ކ. ގުޅީ ބިންހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫއުގެ ތެރެއިން ބިން ހިއްކުމުގެ އަމަލީ މަސައްކަތް ފަށައިފިއެވެ. ގުޅީ ބިން ހިއްކުމުގެ މަޝްރޫއުގެ މަސައްކަތް އަމަލީ ގޮތުން ފައްޓަވައި ދެއްވީ އެ ކުންފުނީގެ މެނޭޖިން ޑިރެކްޓަރު ޑީސީޕީ (ރިޓަޔާޑް) އަޙްމަދު ސައުދީއެވެ. ގުޅީ ކައުންސިލްގެ ރައީސް މޫސާ ސަފީލާއި، އެމްޓީސީސީއާއި ގުޅީގެ ކައުންސިލްގެ އިސްވެރިން އެ ރަސްމިއްޔާތުގައި ބައިވެރިވެވަޑައިގެންނެވިއެވެ. ގުޅީ ބިންހިއްކުމުގެ އަމަލީ މަސައްކަތް ފެށުން --- ސަން ފޮޓޯ/ އަބްދުﷲ މާނިއު އެމްޓީސީސީން ބުނީ 814 މީހުންގެ އާބާދީއެއް އޮންނަ ގުޅިއަކީ ބިމުގެ ޖާގައިގެ ގޮތުން ކުޑަ ނަމަވެސް ވަރަށް ރީތި ހިތްގައިމު ރަށެއް ކަމަށާއި، މާާލެ އަތޮޅުގެ ގިނަ ރަށްތައް ފަދައިން ގުޅިއަކީ ވެސް ފަތުރުވެރިކަން ކުރި އަރަމުން އަންނަ ރަށެއް ކަމަށެވެ. އެގޮތުން މިހާރު ވެސް އެ ރަށުގައި 15 ވަރަކަށް ގެސްޓްހައުސް އަންނަނީ އެކި ފަންތީގައި ހިންގަމުން ކަމަށާއި ރަށުގެ ގިނަ ރައްޔިތުންނަށް އޮތް އެންމެ ބޮޑު ދައްޗަކީ ރަށުގެ ބިންކޮޅު ކުޑަވުމުން ރަށުގައި ދިރިއުޅުމަށާއި ވިޔަފާރިކުރުމަށް އިތުރު ޖާގަ ނެތުމުގެ މައްސަލަކަން ވެސް އެ ކުންފުނިން ފާހަގަކޮށްފައިވެއެވެ. މީގެ އިތުރުން އެމްޓީސީސީން ބުނީ އެ މަޝްރޫއުގެ ދަށުން ބިން ހިއްކުމުގެ މަސައްކަތް ފެށުމާއެކު ރައްޔިތުންގެ ހުވަފެންތަކުގައި ކުލަޖެހޭތަން މުސްތަގުބަލުގައި ފެންނާނެ ކަމަށެވެ. އަދި މުޅި އެ މަޝްރޫއު ނިމުމާއެކު ރަށުގެ ރައްޔިތުންގެ އޮތް ބޯހިޔާވަހިކަމާއި އިގުތިސާދު ފުޅާކުރުމަށް އޮތް ދަތިކަމަށް ބޮޑު ހައްލެއް ލިބޭނެ ކަމަށް ވެސް އެ ކުންފިން ބުންޏެވެ. ގުޅީ ބިންހިއްކުމުގެ އަމަލީ މަސައްކަތް ފެށުން --- ސަން ފޮޓޯ/އަބްދުﷲ މާނިއު އެމްޓީސީސީން ބުނީ މި މަޝްރޫއުގެ ދަށުން ބިން ހިއްކުމުން 10.15 ހެކްޓަރުގެ ބިމެއް އެ ރަށަށް އިތުރުވާނެ ކަމަށެވެ. އަދި ގޮނޑުދޮށް ހިމާޔަތްކުރުމުގެ މަސައްކަތުގެ ދަށުން 10,962 މީޓަރުގެ ބޮޑު ހިލައިގެ ރިވެޓްމަންޓާއި 362 މީޓަރުގެ ޖިއޯބޭގް ރިވެޓްމަންޓެއްގެ އިތުރުން 88 މީޓަރުގެ ގްރޮއިންސް ޖެހުމުގެ މަސައްކަތް ކުރާނެ ކަމަށެވެ. އެމްޓިސީސީން ބުނީ އެ މަޝްރޫއުގެ އަގަކީ 89.63 މިލިއަން ރުފިޔާ ކަމަށެވެ.