ބައިނަލްއަގުވާމީ ފައިސާގެ މުއާމަލާތްތައް ކުރުން ފަސޭހަކޮށްދޭ ޕޭޕަލްގެ ޚިދުމަތް ވަރަށް އަވަހަށް ރާއްޖެއަށް ލިބޭނެ ކަމަށާއި، ޓެސްޓިން މަރުހަލާތަކެއް ކުރިއަށްދާ ކަމަށް އިކޮނިމިކް މިނިސްޓަރު މުޙައްމަދު ސައީދު މިއަދު ވިދާޅުވެއްޖެއެވެ. ޕޭޕަލް ފަދަ ޒަމާނީ ޕޭމެންޓް ޚިދުމަތްތައް ތައާރަފު ކުރުމަކީ ރައީސް ޑރ. މުހައްމަދު މުއިއްޒުގެ ވައުދުފުޅެކެވެ. އެ ވައުދުފުޅުގެ ދަށުން، ރާއްޖޭގައި ޕޭޕަލްގެ ޚިދުމަތް ފެށުމުގެ އިންތިޒާމުތައް ހަމަޖެހިފައިވާ ކަމަށް މިދިޔަ އޮކްޓޫބަރު މަހުގެ 14 ވަނަ ދުވަހު އިކޮނޮމިކް މިނިސްޓްރީން އިއުލާންކުރިއެވެ. ރާއްޖެއަށް ޕޭޕަލް ތައާރަފުކުރުމަށް ހަމަޖެހިފައިވަނީ އުރީދޫއާއެކު ހަދާ ޕާޓްނާޝިޕެއްގެ ދަށުންނެވެ. މިދިޔަ އަހަރު އެ ކުންފުނިން ވަނީ، މި އަހަރު ތެރޭ ޕޭޕަލްގެ ޚިދުމަތް ތައާރަފު ކުރެވޭނެ ކަމަށް ބުނެފައެވެ. މިއަދު ބޭއްވި ނޫސްވެރީންގެ ބައްދަލުވުމުގައި އެ މަސައްކަތްތަކަށް އިޝާރާތް ކުރައްވައި ސައީދު ވިދާޅުވީ، ޕޭޕަލް ތައާރަފު ކުރުމުގެ މަސައްކަތް މިވަގުތު ވަރަށް ބާރަަށް ކުރިއަށް ދާކަމަށާއި ދާދި އަވަހަށް ޚިދުމަތް ދެވޭނެ ކަމަށެވެ. ނަމަވެސް އެކަމަށް ވަކި ތާރީޚުތަކެއް ދިނުމަށް ދަތިވަނީ ޕޭޕަލްގެ ޚިދުމަތް ދިނުމުގައި ޓެސްޓިން މަރުހަލާތަކެއް ކުރިއަށްދާތީ ކަމަށް އޭނާ ވިދާޅުވިއެވެ. މީގައި އެބަހުރޭ ރެގިއުލޭޓަރީ ބައެއް ކަހަލަ [ކަންކަން]، ޕޭޕަލްއަކީ ދުނިޔޭގެ ވަރަށް ޕްރެސްޓީޖަސް ޕޭމެންޓް ގޭޓްވޭއެއް، ޕޭމެންޓް ސިސްޓަމެއް. އެހެންވީމަ ރާއްޖޭގެ ޕޭމެންޓުގެ ނިޒާމު ޕޭޕަލް ބޭނުންވާ ވަރަށް ޑިވެލޮޕްވާންޖެހޭ. ނުވަތަ އެ މީހުންގެ އޮޑިޓްގެ ތެރޭގައި ބަލައިގަންނަ ފެންވަރަށް ރާއްޖޭގެ ނިޒާމު ޔަގީންކުރަން އެ މީހުންވެސް ބޭނުންވާނެ. އިކޮނޮމިކް މިނިސްޓަރު މުޙައްމަދު ސައީދު މިނިސްޓަރު ވަނީ، ޕޭޕަލްގެ ސަބަބުން އޮންލައިން ވިޔަފާރިތަކަށް ވެސް ކުރިއެރުންތަކެއް އަންނާނެ ކަމަށް ވިދާޅުވެފައެވެ. އެގޮތުން އެ ޚިދުމަތް ތައާރަފު ކުރުމުން، އެންމެ ކުރިއަރައިފައިވާ ގައުމުތަކުގައި ވެސް ޕޭޕަލް ބޭނުންކުރާ އުސޫލުން ރާއްޖޭގައި ބޭނުންކުރެވޭނެ ކަމަށް އޭނާ ވިދާޅުވިއެވެ. https://sun.mv/212659 މިދިޔަ އޮކްޓޫބަރު މަހު އިކޮނޮމިކް މިނިސްޓްރީން ވަނީ، ޕޭޕަލް ފަދަ ޚިދުމަތްތައް ގައުމުތަކުގައި ފަށައިގަތުމަށް ފުރިހަމަކުރަން ޖެހޭ ކަންކަން ގިނަކަން ފާހަގަކޮށް، ފަންނީ އަދި މާލީ އެފަދަ ޒަމާނީ މުއާމަލާތްތައް ކުރުމުގައި ރާއްޖެފަދަ ގައުމުތަކަށް ޒަމާނުއްސުރެ ދަތިތައް އޮތް ކަމަށް ބުނެފައެވެ. އެ ދަތިތަކުން އަރައިގަނެ، ބައިނަލްއަގުވާމީ ޚިދުމަތްތައް ރާއްޖޭގައި ފަށައިގަތުމަށް މި ސަރުކާރުން ވަނީ ވަރަށް ބޮޑު އިސްކަމެއް ދީ، އެތަކެއް ގޮންޖެހުންތަކަކުން އަރައިގެންފައި ކަމަށް މިނިސްޓްރީން ބުނެފައިވެއެވެ.