އދ.ގެ ކޮމިޝަން އޮން ދަ ސްޓޭޓަސް އޮފް ވިމެންއަށް ދިވެހިރާއްޖެ ފުރަތަމަ ފަހަރަށް އިންތިޚާބުވުމަކީ ލިބުނު ފަޚުރެއްކަމަށާއި، އަންހެނުންގެ ކުރިއެރުމާއި ޙައްޤުތައް ޙިމާޔަތްކުރުމަށް ކުރެވޭ މަސައްކަތުގައި އަބަދުވެސް ގުޅިގެން މަސައްކަތްކުރުމަށް، ދިވެހިރާއްޖެއިން އޮންނާނީ ތައްޔާރަށްކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ އދ.ގެ އަންހެނުންގެ ތަރައްޤީއަށް މަސައްކަތްކުރާ ޖަމްޢިއްޔާގެ މެމްބަރަކަށް ދިވެހިރާއްޖެ އިންތިޚާބުވުމާއި ގުޅިގެން ސޯޝަލް މީޑިއާގައި ކުރެއްވި ޕޯސްޓެއްގައެވެ.
ރައީސް މުއިއްޒު ކުރެއްވި ޕޯސްޓުގައި ވަނީ، އެކޮމިޝަންގެ މެންބަރުކަމަށް އިންތިޚާބުވުމަކީ ވަރަށް ބޮޑު ޝަރަފެއް ކަމަށް ވިދާޅުވެފައެވެ. އެގޮތުން، އަންހެނުންގެ ހައްގުތަކާ ބާރުވެރިކަމާ ގުޅޭ މުހިންމު މައްސަލަތަކުގައި ކޮމިޝަނަށް އެހީތެރިވުމަށް ރާއްޖޭން ތައްޔާރަށް ތިބިކަން އެމަނިކުފާނުގެ ޕޯސްޓުގައި ވަނީ ފާހަގަކުރައްވާފައެވެ.
އަދި، ކޮމިޝަނުގެ މަސައްކަތްތައް ހަރުދަނާކުރުމަށް ހުރިހާ ބައިވެރިންނާއެކު މަސައްކަތް ކުރުމަށް ބޭނުންވާ ކަމަށް އެމަނިކުފާނު ވަނީ ވިދާޅުވެފައެވެ. މިދިޔަ އަހަރުތަކުގައި ބައިނަލްއަގުވާމީ އަދި ގައުމީ ފެންވަރުގައި އަންހެނުންގެ ހައްގުތަކާއި ދަރަޖަ ކުރިއެރުވުމަށް ރާއްޖޭން މުހިންމު ފިޔަވަޅުތަކެއް އަޅާފައިވާ ކަމަށް ރައީސް މުއިއްޒު ވިދާޅުވިއެވެ.
އދ. ގެ އަންހެނުންގެ ތަރައްޤީއަށް އަދި އަންހެނުންގެ ޙައްޤުތަކަށް މަސައްކަތްކުރާ ޖަމްޢިއްޔާއަކީ، އަންހެނުންގެ ޙައްޤުގައި މަސައްކަތްކުރާ ބައިނަލްއަޤުވާމީ އެންމެ ބޮޑު އެއް ޖަމްޢިއްޔާއެވެ. އދ.ގެ މެމްބަރު 193 ޤައުމުގައި އަންހެނުންގެ ޙައްޤުތައް ކަށަވަރުކުރުމަށް ބާރުއަޅާ މި ޖަމްޢިއްޔާގެ މެމްބަރުކަން ރާއްޖެއަށް ލިބުނު މިއީ ފުރަތަމަ ފަހަރެވެ.