ވަލަށް ގެންގޮސް ގަދަކަމުން އަންހެނަކާ ބެހުނު ކަމަށް ތުހުމަތު ކުރެވޭ މައްސަލައަކާ ގުޅިގެން ހައްޔަރުކޮށްފައިވާ މީހަކު، ހައިކޯޓުން މިނިވަންކޮށްފިއެވެ. މިއީ މިދިޔަ ފެބްރުއަރީ މަހުގެ ކުރީކޮޅު ހިނގި ހާދިސާއެކެވެ. މައްސަލަ ނިމުނު ގޮތުގެ ރިޕޯޓުން އެނގޭ ގޮތުގައި މިއީ، މާލޭން ދެކުނުގެ ރަށެއްގެ މީހަކު، ހަމަ އެ ރަށު އަންހެނަކު ގަދަކަމުން ސައިކަލަށް އަރުވައިގެން ވަލުތެރެއަށް ގެންގޮސް ގަދަކަމުން ބަދުއަހުލާގީ އަމަލު ހިންގި ކަމަށް ތުހުމަތު ކުރެވޭ މައްސަލައެކެވެ. މައްސަލަ ނިމުނު ގޮތުގެ ރިޕޯޓުން އެނގޭ ގޮތުގައި މި ހާދިސާ ހިނގާފައިވަނީ ފެބުރުއަރީ މަހުގެ ހަތަރުވަނަ ދުވަހުގެ ރޭގަނޑުއެވެ. ޖެހިގެން އައި ދުވަހު ފުލުހުން ވަނީ ކޯޓު އަމުރަކާއެކު އެ ފިރިހެން މީހާ ހައްޔަރުކޮށްފައެވެ. ފިރިހެން މީހާ ހައްޔަރުކޮށް، ބަންދާ މެދު ގޮތެއް ނިންމުމަށް، ފެބްރުއަރީ މަހުގެ ހަވަނަ ދުވަހު ކޯޓަށް ހާޒިރުކުރުމުން ކޯޓުންވަނީ، ކުށް ކުރިކަމަށް އެކަށީގެންވާވަރަށް ހެކި ލިބިފައިވާ ކަމަށް ބަލައި، 30 ދުވަހަށް އެ ފިރިހެން މީހާ ބަންދު ކުރަން އަމުރުކޮށްފައެވެ. ކުރިން ކުށުގެ ރެކޯޑެއް ނެތް މި މީހާ، 30 ދުވަހަށް ބަންދު ކުރުމުން އޭނާގެ ފަރާތުން އެ މައްސަލަ ހުށަހެޅީ ހައިކޯޓަށެވެ. ހައިކޯޓުގައި އޭނާ އިސްތިއުނާފުކޮށް ބުނީ، އޭނާ 15 ދުވަހަށްވުރެ އިތުރަށް ބަންދު ނުކުރެވޭނެ ކަމަށެވެ. ޖިނާއީ އިޖުރާއަތުގެ ގާނޫނާ ހަވާލާދީ އޭނާގެ ފަރާތުން ހުށަހެޅި މި ނުކުތާއަށް ދައުލަތުންވެސް ވަނީ ހައިކޯޓުގެ ޝަރިއަތުގައި އިއުތިރާފުވެ، ދަށު ކޯޓުގެ އަމުރު ބާތިލު ކުރަން އެދޭ ކަމަށް ބުނެފައެވެ. މި މައްސަލައިގައި، ހައިކޯޓަށް އެންމެ ފަހުން އައްޔަން ކުރި ތިން ފަނޑިޔާރުންގެ ބެންޗުގެ އިއްތިފާގުންވަނީ އެ މީހާ ހައްޔަރު ކުރަން ދަށު ކޯޓުން ނެރެފައިވާ އަމުރު ބާތިލުކޮށްފައެވެ. އެއީ ފަނޑިޔާރު އިބްރާހީމް މާހިރު، އިސްމާއިލް ޝަފީއު އަދި އަބްދުއްރައޫފު އިބްރާހީމްއެވެ. މައްސަލައިގެ ރިޔާސަތު ބެލެހެއްޓީ އަބްދުއްރައޫފު އިބްރާހީމްއެވެ. ހައިކޯޓުން މި ހުކުމް ކުރީ ބުރާސްފަތި ދުވަހުއެވެ.