މިޔަންމާއަށް އައި ބާރުގަދަ ބިންހެލުމުގައި މަރުވި މީހުންގެ އަދަދު 3،354 އަށް އަރައި، 4،850 މީހަކު ޒަހަމްވެ، 220 މީހަކު ގެއްލިފައިވާ ކަމަށް މިޔަންމާގެ ދައުލަތުގެ މީޑިއާއިން ބުނެފި އެވެ.
ބެންކޮކްގައި އޮތް ދެކުނު އަދި އިރުމަތީ އޭޝިއާގެ ގައުމުތަކުގެ ސަމިޓެއްގައި ބައިވެރިވެވަޑައިގަތުމަށް ފަހު އަސްކަރީ ސަރުކާރުގެ ލީޑަރު ސީނިއާ ޖެނެރަލް މިން އަންގް ހަލައިންގް އެނބުރި ވެރިރަށް ނޭޕިޓޯއަށް ވަނީ ވަޑައިގެންފަ އެވެ. އެ ދަތުރުގައި އޭނާ ވަނީ ތައިލެންޑް، ނޭޕާލް، ބޫޓާން، ސްރީލަންކާ އަދި އިންޑިއާގެ ވެރިންނާ ވަކިވަކިން ބައްދަލުކުރައްވައިފަ އެވެ.
މިޔަންމާގެ ދައުލަތުގެ މީޑިއާއިން ބުނީ އަންނަ ޑިސެމްބަރު މަހު މިނިވަން އަދި އިންސާފުވެރި އިންތިހާބެއް އެ ގައުމުގައި ބާއްވާނެ ކަމުގެ ޔަގީންކަން އިންޑިއާގެ ބޮޑުވަޒީރު ނަރެންދުރަ މޯދީއަށް މިން އަންގް ހްލައިންގް ދެއްވި ކަމަށެވެ.
މޯދީ ވިދާޅުވީ މިޔަންމާގައި ކުރާ ދާހިލީ ހަނގުރާމަ ދާއިމީކޮށް ހުއްޓާލަން ޖެހޭ ކަމަށެވެ. އަދި އިންތިހަބަކީ އެންމެންނަށް ހަމަހަމަ ފުރުސަތު އޮންނަ އަދި އިތުބާރު ކުރެވޭ އިންތިހާބަކަށް ވާންޖެހޭ ކަމަށެވެ.
ފާޑުކިޔާ ފަރާތްތަކުން ބުނަނީ ޕްރޮކްސީތައް މެދުވެރިކޮށް ޖެނެރަލުން ވެރިކަމުގައި ބެއިތިއްބުމަށް ރާވާފައިވާ އިންތިހާބަކީ މަކަރުވެރި އިންތިހާބެއް ކަމަށެވެ.
އަންސަން ސޫކީގެ އިންތިހާބީ މަދަނީ ސަރުކާރު 2021 ވަނަ އަހަރު ވައްޓާލުމަށް ފަހު، މިޔަންމާ ހިންގުމުން އަންނަ އަސްކަރީ ސަރުކާރަށް ދަތިތަކެއް ކުރިމަތިވެ، އިގްތިސާދާއި ސިއްހީ ހިދުމަތުގެ އިތުރުން އަސާސީ ހިދުމަތްތައް ވަނީ ހީނަރުވެފަ އެވެ. އަދި މިދިޔަ މަހުގެ 28 ވަނަ ދުވަހު އައި ބިންހެލުމާ ގުޅިގެން އެކަންކަން ވަނީ އިތުރަށް ގޯސްވެފަ އެވެ.
ބަގާވާތަށް ފަހު ހިނގި ދާހިލީ ހަނގުރާމައިގެ ސަބަބުން ތިން މިލިއަނަށް ވުރެ ގިނަ މީހުން ވަނީ ވިއްސިވިހާލިވެފަ އެވެ. އަދި ކާބޯތަކެތީގެ ނުރައްކާތެރިކަން ބޮޑުވެ، އާބާދީގެ ތިންބައިކުޅަ އެއްބަޔަށް ވުރެ ގިނަ މީހުންނަށް އިންސާނީ އެހީތެރިކަން ބޭނުންވެފައިވާ ކަމަށް އދ. އިން ބުނެ އެވެ.
ބިންހެލުމުގައި މިޔަންމާގައި މަރުވި މީހުންގެ އަދަދު 3،000 އިން މައްޗަށް އަރައިފި
އަރުޝީފަށް ނެގީ
އެންމެފަހުން އަޕްޑޭޓްކުރީ
އެންމެފަހުން އަޕްޑޭޓްކުރީ