ވިލާ ކުންފުނިން ހިންގާ ރިސޯޓެއް ކަމުގައިވާ ރޯޔަލް އައިލެންޑްގައި އުއްތަމަ ފަނޑިޔާރު އަހުމަދު މުއުތަސިމް އާއި، މަޖިލީހުގެ ނައިބު ރައީސް އަހްމަދު ނާޒިމް އާއި، މަޖިލީހުގެ ކުރީގެ ރައީސް މުހައްމަދު ޝިހާބާ އެކު ބައްދަލު ނުކުރައްވާ ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެއެވެ.
ގާސިމް މިހެން ވިދާޅުވީ، ރަޖިސްޓްރީ ނުކޮށް ހިންގާ އޮންލައިން ބްލޮގެއް ކަމަށް ވާ 'ދިޔަވަރު.ކޮމް' ގައި މި މަހުގެ 5 ވަނަ ދުވަހު ލިޔެފައިވާ ލިޔުމަކާ ގުޅިގެން އެ ފަރާތަށް ފިޔަވަޅު އެޅުމަށް ކަމާ ބެހޭ ފަރާތްތަކަށް ގޮވާލަމުންނެވެ.
ގާސިމް ވިދާޅުވީ، އެ ބްލޮގްގައި "ރޯޔަލް އައިލެންޑުގައި ރާއްޖޭގެ އުއްތަމަ ފަނޑިޔާރާއި މަޖިލީސް ނާއިބު ރައީސް އަހްމަދު ނާޒިމް ސުޕްރީމް ކޯޓު ފަނޑިޔާރުންނާ ދެކޮޅަށް ރޭވި ސިއްރު ރޭވުން" ނަމުގައި، އަޒީޒު އާމިރު ނަމުގައި ލިޔެފައިވާ އާޓިކަލަކީ އެއްވެސް ހަގީގަތެއް ނެތް ބުހުތާނު ވާހަކަތަކެއް ކަމަށެވެ. އެފަދަ ލިޔުންތައް ލިޔެ ޝާއިއުކުރާ މީހުންނަކީ ދޮގު ހަބަރު ފެތުރުމުގައި ހުރި ނުބައި ކަމާއި، ފާފަވެރިކަން އެނގި ތިބެ، މުޖުތަމައު ފަސާދަ ކުރުމުގެ ބޭނުމުގައި އެފަދަ އަމަލުތަައް ތަކުރާރުކޮށް ކުރާ މީހުން ކަމަށް ގާސިމް ވިދާޅުވިއެވެ.
އެ އާޓިކަލްގައި ހަގީގަތް ނެތް މިންވަރުގެ ފުރިހަމަ އެއް މިސާލަކީ، މިދިޔަ ޖެނުއަރީ މަހު، މާލެއިން ރޯޔަލް އައިލެންޑަށް އަހްމަދު ނާޒިމް ވަޑައިގެން އޭނާއާއި، އުއްތަމަ ފަނޑިޔާރާއި، މުހައްމަދު ޝިހާބު ބައްދަލު ކުރެއްވި ކަމަށް ލިޔެފައި ވުން ކަމަށް ގާސިމް ވިދާޅުވިއެވެ. ވިލާ ކުންފުނިން ހިންގާ ރިސޯޓެއް ކަމުގައި ވީ ނަމަވެސް ރޯޔަލް އައިލެންޑަށް ގާސީމް ވަޑައިނުގަންނަވާތާ ވެސް މިހާރު 3 އަހަރު ވެދާނެ ކަމަށް ވިދާޅުވިއެވެ.
އެންމެ ފަހުން ރޯޔަލް އައިލަންޑަށް ގާސިމް ވަޑައިގެންފައި ވާނީ 2022 ވަނަ އަހަރުގެ ފެބްރުއަރީ 5 ވަނަ ދުވަހު އޮތް ށ އަތޮޅު ކޮމަންޑޫ ދާއިރާގެ ރައްޔިތުންގެ މަޖިލީހުގެ ބައިއިލެކްޝަން ގައި ށ ކޮމަންޑޫ ދާއިރާއަށް ކުރި ދަތުރުގެ ތެރޭގައި ކަމަށް ވެސް ގާސިމް ވިދާޅުވިއެވެ. ހަމައެއާއެކު މުހައްމަދު ޝިހާބު ވެސް އަދި މިހާރުގެ އުއްތަމަ ފަނޑިޔާރު ވެސް ރޯޔަލް އައިލަންޑް ރިސޯޓަށް 2024 އަދި މި އަހަރުތެރޭ ވެސް އެއްވެސް ބޭނުމަކު ވަޑައިގެންފައި ނުވާ ކަމަށް ގާސިމް ވިދާޅުވިއެވެ.
އެހެންކަމުން، އޭނާއާއި، މުހައްމަދު ޝިހާބާއި އެމަނިކުފާނުގެ އާއިލީ ބޭފުޅެއް ކަމުގައިވާ މިހާރުގެ އުއްތަމަ ފަނޑިޔާރު މުއުތަސިމް އާއި، އަހްމަދު ނާޒިމު އާ ގުޅުވައިގެން ރައްޔިތުންގެ މެދުގައި ފިތުނަ އުފެދޭ ގޮތަށް އެއްވެސް ހަގީގަތެއް ނެތި ސިޔާސީ ބޭނުމުގައި ވަކި ބަޔަކު އޮންލައިން ނޫސްތަކުގައި ފަތުރާ އަދި ފަތުރަމުން ދާ މިފަދަ ދޮގު ވާހަކަތައް ހުއްޓުވައި ދިނުމަށް ކަމާބެހޭ ފަރާތްތަކަށް ގާސިމް ވަނީ ގޮވާލައްވާފައެވެ.
ނޫސްވެރިކަމާއި ހިޔާލު ފާޅުކުރުމުގެ މިނިވަން ކަމަކީ، ހަގީގަތެއް ނެތް ދޮގު ވާހަކަ ފަތުރާ ސިޔާސީ މަގްސަދުތައް ހާސިލް ކުރުމުގެ ބޭނުމުގައި މުޖުތަމައު ފަސާދަ ކުރުމަށް އޮތް ލައިސަންސެއް ކަމަށް ދެކި، މިފަދަ އަމަލުތައް ތަކުރާރު ކުރާ ފަރާތްތަކަށް ގާނޫނީ ފިޔަވަޅު އެޅިގެން ނޫނީ މިފަދަ ކަންކަން ހުއްޓުމަކަށް ނާންނާނެ ކަމަށް ގާސިމް ވިދާޅުވިއެވެ.