ގއ. ގެމަނަފުށްޓަށް ކަރަންޓް ދިނުމަށް ބޭނުން ކުރަމުން އަންނަ އިންޖީނުގެ ޕެނަލް ބޯޑަށް މައްސަލަ ދިމާވެ އެރަށުން ގިނަ ވަގުތަށް ކަރަންޓު ކެނޑޭތާ ދެ ދުވަސް ވެފައިވާ ކަމަށް އެ ރަށު ކައުންސިލުން ބުނެފި އެވެ.
ވީނިއުސްއަށް މައުލޫމާތު ދެއްވަމުން ގެމަނަފުށީ ކައުންސިލްގެ ރައީސް އަބްދުﷲ ޝިޔާން ވިދާޅުވީ އިއްޔެ ހެނދުނު 8:30 އިން ފެށިގެން ހަ ގަޑިއަރަށް ކަރަންޓު ކެނޑިފައިވާ ކަމަށާއި މިއަދުވެސް ހެނދުނު 7:30 ހާއިރު ކަރަންޓު ދިޔަ ގޮތަށް އައީ މެންދުރު 2:00 ހާއިރު ކަމަށެވެ.
"އިއްޔެވެސް މިއަދުވެސް މިވަނީ ކަރަންޓު ގޮސްފައި ހައެއްކަ ގަޑިއަރަށް. އިންޖީނުތަކުގެ ޕެނަލް ބޯޑަށް ދިމާވެގެން އުޅޭ މައްސަލައެއް ކަަމަށް މި ބެލެވެނީ،" އޭނާ ވިދާޅުވި އެވެ.
ޝިޔާން ވިދާޅުވީ އިންޖީނަށް ދިމާވި މައްސަލަ ހައްލު ކުރުމަށް މާލެއިން ޓީމެއް އެ ރަށަށް ގޮސް މިހާރު މަސައްކަތް ފަށާފައިވާ ކަަމަށެވެ.
ޝިޔާން ވިދާޅުވީ މިހާރު އެ ރަށުގައި ބޭނުން ކުރަނީ "24 ގަޑިއިރު ކަރަންޓް ޔަގީން" މަޝްރޫއުގެ ދަށުން އެކި ރަށްރަށަށް ސަރުކާރުން ދޫކުރު ޖަނެރޭޓަރު ތަކުގެ ތެރެއިން ޖަނެރޭޓަރެއް ކަމަށެވެ. ނަަމވެސް އެއީ ސެކަންޑް ހޭންޑް ޖަނެރޭޓަރެއްކަން އެނގިފައިވާ ކަަމށް އޭނާ ވިދާޅުވި އެވެ.
އޭނާ ވިދާޅުވީ ކަރަންޓު ކެނޑުމާއި ގުޅިގެން ރައްޔިތުންނަށް ބޮޑެތި ދަތިތަކާއި ކުރިމަތިވާ ކަމަށެވެ. އަދި ކަރަންޓް ކަނޑާލުމުގެ ކުރިން އިއްޔެ ނޯޓިސް ދިން ނަމަވެސް މިއަދު ނޯޓިސް ދީފައި ނުވާ ކަމަށް ޝިޔާން ވިދާޅުވި އެވެ.