ކުރިއަށް އޮތް ރިޔާސީ އިންތިހާބަކީ އޭނާގެ ފަހަރު ކަމަށާއި މިފަހަރު އެއްވެސް ބޭފުޅެއްގެ ފަހަތަށް އެރުމެއް ނެތް ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެ އެވެ.
އުމަރު މިހެން ވިދާޅުވެފައިވާ އިރު, އޭނާ އިސްވެ ހުންނަވައިގެން އުފެއްދި އިސްލާހީ ހަރަކާތް, ދިވެހި ގައުމީ ހަރަކާތް (ޑީއެންއޭ) އިން ވަނީ ރިޔާސީ އިންތިހާބަށް ކެނޑިޑޭޓަކު ނެރުމަށް ނިންމައިފަ އެވެ. އެގޮތުން އުމަރު ނަސީރާއި އިތުރު ދެ ބޭފުޅަކު އެކަމަށް ވަނީ ޝައުގުވެރިކަން ފާޅުކުރައްވައިފަ އެވެ.
ޓީވީ ޗެނަލެއްގައި ވާހަކަދައްކަވަމުން އުމަރު ވިދާޅުވީ, 2023 ވަނަ އަހަރު ބާއްވާ ރިޔާސީ އިންތިހާބުގައި ވާދަކުރައްވާނީ އަމިއްލަ ކެނޑިޑޭޓެއްގެ ގޮތުގައި ކަމަށާއި ސިޔާސީ ޕާޓީއަކުން ވާދަކުރެއްވުމުގެ ވިސްނުމެއް އަދި ނުގެންގުޅުއްވާ ކަމަށެވެ.
އަދި އޭނާއަކީ މީގެ 15 އަހަރު ކުރިން 5,000 މެމްބަރުންނާއެކު ޕާޓީއެއް އުފައްދަވައިގެން ހިންގެވި ބޭފުޅެއް ކަމަށާއި މިހާރު ޕާޓީއެއް އުފައްދައިފިނަމަ, 10,000 މެމްބަރުންވެސް ތިބޭނެ ކަމަށް ވިދާޅުވި އެވެ.
ކުރީގެ ރައީސް އަދި އިދިކޮޅު މައި ލީޑަރު އަބްދުالله ޔާމީން އެދިވަޑައިގެންފި ނަމަ ޕީޕީއެމުގެ ޓިކެޓުގައި ރިޔާސީ އިންތިހާބުގައި ވާދަކުރައްވާނަންތޯ ޕްރެޒެންޓަރު ސުވާލު ކުރުމުން އުމަރު ވިދާޅުވީ, މިފަހަރު އެއްވެސް ބޭފުޅެއްގެ ފަހަތަށް އެރުމެއް ނެތް ކަމަށެވެ.
“އެއްވެސް ބޭފުޅެއްގެ ފަހަތަކަށް ނާރާނަން. މިއީ އަޅުގަނޑުގެ ފަހަރު. މިއީ އަޅުގަނޑު ކެނޑިޑޭޓަކަށް ވާންޖެހޭ ފަހަރު. މިފަހަރު އެއްވެސް ބޭފުޅެއްގެ ފަހަތަކަށް އެރުމެއް ނެތް. އެއީ ޔާމީންކަމުގައިވިޔަސް. އެހެން ބޭފުޅަކަށް ވިޔަސް,“ އުމަރު ވިދާޅުވި އެވެ.
އޭނާ ވިދާޅުވީ, ކުރިއަށް އޮތް ރިޔާސީ އިންތިހާބުގައި ރައީސް އިބްރާހިމް މުހައްމަދު ސޯލިހު ބޮޑުތަނުން ބަލިވާނެ ކަމަށެވެ. އަދި އެމްޑީޕީއަށް ވެރިކަން ލިބޭނެ އެއްވެސް ގޮތެއް ނޯންނާނެ ކަމަށްވެސް ވިދާޅުވި އެވެ.