ރައީސް އިނގިރޭސީވިލާތަށް ކުރެއްވި ދަތުރު ނިންމަވާލައްވައިފި

ރައީސް މުހައްމަދު މުއިއްޒު އިނގިރޭސީވިލާތަށް ކުރެއްވި ރަސްމީ ދަތުރު ނިންމަވާލައްވައިފި އެވެ.
ވީ ކިހިނެއް؟ - އިނގިރޭސީވިލާތުގެ ފުޓްބޯޅައިގެ ގަދަ ބާރު، ލިވަޕޫލް އެފްސީ އާއި އެމްއެމްޕީއާރުސީ ގުޅިގެން ރާއްޖޭގެ ފަތުރުވެރިކަން އިޝްތިހާރު ކުރުމަށް އެއްބަސްވެފައިވާތީވެ، މި ކެމްޕެއިން ހަރަކާތްތަކުގައި ބައިވެރިވެވަޑައިގަތުމަށް ރައީސް މުއިއްޒު އެ ގައުމަށް ފުރާ ވަޑައިގެންެވީ، މިދިޔަ ބުދަ ދުވަހުގެ ރޭ އެވެ.
ރައީސް އޮފީހުން ރޭ ބުނި ގޮތުގައި ރަސްމީ އެ ދަތުރު މިހާރު  ވަނީ ރައީސް ވަނީ ނިންމަވާލައްވައިފަ އެވެ. ނަމަވެސް، ރައީސް އެނބުރި ރާއްޖެ ވަޑައިގެންނެވި ކަމެއް ނުވަތަ ނޫން ކަމެއް އެ އޮފީހުން އަދި ނުބުނެ އެވެ.
ތަފްސީލު - ރައީސް އޮފީހުން ރޭ ޝާއިއު ކުރި ލިޔުމުގައި ރައީސްގެ މި ދަތުރާ ގުޅޭ ބައެއް ކަންކަމަަށް އަލިއަޅުވާލާފައިވެ އެވެ. އެ ގޮތުން:
ރާއްޖޭގެ ފަތުރުވެރިކަމުގެ ކެމްޕެއިން ފެށި ފުޓުބޯޅަ މެޗު (ލިވަޕޫލް އާއި އެވަޓަން ކުޅުނު މެޗް) އެމަނިކުފާނު ބައްލަވާލެއްވި
ލިވަޕޫލްގެ އަކްސާ ޓްރެއިނިންގް ސެންޓަރަށް ޒިޔާރަތްކުރައްވައި، އެންމެ މަތީ ފެންވަރުގައި ފުޓުބޯޅައިގެ ތަމްރީނާއި ކޯޗިންގްގެ ކަންކަން ކުރިއަށް ގެންދާ ގޮތް ބައްލަވާލެއްވި
ރައީސްގެ މި ދަތުރުގައި އިނގިރޭސީވިލާތުގައި ތިބި ބައެއް ދިވެހި ދަރިވަރުންނާ ވެސް ބައްދަލު ކުރެއްވި އެވެ. އެ ބައްދަލުކުރެއްވުމުގައި ދަރިވަރުންގެ ތަޢުލީމީ ކަންކަން ކުރިއަށްދާ ގޮތާއި ދަރިވަރުންގެ ތަޖުރިބާތަކާއި ގުޅޭގޮތުން ރައީސް މަޝްވަރާ ކުރެއްވި ކަމަށް ރައީސް އޮފީހުން ބުންޏެވެ. އަދި މަތީ ތަޢުލީމް ހާސިލްކުރަމުންދާ ދަރިވަރުންނަށް ކުރިމަތިވާ ދަތިތައް ހައްލުކޮށްދެއްވުމުގައި ސަރުކާރުން ހައްސަ ސަމާލުކަމެއް ދެއްވާނޭކަމުގެ ޔަގީންކަން އެމަނިކުފާނު އެ ދަރިވަރުންނަށް ދެއްވި އެވެ.
ރައީސް އޮފީހުން އިތުރަށް ބުނީ:
ލިވަޕޫލްއާއެކު ހެދި އެއްބަސްވުމުގެ ދަށުން މިދިޔަ މަހު 27އިން ވިޒިޓް މޯލްޑިވްސް އިން ވަނީ އިނގިރޭސިވިލާތުގައި ފުޅާ ދާއިރާއެއްގައި އައުޓްޑޯ ކެމްޕެއިނެއްވެސް ފަށާފައި
ތިން މަސް ދުވަހުގެ މި ކެމްޕެއިންގެ ދަށުން އިނގިރޭސިވިލާތުގެ އިސްތިރާޖީ ބައެއް ސަރަހައްދުތަކުގައި އައުޓްޑޯ އަދި ޑިޖިޓަލް އެޑްވަޓައިޒިންގެ މަސައްކަތްތައް ކުރިއަށްގެންދިއުމަށް ވަނީ ހަމަޖެހިފައި
އެގޮތުން ލަންޑަންގެ 100 ޓެކްސީ، ބަސްތަކާއި ލަންޑަން އަންޑަރގްރައުންޑް، ވައިގެބަނދަރުތައް، އަދި ބިޒްނަސް ކްލާސް ލައުންޖުތަކުގައި ވިޒިޓް މޯލްޑިވްސް ބްރޭންޑް ގިނަ އަދަދެއްގެ ބަޔަކަށް އިޝްތިހާރުކުރެވިގެންދާނެ
"އޭގެ އިތުރުން ޕްރިމިއާ ލީގް މެޗުތައް އެންފީލްޑްގައި ކުޅޭ ދުވަސްތަކުގައި، ސްޓޭޑިއަމްގައި ލެޑް ސައިނޭޖް ދައްކައި، ލިވަޕޫލް އެފް.ސީގެ ރަސްމީ ލުއިފޮތްތަކާއި ޔޫރަޕުގެ އެކި ސަރަހައްދުތަކުގައި ހުންނަ ބިލްބޯޑުތަކުގައި ރާއްޖޭގެ ބްރޭންޑް އިޝްތިހާރުކޮށް، ބައިނަލްއަގުވާމީ ފެންވަރެއްގައި ފަތުރުވެރިކަން ކުރިއަރުވަން މަސައްކަތްކުރާނެ،" ރައީސް އޮފީހުން ބުންޏެވެ.
މި ދަތުރުގައި ރައީސްއާއެކު ޓޫރިޒަމް މިނިސްޓަރު ތޯރިގް އިބްރާހިމް އާއި ސްޕޯޓްސް މިނިސްޓަރު އަބްދުﷲ ރާފިއު އަދި އެމްއެމްޕީއާރުސީގެ އެމްޑީ އިބްެރާހިމް ޝިއުރީ އާއި ސަރުކާރުގެ އެހެން ބައެއް އިސްވެރިން ބައިވެރިވެވަޑައިގެންނެވި އެވެ.
އަރުޝީފަށް ނެގީ
އެންމެފަހުން އަޕްޑޭޓްކުރީ