ޕީޕީއެމްގެ ރިޔާސީ ރޭސް ކާމިޔާބުކުރެއްވުމަށް ނުކުންނެވީ ވެރިކަމާ "ބަގުޑި ބައްދާކަށް" ނޫން ކަމަށާއި އެ ޕާޓީގެ ރިޔާސީ ޓިކެޓަށް ވާދަކުރެއްވުމަށް އޭނާއަށް ވުރެ އެކަށީގެންވާ ބޭފުޅަކު ނިކުންނަވައިފި ނަމަ "ފަހަތަށް" އަދި "އަރިމައްޗަށް" ވެސް ޖެހިވަޑައިގަންނަވަން ތައްޔާރު ކަމަށް ޕީޕީއެމްގެ ޕްރައިމަރީގައި ވާދަކުރައްވާނެކަމަށް މިހާތަނަށް އިއުލާންކުރައްވާފައިވާ އުމަރު ނަސީރު މިރޭ ވިދާޅުވެއްޖެ އެވެ.
އުމަރުގެ ރިޔާސީ ޕްރައިމަރީގެ ކެމްޕޭން ލޯންޗްކުރުމަށް އާޓިފިޝަލްބީޗުގައި ބޭއްވި ޖަލްސާގައި އޭނާ ވަނީ ވެރިކަން ލިބިވަޑައިގެންފިނަމަ، އިސްކަން ދެއްވާނެ ކަންކަން އިއުލާންކުރައްވައިފަ އެވެ. އުމަރު ވިދާޅުވީ އޭނާގެ ވެރިކަމެއްގައި އެންމެ އިސްކަމެއް ދެއްވާނީ ގައުމު އަމާންކޮށް، ތަރައްގީ ހޯދައި ދެއްވުމަށް ކަމަށެވެ.
އޭނާގެ ކެމްޕޭން ރަސްމީކޮށް ފެށުމަށް ބޭއްވި މި ޖަލްސާގައި ޕީޕީއެމްގެ ރައީސް މައުމޫން އަބްދުލް ގައްޔޫމްގެ އަނބިކަނބަލުން ނަސްރީނާ އިބްރާހީމްގެ ބޭބެ އިލްޔާސް އިބްރާހީމް ބައިވެރިވެވަޑައިގެންނެވި އެވެ. ކުރިން އަޑުފެތުރިފައި އޮތީ އުމަރާއެކު ރިޔާސީ ރޭހަށް އިލްޔާސް ނުކުންނަވާކަން މިރޭ އިއުލާންކުރައްވާނެ ކަމަށެވެ. އެހެން ނަމަވެސް މި ޖަލްސާގައި އިލްޔާސް ވާހަކައެއް ނުދައްކަވަ އެވެ. އަދި އިލްޔާސްއާ ގުޅޭ ގޮތުން އުމަރު ވެސް މާގިނަ ވާހަކަތަކެއް ނުދައްކަވައި ވިދާޅުވީ އޭނާއެކު ތަޖުރިބާ ހުރި ބޭފުޅުން ނެތް ކަމަށް ދައްކަވާ ވާހަކަތަކަކީ ދޮގެއް ކަމަށެވެ.
އުމަރުގެ ކެމްޕޭނުގައި އިލްޔާސް ނުކުންނަވާނެ ކަން ނުވަތަ ނޫންކަން މިރޭ އިއުލާން ނުކުރި ނަމަވެސް އުމަރުގެ ކެމްޕޭން ލަވައިގެ ގޮތުގައި، މިރޭގެ ޖަލްސާގައި ޖެހި ލަވައިގައި ވަނީ، ގައުމަށް ތަރައްގީ ހޯދުމުގައި އިލްޔާސް އާއި އުމަރަށް ތާއީދުކުރުމަށް އެދިފަ އެވެ.
ޕްރައިމަރީގައި ވަކި ހިސާބަކުން އުމަރު ފަހަތަށް ޖެހިވަޑައިގަތުމަށް ފަހު ޕްރައިމަރީގައި ފެންނާނީ އިލްޔާސް ކަމަށް އުމަރުގެ ފަޅީގެ އިސްބޭފުޅުން ވިދާޅުވަމުން ގެންދެވި ނަމަވެސް އިލްޔާސް ވިދާޅުވަނީ ޕްރައިމަރީ އަށް ކުރިމަތިލެއްވުމުގެ އެއްވެސް ޝައުގުވެރިކަމެއް އަދި ނެތް ކަމަށެވެ. އެކަމަކު އޭނާ ވިދާޅުވެފައި ވަނީ އެކަމަށް ގޮތެއް ނިންމަވާނީ އެންމެ ފަހު ވަގުތު ކަމަށެވެ.
މިރޭ ޖަލްސާގައި އުމަރު ވިދާޅުވީ ޕްރައިމަރީގައި ވާދަކުރެއްވި ނަމަވެސް އޭނާ އެއްކައިރިއަށް ޖެހިވަޑައިގަންނަވަން ޖެހޭ ހާލަތެއް އަތުވެއްޖެނަމަ ފަސްޖެހުމެއް ނެތި އެކަން ކުރައްވާނެ ކަމަށެވެ. މިސާލެއްގެ ގޮތުން އުމަރު ވިދާޅުވީ ފުޓްބޯޅަ މެޗެއްގައި ބޯޅަ ޕާސްކުރަމުން ގޮސް، ޓީމުގެ ކެޕްޓަން ލަނޑުޖެހުން ލާޒިމެއް ނޫން ކަމަށެވެ. އަދި ލަނޑު ޖަހާނީ ކުޅުންތެރިންގެ ތެރެއިން އެ ނަސީބު ލިބޭ މީހެއް ކަމަށް ވެސް އޭނާ ވިދާޅުވި އެވެ.
"އަޅުގަނޑު މިހިރީ ކަމަށް އެކަށީގެންވާ ގާބިލް ބޭފުޅުން ނުކުމެވަޑައިގަތީމަ ކުރިއަށް ޖެހެން ޖެހިއްޖިއްޔާ ކުރިއަށް، ފަހަތަށް ޖެހެން ޖެހެންޏާ ފަހަތަށް، އަރިމައްޗަށް ޖެހެން ޖެހެންވިއަސް ތައްޔާރަށޭ އުމަރު ނަސީރު މިހިރީ. އަޅުގަނޑު މިއުޅެނީ ރައީސުލް ޖުމްހޫރިއްޔާ ކަމުގެ މަގާމާ ހަވާލުވެ ތީމުގޭ ސްވިމިންޕޫލަށް ނޭރިގެނެއް ނޫނޭ އިނގޭތޯ،" އުމަރު ވިދާޅުވި އެވެ.
ކެމްޕޭނުގެ ވަކި ހިސާބަކުން އުމަރު ފަހަތަށް ޖެހިވަޑައިގަތުމަށް ފަހު އިލްޔާސް ޕްރައިމަރީ އަށް ނުކުންނަވާނެ ކަމަށް އުމަރުގެ އިސް ސަޕޯޓަރުން ދައްކާ ވާހަކަތަކަށް، އުމަރުގެ މި ވާހަކައިން ބާރު ލިބެ އެވެ. އުމަރު ފަޅީގެ އިސް ފަރާތްތަކުން ބުނަނީ ކެމްޕޭނުގެ ވަކި ހިސާބަކުން އުމަރު ނުކުންނަވާނީ އިލްޔާސްގެ ރަނިންމޭޓެއްގެ ގޮތުގައި ކަމަށެވެ.
އުމަރު ވިދާޅުވި ގޮތުގައި ކޮންގްރެސް ކާމިޔާބުކުރުމަށްޓަކައި އެކުލަވާލި "ޓީމް އުމަރު" ގެ ބަދަލުގައި ޕްރައިމަރީގައި އޭނާގެ ޓީމުގެ ނަމަކީ "އަމާންކަން ގާއިމްކުރާ ޓީމެ"ވެ. އެ ޓީމުގެ އެންމެ ފުރަތަމަ ވައުދަކީ ގައުމަށް އަމާންކަން ހޯދައިދިނުން ކަމަށް އުމަރު ވިދާޅުވި އެވެ.
އުމަރުގެ ކެމްޕޭން ލޯންޗުކުރުމަށް ޕީޕީއެމްގެ ކުލައިގެ ފޮތިތަކުން މުޅި ސަރަހައްދު ޒީނަތްތެރިކޮށްފައި އޮތްއިރު، މެދުގައި ހުރީ އުސް އިމާރާތްތަކާއި ދީނީ ބިނާތަކުގެ ކުރެހުންތަކެވެ. އެ ކުރެހުންތަކަށް އިޝާރާތްކުރައްވައި އުމަރު ވިދާޅުވީ، އޭނާގެ ވެރިކަމެއްގައި ގައުމަށް ތަރައްގީ ގެންނަން ބޭނުންވާ ކަމަށެވެ. އޭނާ ނުވަތަ އޭނާގެ ޓީމުން ރިޔާސީ ރޭހަށް ވާދަކުރައްވާ ބޭފުޅަކަށް މެމްބަރުން ތާއީދުކުރުމަށް އެދިވަޑައިގެން ވިދާޅުވީ ގައުމަށް ތަރައްގީ ގެނެވޭނީ އަމަންއަމާންކަން ގާއިމްކޮށްގެން ކަމަށެވެ.
ރާއްޖޭގައި ކުށްކުރުން އާއްމުވެ ބޮޑެތި ޖަރީމާތައް ހިންގައި މީހުން މަރަމުންދާއިރު ވެސް އެކަށީގެންވާ ގޮތެއްގައި ހުކުމް ތަންފީޒުނުކުރެވޭކަމަށް ވިދާޅުވެ، އޭނާގެ ވެރިކަމުގައި އެކަން ހަގީގަތަކަށް ހައްދަވައިދެއްވާނެ ކަމަށް ވިދާޅުވި އެވެ. ކުށްވެރިންނަށް ހައްގު އަދަބު ދޭން ރާއްޖޭގެ ލީޑަރުން ވެސް ޖެހިލުންވެވަޑައިގަންނަވާ ކަމަށާއި ޖަލުތައް ބޮޑުކުރުމުގެ ވާހަކަ އާއި ކުށްވެރިންނަށް ކައުންސިލިންދޭ ވާހަކަތައް ސިޔާސީ ފަރާތްތަކުން ދައްކަވަނީ އެ ސަބަބަށްޓަކައި ކަމަށް ވިދާޅުވި އެވެ. އެހެން ނަމަވެސް އުމަރު ވިދާޅުވި ގޮތުގައި އެހެން ސިޔާސީ ބޭފުޅުންނާ އޭނާގެ ތަފާތަކީ ކުށްވެރިންނަށް ހައްގު އަދަބު ދިނުމަށް ހުކުމް ތަންފީޒު ކުރެއްވުމެވެ.
އެ މައުލޫއުގައި ހަރުކަށިކޮށް ވާހަކަ ދެއްކެވި އުމަރު ވިދާޅުވީ އޭނާގެ ހަށިގަނޑުގެ ބައެއް ބައިތައް ހުރީ "ދަނގަޑުން" ކަމަށެވެ. އެހެންކަމުން އޭނާ އަކީ ކަންކަންކުރެއްވުމުގައި ފަސްޖެހިވަޑައިގަންނަވާނެ ބޭފުޅެއް ނޫން ކަމަށް ވިދާޅުވި އެވެ.
ޕީޕީއެމްގެ ގިނަ އަދަދެއްގެ މެމްބަރުން ހާޒިރުވި ޖަލްސާގައި އުމަރު ވަނީ ރިޔާސީ ރޭހުގައި އޭނާއާ ވާދަކުރައްވާ ޕީޕީއެމްގެ ޕާލިމެންޓްރީ ގްރޫޕުގެ ލީޑަރު އަދި މުލަކު ދާއިރާގެ މެމްބަރު އަބްދުﷲ ޔާމީނަށް ރައްދު ދެއްވައިފަ އެވެ. ޕީޕީއެމްގެ ވެރިކަމެއްގައި ރާއްޖެ އިން ތެޔޮ ފެނޭތޯ މަސައްކަތް ކުރައްވާނެ ކަމަށް ވިދާޅުވެފައިވާތީ އެކަމަށް ފާޑުވިދާޅުވަމުން އުމަރު ވިދާޅުވީ އެކަހަލަ ވާހަކަތައް ޔާމީން ވެސް ދައްކަވަން ޖެހިވަޑައިގަންނަވާނީ އެއީ ރާއްޖޭގައި ކުރެވިދާނެ ކަމެއްތޯ ވިސްނެވުމަށް ފަހު އެވެ.
އުމަރު ވިދާޅުވީ ރާއްޖެއިން ތެޔޮ ނަގަން ޖެހޭނީ ކަނޑުގެ ފަސްގަނޑު އަޑި ފޫއަޅުވާލައި ލޯވަޅެއް އަޅައިގެން ކަމަށެވެ. އެ ލޯވަޅުގައި އެއްވެސް މައްސަލައެއް ޖެހިއްޖެ ނަމަ ތެޔޮ ލީކުވާނީ މުޅި ކަނޑަށް ކަމަށާއި އެއީ ގެއްލުން ހުރި ކަމެއް ކަމަށް އޭނާ ވިދާޅުވި އެވެ. އެކަމަކީ އޭގެ ސަބަބުން މުޅި ޓޫރިޒަމް ފުނޑުފުނޑުވެދާނެ ފަދަ ކަމެއް ކަމަށް އުމަރު ވިދާޅުވި އެވެ.
މިސާލެއްގެ ނަންގަވައި އުމަރު ވިދާޅުވީ ގަލްފް އޮފް މެކްސިކޯ އިން ތެޔޮ ނަގަން އުޅުމުގެ ތެރޭގައި ލޯވަޅުގައި މައްސަލަ ޖެހި ކަނޑަށް ގިނަ އަދަދެއްގެ ޔެތޮ ލީކުވި ކަމަށެވެ. އެ ތެޔޮ ހުއްޓުވާލެވުނީ ތިން މަސް ފަހުން ކަމަށް އުމަރު ވިދާޅުވި އެވެ.
"އެހެންވީމާ އަޅުގަނޑުގެ އަޙް އަބްދުﷲ ޔާމީނަށް ދަންނަވާނީ، ކޮބާހޭ މަނިކުފާނުގެ އިކޮނޮމިކް ޑައިރެކްޝަން އަކީ. ކޮން ސްޓްރެޓެޖީއެއްތޯ ބޭނުންކުރައްވަން ގަސްތުކުރައްވަނީ. ތިޔަ ވިދާޅުވަނީ އެއްފަރާތުން ޓޫރިޒަމްއާ މަސްވެރިކަން ކުރިއަރުވާ ވާހަކަ، އަނެއް ފަރާތުން ޓޫރިޒަމާއި މަސްވެރިކަން ފުނޑުފުނޑުވެދާނެ ފަދަ އިންޑަސްޓްރީއެއް ރާއްޖެ އަށް ގެންނަ ވާހަކަތޯއޭ ތިޔަ ވިދާޅުވަނީ،" އުމަރު ވިދާޅުވި އެވެ.
އޭނާ ވިދާޅުވި ގޮތުގައި ޕީޕީއެމްގެ ކެންޑިޑޭޓަކު ނުކުންނަން ޖެހޭނީ 2040 ވަނަ އަހަރާ ހަމައަށް ގައުމުގެ ތަސައްވަރު ކުރަހާލައިގެންނެވެ. އަދި ތަރައްގީވަމުން އަންނަ ޗައިނާ އާއި އިންޑިއާ އޮތީ ރާއްޖޭގެ ދޮރު ކުރިމަތީގައި ކަމަށްވުމުން އެ ދެ ގައުމުގެ ފައިދާ ފުރިހަމަ އަށް ނަގަން ޖެހޭ ކަމަށް ވެސް އުމަރު ވިދާޅުވި އެވެ.