ރައީސް ޔާމީން ބަލިކުރަން އެންމެ އެކަށީގެންވާ ލީޑަރަކީ ޖުމުހޫރީ ޕާޓީގެ ލީޑަރު ގާސިމް އިބްރާހިމް ކަމަށް އެ ޕާޓީގެ ނާއިބް ލީޑަރު އަމީން އިބްރާހިމް ވިދާޅުވެއްޖެއެވެ.
އަމީން މިހެން ވިދާޅުވީ ރައީސް އަބްދުﷲ ޔާމީންގެ ވެރިކަން ބަދަލު ކުރުމަށް، އިދިކޮޅު ކޯލިޝަންގެ ކެންޑިޑޭޓެއްގެ ގޮތުގައި ވާދަކުރުމަށް އެންމެ އެކަށީގެންވާ ބޭފުޅަކީ ކޮބައިތޯ ބެލުމަށް ރާއްޖެ ޓީވީން ކުރިއަށް ގެންދިޔަ ވޯޓުގައި ޖުމުހޫރީ ޕާޓީގެ ލީޑަރު ގާސިމް އިބްރާހިމް ކުރި ހޯދެއްވުމާއި ގުޅިގެން ކުރެއްވި ޓުވީޓެއްގައެވެ.
އަމީން ކުރެއްވި ޓުވީޓްގައި ވަނީ ވޯޓިން ޕޮޕިއުލޭޝެނެއްގެ އެންމެ 4 ވަރަކަށް ޕަސެންޓް ނިސްބަތްވާ ވޯޓެއްގައި ރައީސް ޔާމީން ބަލިކުރަން އެންމެ އެކަށީގެންވާ ލީޑަރަކީ ޖުމުހޫރީ ޕާޓީގެ ލީޑަރު ގާސިމް ކަމަށް ވޯޓް ލި މީހުންގެ %43 މީހުންނަށް ފެނުމަކުން މިއަދު ހައިރާން ނުވާ ކަމަށާއި އެއީ އެންމެން ގޮވައިގެން އުޅެވޭނެ އެންމެ އިތުބާރު ކުރެވޭ އެންމެ ކެރިސްމެޓިކް ލީޑަރުކަން ކުރިން ސާބިތު ކޮއްދީފައިވާތީ ކަމަށެވެ.
24 ގަޑިއިރަށް ދެމިގެންދިޔަ ރާއްޖެޓީވީގެ ޚިޔާލު ހޯދުމުގެ ވޯޓުން ރައީސް މައުމޫނަށް 2 އިންސައްތަ ވޯޓު ލިބިވަޑައިގަތްއިރު، ރައީސް ނަޝީދަށް ލިބިވަޑައިގެންނެވީ 25 އިންސައްތަ ވޯޓެވެ. އަދި ޝެއިޚް އިމްރާނަށް 30 އިންސައްތަ ވޯޓު ލިބިވަޑައިގަތްއިރު، ވޯޓުގެ އެންމެ ކުރީގައި 43 އިންސައްތައާއެކު އޮންނެވީ ޤާސިމް އެވެ.
މި ވޯޓުގައި ރައީސް ނަޝީދަށްވުރެ މަތިން އިމްރާނަށާއި ޤާސިމަށް ވޯޓު ލިބިވަޑައިގެންފައި މިވަނީ، އެމްޑީޕީގެ އެކްޓިވިސްޓުންނާއި އެޕާޓީގެ އިސް ބައެއް ބޭފުޅުން ރައީސް ނަޝީދު ހޮވުމަށްޓަކައި ވަރަށް ވަރުގަދައަށް މީސްމީޑިއާގައި ކެމްޕެއިން ކޮށްފައިވަނިކޮށްކަން ފާހަގަކޮށްލެވެއެވެ.
މި އަހަރު ބާއްވާ ރިޔާސީ އިންތިހާބުން ރައީސް ޔާމީން ބަލިކުރުމަށް ނެރެން ޖެހޭނެ ކެންޑިޑޭޓަކީ ރައީސް ނަޝީދު ކަމަށް އެމްޑީޕީން ބުނަމުންދާއިރު، އެކަމާއި އިދިކޮޅު ސިޔާސީ ގިނަ ފަރާތްތަކުން ދެކޮޅު ހަދައެވެ. މިކަމުގެ ސަބަބުން ރައީސް ޔާމީން ވެރިކަމުން ދުރުކުރުމަށް ކަމަށް ބުނެ އުފެއްދި އިދިކޮޅު ކޯލިޝަނަށް، އިންތިޚާބުގައި ވާދަކުރައްވާނެ ކެންޑިޑޭޓެއް މިހާތަނަށް ކަނޑައެޅިފައި ނުވަނީސް، ކޯލިޝަނުގެ ތެރޭގައި ދަނީ ބައިބައިވުން އުފެދެމުންކަން ފާހަގަކޮށްލެވެއެވެ.