ދުރު ފެންނަ މިންވަރު މިއަދު ދެ ކިލޯ މީޓަރަށް ވުރެ ދަށްވެފައިވާ ކަމަށާއި ކުރިއަށް އޮތް ދެ ދުވަހުގެ ވެސް ވައި ނުސާފުވާނެ ކަމަށް މޫސުމާ ބެހޭ ގައުމީ އިދާރާ، މެޓުން މިއަދު ބުނެފިއެވެ. މި ދުވަސްވަރު އަންނަނީ ރާއްޖޭގެ އެކި ހިސާބުތަކަށް ދުންފުހުގެ އަސަރު ކުރަމުންނެވެ. މެޓުން ނެރުނު ނޫސްބަޔާނެއްގައި ވަނީ، ރާއްޖޭގެ ހުރިހާ ހިސާބަކަށް ދުންފުހުގެ އަސަރު ނުރައްކާތެރި މިންވަރަކަށް މިއަދު މަތިވެފައިވާ ކަމަށެވެ. މިދިޔަ ހަތް ދުވަހަށް ބަލާއިރު، އެންމެ ބޮޑަށް ދުންފުހުގެ އަސަރު ކޮށްފައި ވަނީ މިއަދު ކަމަށާއި ދުރު ފެންނަ މިންވަރު މިންވަރު ދެ ކިލޯ މީޓަރަށް ދުރެ ދަށްވެފައިވާ ކަމަށް އެ އިދާރާއިން ބުނެއެވެ. މާލެ ސަރަހައްދަށް ވައި ނުސާފުވެފައި -- ސަން ފޮޓޯ/ އަހުމަދު އިޔާދު އޭގެއިތުރަށް، ކުރިއަށް އޮތް ދެ ދުވަހު ވެސް އިރު އިތުރުން އަންނަ ވަޔާ އެއްކޮށް ދުންފުހުގެ އަސަރު ރާއްޖެ މަތީގައި ހުންނާނެ ކަމަށް ބެލެވޭ ކަމަށް މެޓުން ފާހަގަކުރިއެވެ. އެހެންވެ، އެ ކަމަށް ސަމާލުވާން އެ އިދާރާއިން ވަނީ އެދިފައެވެ. ވައިގެ ކޮލިޓީ ދައްކައިދޭ އައިކިއު އެއާއިން ދައްކާ ގޮތުގައި، މާލެ ސަރަހައްދުގައި މި ވަގުތު ވައިގެ ކޮލިޓީ ހުރީ 164ގައި ކަމަށްވާއިރު، ކުޅުދުއްފުށީގައި ވައިގެ ސާފުމިން ހުރީ 157ގައެވެ. އެއީ، ނުރައްކަލުގެ ރަތް ސަލާމެވެ. ރާއްޖޭގެ ދެކުނުން އައްޑޫގައި ވައިގެ ސާފު މިން ހުރީ 122ގައި ކަމަށްވާއިރު، ފުވައްމުލަކުގައި އެ އަދަދު ހުރީ 147ގައެވެ. އެއީ، ނުރައްކަލުގެ އޮރެންޖު ސަމާލު ކަމަށްވާއިރު، ނާޒުކު ހާލަތުއިވާ ފަރާތްތައް ބޭރަށް ނުކުތުމުގެ ކުރިން މާސްކު އެޅުމަށާއި ނުސާފު ވައި ވަނަ ނުދިނުމަށްޓަކައި ދޮރުތައް ލައްޕައިފައި ބެހެއްޓުމަށާއި ނާޒުކު ހާލަތުގައިވާ ފަރާތްތައް ކުޅިވަރުކުޅުމާއި ކަސްރަތުކުރުން މަޑުޖައްސާލަން ސިއްހީ މާހިރުން އިލްތިމާސްކުރެއެވެ.