަތް ވަރަށް ބާރު ސްޕީޑުގައި ކުރިއަށްދާ ކަމަށެވެ."ދާދި އަވަހަށް އިރާދަކުރެއްވިއްޔާ ޕޭޕަލްގެ ހިދުމަތް ލިބޭނެ،" ސައީދު ވިދާޅުވިއެވެ.މިނިސްޓަރު ވިދާޅުވީ، ޕޭޕަލް ހިދުމަތް ފަށަން ނިންމާފައިވާ ގޮތުގެ ޓައިމްލައިނެއް ވެސް ވަރަށް އަވަހަށް ހިއްސާކުރައްވާނެ ކަމަށާއި އެކަން ކުރަން ލަސްވަނީ، ޕޭޕަލް ރާއްޖެއަށް ތައާރަފް ކުރުމުގެ ޓެސްޓިން މަރުހަލާތައް ކުރިއަށްދާތީ ކަމަށެވެ.