ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެންބަރު ޑރ. އަހްމަދު ޝަމްހީދު، އިދިކޮޅު މައި ޕާޓީ އެމްޑީޕީގެ ރިޔާސީ ޕްރައިމަރީގައި ވާދަކުރެއްވުމުގެ ޝައުގުވެރިކަން ފާޅުކުރައްވައިފިއެވެ.
އެކަމުގެ ޝައުގުވެރިކަން ފާޅުކުރައްވައި އެމްޑީޕީގެ ބައެއް މެންބަރުންނަށާއި ގްރޫޕްތަކަށް ޝަމްހީދު ފޮނުއްވި މެސެޖުތަކެއް ސޯޝަލް މީޑިއާގައި ދައުރު ވެސް ވިއެވެ.
'ދަ ޕްރެސް' އިން ސުވާލުކުރުމުން ޝަމްހީދު ވިދާޅުވީ އޭނާ ނިންމެވީ ޕްރައިމަރީ އަށް ނުކުންނެވުމަށް ދިރާސާކުރެއްވުމާއި އެކަމާ ގުޅޭގޮތުން އާންމުންނާއި ޕާޓީގެ މެންބަރުންނާ މަޝްވަރާކުރެއްވުމަށް ކަމަށެވެ.
ކުރީގެ ރައީސް ޑރ. މުހައްމަދު ވަހީދުގެ ވެރިކަމުގައި އޭރު ޓްރާންސްޕޯޓް މިނިސްޓަރުކަމުގެ މަގާމު ޝަމްހީދު ފުރުއްވީ ޖުމްހޫރީ ޕާޓީގެ ސްލޮޓެއްގައެވެ. އަދި ކުރީގެ ރައީސް އިބްރާހީމް މުހައްމަދު ސޯލިހުގެ ވެރިކަމުގައި އެ މިނިސްޓްރީގެ ސްޓޭޓް މިނިސްޓަރުކަމުގެ މަގާމު ވެސް ފުރުއްވިއެވެ.
ފާހަގަކުރެވޭ ގޮތުގައި އެމްޑީޕީގެ ޗެއާޕާސަން ފައްޔާޒް އިސްމާއީލް ވަނީ އެމްޑީޕީގެ ރިޔާސީ ޕްރައިމަރީގައި ވާދަކުރެއްވުމުގެ ޝައުގުވެރިކަން ފާޅުކުރައްވައިފައެވެ. އަދި އެ ޕާޓީގެ ރައީސް އަބްދުﷲ ޝާހިދު ވެސް އެތެރޭގައި ކެމްޕެއިން ކުރައްވަމުން އެބަ ގެންދަވައެވެ. ސޯޝަލް މީޑިއާގައި އިބޫ ޕްރައިމަރީގައި ވާދަކުރައްވާނެ ކަމަށް އަޑުތައް ފެތުރިފައިވީ ނަމަވެސް، އެމްޑީޕީން އެކަން ރަސްމީކޮށް އަދި ކަށަވަރުކޮށްދީފައި ނުވެއެވެ.