ހުކުރު ދުވަހު މާލޭ ގެއެއްގެ ތެރޭގައި ހަބަރުހުސްވެފައި އޮއްވާ ފެނުނު މީހާ މަރުވީ، ކަރަންޓު ކޭބަލެއް ވަގަށްނަގަން އުޅުމުގެ ތެރޭގައި ކަމަށް ދިވެހި ފުލުހުންގެ ހިދުމަތުން ބުނެފިއެވެ.
މިކަން ހާމަކޮށް، ފުލުހުން މީޑިއާތަކަށް ފޮނުވި މެސެޖެއްގައި ބުނީ، ޖޫން މަހުގެ 30 ވަނަ ދުވަހު، ހެންވޭރު ގެއެއްގެ ތެރޭގައި ޚަބަރު ހުސްވެފައި އޮއްވާ ފެނުނު މީހާއަކީ އެގެއިން ކަރަންޓް ކޭބަލެއް ވަގަށް ނެގުމަށް އެގެއަށް ވަދެ އުޅުނު މީހެއް ކަމަށްވާއިރު، އޭނާ މަރުވެފައި ވަނީ ކަރަންޓް ކޭބަލް ބުރިކުރަން އުޅުމުގެ ތެރޭގައި ކަރަންޓްގައި ޖެހިގެން ކަމަށް ފުލުހުންގެ ތަހްގީގަށް ބެލެވޭ ކަމަށެވެ.
ފުލުހުން ބުނީ، މަރުވެފައިވާ މީހާގެ ހަށިގަނޑުން ކަރަންޓްގައި ޖެހިފައި ހުރިކަމުގެ ނިޝާންތައް ފެންނަން ހުރި ކަމަށާއި، އޭނާ ބިންމައްޗަށް ވެއްޓިފައި އޮތް ތަނުން ވައްކަން ކުރަން ބޭނުން ކުރާ އާލާތްތައް ފެނިފައިވާ ކަމަށެވެ.
ފުލުހުން އެފަދައިން ބުނެފައިވާއިރު، ބައެއް މީޑިއާތަކުން ރިޕޯޓުކޮށްފައިވާގޮތުގައި، މަރުވެފައި އޮއްވާ އެ މީހާ ފެނުނީ ހ. ހާޅަލަމާގެ ގްރައުންޑް ފްލޯއިންނެވެ. އޭނާ މަރުވެފައި އޮތީ އެ ގެއަށް ވަންނަ ދޮރު ބުޑުގަ ކަމަށާއި، އެ ގެއަށް އޭނާ ވަނީ މީހުން ހުކުރަށް ދިޔަ ވަގުތު ބަލާފަ ކަމަށް ވެސް ބައެއް މީޑިއާތަކުން ރިޕޯޓުކޮށްފައިވެއެވެ.