ށ. ނަރުދޫގެ އިންޖީނުގޭގައި މިއަދު ހިނގި އަލިފާނުގެ ހާދިސާއާ ގުޅިގެން މުޅި ރަށުން ކަރަންޓު ގޮސްފައިވާއިރު މިއަދުގެ އިރު އޮއްސުމުގެ ކުރިން ރަށަށް ކަރަންޓު ފޯރުކޮށްދިނުމަށް މަސައްކަތް ކުރަމުންދާ ކަމަށް ފެނަކަ ކޯޕަރޭޝަނުން ބުނެފި އެވެ.
ނަރުދޫ އިންޖީނުގޭގައި ހިނގި އަލިފާނުގެ ހާދިސާއާ ގުޅިގެން ފެނަކައިން މިއަދު ބުނީ، އަލިފާނުގެ ހާދިސާ ހިނގާފައިވަނީ އެ ރަށަށް ކަރަންޓު ދޭން ގެންގުޅޭ 80 ކިލޯވޯޓުގެ އިންޖީނުން ބާރުގަދަ އަޑެއް ގޮވައި ހުޅު ހިފައިގެން ކަމަށެވެ. އެ ހާދިސާގައި އިންޖިނުގޭގައި ހުރި 50 ކިލޯވޯޓްގެ ޖަނަރޭޓަރުގައި ވެސް އަލިފާން ރޯވެފައިވާ ކަމަށެވެ.
"މި ހާދިސާއާ ގުޅިގެން ނަރުދޫ އިންޖީނުގޭގައި ބޭނުންކުރަމުންދާ 80 ކިލޯވޯޓް އަދި 50 ކިލޯވޯޓްގެ ދެ ޖަނަރޭޓަރު ވަނީ ބޭނުން ނުކުރެވޭ ވަރަށް ހަލާކުވެފަ،" ފެނަކައިން ބުންޏެވެ.
ފެނަކައިން ބުނީ، ނަރުދޫއަށް އަލުން ކަރަންޓް ދިނުމަށް އެ އަތޮޅު ފޭދޫއިން 128 ކިލޯވޯޓްގެ ޖަނަރޭޓަރެއް ނަރުދޫއަށް ގެންދިޔުމުގެ މަސައްކަތް މިހާރު ފަށާފައިވާ ކަމަށެވެ. މިހާރު ވެސް ފެނަކައިގެ ޓެކްނިކަލް ޓީމެއް ވެސް ނަރުދޫގައި ހަރަކާތްތެރިވަމުންދާ ކަމަށެވެ.
"ކުންފުނިން މަސައްކަތް ކުރަމުން ދަނީ އިރު އޮއްސުމުގެ ކުރިން ނަރުދޫގައި ކަރަންޓުގެ ހިދުމަތް އަލުން އިޔާދަކުރުމަށް،" ފެނަކައިން ބުންޏެވެ.
ހާދިސާ ހިނގަން މެދުވެރި ސަބަބު ތަހުގީގު ކުރުމަށް މިހާރު މައްސަލަ ފުލުހަށް ވަނީ ހުށަހަޅާފަ އެވެ. އަދި ފެނަކައިގެ ފަރާތުން ވެސް ވަނީ މައްސަލަ ތަހުގީގުކުރަން ފަށާފަ އެވެ.
މީހުން ދިރިއުޅޭ ސަރަހައްދުގައި ހުންނަ އެ އިންޖީނުގޭގައި ރޯވެ އިމާރާތް ވެސް ބޭނުން ނުކުރެވޭ ވަރަށް އަނދާފައިވާއިރު އިމާރާތް ކައިރީ ހުރި އެހެން ތަނަކަށް އަލފާނުގެ އަސަރުކޮށްފައެއް ނުވެ އެވެ. އެ ރަށުގެ މިހާރުގެ އާބާދީއަކީ 504 އެވެ.