ކ. ކާށިދޫ ފަޅާއި ނ. ފަރުމުލީގައި ރިސޯޓެއް އަޅައިދޭނެ ބަޔަކު ހޯދުމަށް ޓޫރިޒަމް މިނިސްޓްރީން އިއްޔެ އިއުލާނުކޮށްފިއެވެ. މިނިސްޓްރީން ކުރި އިއުލާނުގައި ބުނެފައިވާ ގޮތުން، ކާށިދޫ ފަޅުގައި ރިސޯޓު އަޅަނީ 10 ހެކްޓަރު ހިއްކައިގެންނެވެ. އަދި، ފަރުމުލީގައި 71.18 ހެކްޓަރުގެ ސަރަހައްދެއް ހިއްކައިގެން 15 ހެކްޓަރަށް ވުރެ ބޮޑު ނޫން ރިސޯޓެއް ހަދާނެ ކަމަށް އިއުލާނުގައިވެއެވެ. އެ ރަށްތަކުގައި ރިސޯޓު އަޅައިދޭން ޝައުގުވެރިވާ މީހުންނަށް ބީލަން ހުށަހެޅުމުގެ ފުރުސަތު އެ މިނިސްޓްރީން ވަނީ ހުޅުވާލާފައެވެ. ބީލަން ހުށަހެޅޭނީ، އަންނަ މަހު 16ގެ 10:00އާއި މާރިޗު ތިނެއްގައި ވާޗުއަލްކޮށް، ބާއްވާ މައުލޫމާތު ސާފުކުރުމުގެ ބައްދަލުވުމުގައި ބައިވެރިވިވެގެންނެވެ. ބީލަން ހުށަހެޅުމުގެ ސުންގަޑިއަކީ، އަންނަ އޭޕްރީލް އެކެއްގެ 10:00އެވެ. ފާހަގަކުރެވޭ ގޮތުގައި، ކާށިދޫ ފަޅުގައި ރިސޯޓެއް އަޅާނެ ބަޔަކު ހޯދަން މިދިޔަ އޭޕްރީލް މަހު ވެސް އިއުލާނުކުރިއެވެ. https://sun.mv/208241 ރިސޯޓެއް ހަދަން އިއުލާނުކުރި މާފަރު ފަޅު ތެރޭގައި ހިމެނޭ ފަރުމުލި ވަނީ، އެރަށުގެ އިހުތިސާސުން މިދިޔަ ޖުލައި ހައެއްގައި ރައީސް ޑރ. މުހައްމަދު މުއިއްޒު ވަކި ކުރައްވާފައެވެ. ރައީސް ރިޔާސީ ކެމްޕޭނަށް ސެޕްޓެމްބަރު 20، 2023ގައި މާފަރަށް ވަޑައިގެން ދެއްކެވި ވާހަކަފުޅުގައި ވަނީ ކުރީގެ ރައީސް އިބްރާހީމް މުޙައްމަދު ޞާލިޙްގެ ސަރުކާރުން އެ ރަށުގެ އިހްތިސާސުން ވަކިކޮށްފައިވާ ބަޔަކީ އެ ރަށަށް ލިބެން ޖެހޭނެ ބައެއްކަމަށް ގަބޫލުކުރައްވާ ކަމަށް ވިދާޅުވެފައެވެ. އަދި އެ ރަށު ފަޅުތެރޭގައި ރިސޯޓް ހަދައި، ޓޫރިޒަމްގެ ފުރުސަތު އިތުރުކޮށްދެއްވާނެ ކަމަށް ވެސް އެ މަނިކުފާނު ވައުދުވެވަޑައިގަތެވެ.