އިންޑިއާގެ ހުޅަނގު ބެންގާލްގެ ކޮލްކަތާގައި ނިޕާ ވައިރަސް ފެތުރެމުންދާ ކަމުގެ ރިޕޯޓްތަކާ ގުޅިގެން، ހޮންކޮންގުގެ ސިއްހީ އިދާރާތަކުން ރައްކާތެރިކަމުގެ ފިޔަވަޅުތައް ވަރުގަދަކޮށް ބަލި ފެތުރޭ ސަރަހައްދުތަކުން އަންނަ މީހުން ސްކްރީން ކުރަން ފަށައިފިއެވެ. ކޮލްކަތާގެ ހޮސްޕިޓަލަކުން މި މަހުގެ މެދެއްހާ ހިސާބުން ފެށިގެން ނިޕާ ވައިރަސްގެ ފަސް ކޭހެއް ފެނިފައިވާއިރު، މި ކްލަސްޓާގައި ހިމެނެނީ ބޮޑަށް ހޮސްޕިޓަލުގެ ތެރޭގައި ބަލި ފެތުރިގެން އިންފެކްޓްވި ސިއްހީ ޚިދުމަތްތެރިންނެވެ. މި ބައްޔާ ގުޅިގެން އިންޑިއާގައި މިހާތަނަށް 100 އެއްހާ މީހުން ކަރަންޓީނުކޮށް ޓެސްޓުކޮށްފައި ވީނަމަވެސް، އެއްވެސް މީހަކު މަރުވި ކަމުގެ ރިޕޯޓެއް އަދި ލިބިފައެއް ނުވެއެވެ. މި ބައްޔާ ގުޅިގެން އިންޑިއާގައި މިހާތަނަށް 100 އެއްހާ މީހުން ކަރަންޓީނުކޮށް ޓެސްޓުކޮށްފި -- ފޮޓޯ: އޭޕީ ހޮންކޮންގުގެ ސެންޓަރ ފޯ ހެލްތު ޕްރޮޓެކްޝަން (ސީ.އެޗް.ޕީ) އިން ބުނީ، ދުނިޔޭގެ ސިއްހަތު ޖަމިއްޔާއާއި އިންޑިއާގެ ސިއްހީ އިދާރާތަކާ ގުޅިގެން މި ބައްޔާ ބެހޭ އިތުރު މައުލޫމާތު ހޯދަމުންދާ ކަމަށެވެ. އަދި ބަލީގެ އަލާމާތްތައް ހުންނަ ދަތުރުވެރިން ވަގުތުން ހޮސްޕިޓަލަށް ރިފާ ކުރުމުގެ އިންތިޒާމްތައް ހަމަޖައްސާފައިވީ ނަމަވެސް، މިހާތަނަށް ހޮންކޮންގުން މި ބަލީގެ އެއްވެސް ކޭހެއް ފެނިފައިނުވާ ކަމަށް އެ އިދާރާއިން މައުލޫމާތުދެއެވެ. ނިޕާ ވައިރަހަކީ މޭވާކާ ވާލުގެ ފަރާތުން ޖަނަވާރުންނާއި އިންސާނުންނަށް ޖެހޭ ބައްޔެއް ކަމަށްވާއިރު، މިއީ އާންމުކޮށް ވާލުގެ ކުޅު ނުވަތަ ކުޑަކަމުދާ އެއްޗެހި ތަޣައްޔަރުވެފައިވާ ކާބޯތަކެތީގެ ޒަރީއާއިން ފެތުރޭ ބައްޔެކެވެ. މީގެ އިތުރުން، ބަލިޖެހިފައިވާ މީހުންގެ ހަށިގަނޑުން ބޭރުވާ ދިޔާ އެއްޗެހީގެ ސަބަބުން އިންސާނުންގެ މެދުގައިވެސް މި ބަލި ފެތުރެއެވެ. މި ބަލީގެ އަލާމާތްތަކުގެ ތެރޭގައި ހުން އައުމާއި، ބޮލުގައި ރިއްސުމާއި، ހޮޑުލެވުމާއި، ކަރުގައި ރިއްސުން ހިމެނެއެވެ. ބަލި ބޮޑުވާ ހާލަތްތަކުގައި ނިއުމޯނިއާ ޖެހުމާއި، ސިކުނޑި ދުޅަވުމާއި، ފުރާނައަށް ނުރައްކާވުން އެކަށީގެންވާއިރު، މި ބަލީގައި މަރުވާ ރޭޓަކީ 40 އިންސައްތައާއި 75 އިންސައްތައާ ދެމެދުގެ މިންވަރެކެވެ. ހޮންގްކޮންގްގެ ސީ.އެޗް.ޕީގެ ކޮންޓްރޯލާ ޑރ. އެޑްވިން ސުއީ ވިދާޅުވީ، ކޮލްކަތާއާއި ހޮންކޮންގާ ދެމެދު ސީދާ ފްލައިޓްތައް ނެތް ނަމަވެސް، ރައްކާތެރިކަމުގެ ފިޔަވަޅެއްގެ ގޮތުން އިންޑިއާއިން އަންނަ ފަސިންޖަރުންގެ ހުން ބެލުމުގެ ކަންކަން އެއާޕޯޓުގައި ވަރުގަދަ ކޮށްފައިވާ ކަމަށެވެ. އަދި ބަލި ދެނެގަތުމަށް ބޭނުންވާ ޓެސްޓުތައް ހެދުމުގެ ގާބިލްކަން ހޮސްޕިޓަލްތަކުގައި އެބަހުރި ކަމަށްވެސް އޭނާ ވިދާޅުވިއެވެ. މި ބައްޔަށް ވަކި ޚާއްސަ ފަރުވާއެއް ނުވަތަ މެޑިކޭޝަނެއް އަދި ހޯދިފައެއް ނުވާއިރު، ބަލި ޖެހޭ މީހުންނަށް ދެވެނީ ހަމައެކަނި ސަޕޯޓިވް ކެއާ ނުވަތަ އަލާމާތްތަކަށް ދެވޭ ފަރުވާއެވެ. ބަލީގެ އަލާމާތްތައް އާންމުކޮށް ފެންނަން ފަށަނީ ބަލި ޖެހޭތާ 4 ދުވަހާއި 14 ދުވަހާ ދެމެދުގައި ނަމަވެސް، ބައެއް ހާލަތްތަކުގައި 45 ދުވަސް ފަހުންވެސް އަލާމާތްތައް ފެނިދާނެއެވެ. ރައްކާތެރިކަމުގެ ފިޔަވަޅެއްގެ ގޮތުން، ބަލި ފެތުރޭ ސަރަހައްދުތަކަށް ދަތުރުކުރާ މީހުން ވާލާއި އޫރު ފަދަ ޖަނަވާރުންނާ ދުރުހެލިވުމަށާއި، ރޯ މޭވާއާއި ޖޫސް ފަދަ ތަކެތި ނުބުއިމަށް ސިއްހީ އިދާރާތަކުން އިލްތިމާސްކުރެއެވެ. އަދި މޭވާ ކެއުމުގެ ކުރިން ރަނގަޅަށް ދޮވެ ތޮށިމަށައިގެން ބޭނުންކުރުމަށާއި، އާންމު ސާފުތާހިރުކަމަށް ސަމާލުކަން ދިނުމަށްވެސް ވަނީ އިރުޝާދު ދީފައެވެ. ހޮންކޮންގުގެ ސިއްހީ އިދާރާތަކުން ބުނީ، އިންޑިއާގެ ހާލަތު ވަރަށް ގާތުން މޮނިޓާ ކުރަމުންދާނެ ކަމަށާއި، ހާލަތަށް ބަލައި އިތުރު ފިޔަވަޅުތައް އަޅަންޖެހިއްޖެ ނަމަ އެކަން ކުރަމުންދާނެ ކަމަށެވެ.