މަޝްހޫރު މިއުޒިކް ސްޓްރީމިން ޕްލެޓްފޯމް ސްޕޮޓިފައި އިން އިޝްތިހާރުކުރުމަށް ބޭނުންކުރެވޭ އައު ވަސީލަތްތަކެއް ތަޢާރަފުކޮށްފިއެވެ. ނިއުޔޯކުގައި ބޭއްވުނު "ސްޕޮޓިފައި އެޑްވާންސް" އިވެންޓުގައި، ތަޢާރަފްކުރި މި ވަސީލަތްތަކުގެ ތެރޭގައި، އިޝްތިހާރުކުރާ ފަރާތްތަކަށް ޚާއްޞަކޮށްގެން ތައްޔާރުކޮށްފައިވާ އައު އެޑް މެނޭޖާ ޕްލެޓްފޯމަކާއި އާޓިފިޝަލް އިންޓެލިޖެންސް (އޭއައި) ބޭނުންކޮށްގެން އިޝްތިހާރުގެ ސްކްރިޕްޓް އަދި އަޑު ތައްޔާރުކުރެވޭ ޓޫލްތަކެއް ހިމެނެއެވެ. ސްޕޮޓިފައި އިން މި އައު ވަސީލަތްތައް ތަޢާރަފުކުރި ކަމަށް ބުދަ ދުވަހު އިޢުލާނުކޮށްފައިވާއިރު، މީގެ ތެރެއިން އެންމެ ފާހަގަކޮށްލެވޭ އެއް ކަމަކީ "ސްޕޮޓިފައި އެޑް އެކްސްޗޭންޖް" (އެސްއޭއެކްސް)ގެ ނަމުގައި ކުރިން ތަޢާރަފުކޮށްފައިވާ ޕްރޮގްރެމެޓިކް އިޝްތިހާރުކުރުމުގެ ޕްލެޓްފޯމަށް ގެނެސްފައިވާ އަޕްގްރޭޑްތަކެވެ. މި އަޕްގްރޭޑްތަކާއެކު، އިޝްތިހާރުކުރާ ފަރާތްތަކަށް ސްޕޮޓިފައިގެ ޚިދުމަތް ބޭނުންކުރާ ގިނަ ބަޔަކަށް ވާސިލުވުމުގެ ފުރުސަތު ލިބިގެންދާނެއެވެ. މީގެ އިތުރުން، ސްޕޮޓިފައިއިން ގޫގުލް އަދި މެގްނައިޓް އާއެކު އޮންނަ ވިޔަފާރީގެ ގުޅުން ފުޅާކުރަމުންދާ ކަމަށް ވެސް ބުނެފައިވެއެވެ. މި ގުޅުން ފުޅާކުރެވެނީ އެޑް އެކްސްޗޭންޖް ޕްލެޓްފޯމާ ގުޅޭގޮތުންނެވެ. ސްޕޮޓިފައި އިން ބުނާ ގޮތުގައި، މި އައު ވަސީލަތްތަކުގެ ސަބަބުން އިޝްތިހާރުކުރާ ފަރާތްތަކަށް އިޝްތިހާރު ތައްޔާރުކުރުމާއި، އޭގެ ނަތީޖާ ދެނެގަތުމާއި، އަދި އިޝްތިހާރުގެ ނަތީޖާ ހާސިލުކުރުން ފަސޭހަވެގެންދާނެއެވެ. އަދި މިހާރު މި ޚިދުމަތް ލިބެން ހުންނާނީ އޮސްޓްރޭލިއާ، ބްރެޒިލް، ކެނެޑާ، ޔޫރަޕް، އިންޑިއާ، މެކްސިކޯ، ނިއުޒީލަންޑް، ސިންގަޕޫރު އަދި އެމެރިކާގައި ކަމަށް ސްޕޮޓިފައި އިން ބުނެފައިވެއެވެ. ސްޕޮޓިފައި އިން އޭގެ އެޑްސް މެނޭޖާ ޕްލެޓްފޯމަށް އިތުރު ފީޗާތަކެއް އިތުރުކުރަމުންދާ ކަމަށްވެސް ބުނެފައިވެއެވެ. މި ފީޗާތަކުގެ ތެރޭގައި، އިޝްތިހާރުކުރާ އަމާޒުކުރެވޭ ފަރާތްތައް އިތުރަށް ދެނެގަތުމުގެ ޤާބިލުކަން އިތުރުކުރުމާއި، އައު މިންގަނޑުތަކެއް ތަޢާރަފުކުރުން ހިމެނެއެވެ. މީގެ ސަބަބުން އެކި ބޭނުންތަކަށް އިޝްތިހާރުކުރާ ފަރާތްތަކަށް އެހީތެރިވެދެވޭނެ ކަމަށް ސްޕޮޓިފައި އިން ބުނެފައިވެއެވެ. އިތުރު ތަފްސީލު ހާމަނުކުރި ނަމަވެސް، ސްޕޮޓިފައިއިން "ސްޕޮޓިފައި ޖެން އޭއައި އެޑްސް" ގެ ނަމުގައި އޭއައި ބޭނުންކޮށްގެން އިޝްތިހާރުކުރުމަށް ބޭނުންކުރެވޭ ޓޫލްތަކެއް ތަޢާރަފުކޮށްފައިވެއެވެ. މި ޓޫލްތަކުގެ އެހީގައި އިތުރު ޚަރަދަކާ ނުލައި އިޝްތިހާރުގެ ސްކްރިޕްޓާއި އަޑު ތައްޔާރުކުރެވޭނެ ކަމަށް ބުނެފައިވެއެވެ. މި ޚިދުމަތް މިހާރު ލިބެން ހުންނާނީ އެމެރިކާ އާއި ކެނެޑާގައި ކަމަށް ސްޕޮޓިފައިއިން ބުނެފައިވެއެވެ. އިޝްތިހާރުކުރާ ފަރާތްތަކަށް މަޢުލޫމާތު ދެމުން، ސްޕޮޓިފައިއިން ބުނެފައިވަނީ އެ ޕްލެޓްފޯމްގެ ހިލޭ ޚިދުމަތް ބޭނުންކުރާ ފަރާތްތަކުން ދުވާލަކު އެވްރެޖްކޮށް ދެ ގަޑިއިރު ސްޕޮޓިފައި ބޭނުންކުރާ ކަމަށެވެ. ނަމަވެސް މިވަރަށް ސްޕޮޓިފައި ބޭނުންކުރާ މީހުންގެ އަދަދު ހާމަކޮށްފައެއް ނުވެއެވެ. އަދި ސްޕޮޓިފައިއިން ހިންގި ސާވޭއެއްގެ ނަތީޖާ ހިއްސާކުރަމުން ބުނެފައިވަނީ، ޒުވާން ޖީލުގެ 71 އިންސައްތަ މީހުން ސްޕޮޓިފައި ދެކެނީ އެކުވެރި ޕްލެޓްފޯމެއްގެ ގޮތުގައި ކަމަށެވެ.