ސުޕްރީމް ކޯޓުގެ ކުރީގެ ފަނޑިޔާރު އަބްދުالله އަރީފްގެ ސޮއި ފޯޖުކޮށްގެން ގާނޫނީ ވަކީލުކަން ކުރުމުގެ ހުއްދަ ލިބިފައިވާ ކަމަށް ބުނާ ލިއުމެއް ތައްޔާރުކުރި މައްސަލައެއް ބާ ކައުންސިލުން ފުލުހަށް ހުށަހަޅައިފިއެވެ. ބާ ކައުންސިލުން މިއަދު ނެރުނު ބަޔާނެއްގައި ބުނީ، އެމްޕީއެލްގައި މަސައްކަތްކުރާ ލ. ފޮނަދޫ، ހަވޭލި, ފާތިމަތު ތޫބާ އަބްދުالله އަށް ދޫކޮށްފައިވާ ގާނޫނީ ވަކީލުކަމުގެ ހުއްދައަކީ އެ ކައުންސިލުން ދޫކުރި ހުއްދައެއްތޯ ބެލުމަށް އެމްޕީއެލުން ހުށަހެޅުމާ ގުޅިގެން ބެލުމުން، ބާ ކައުންސިލުން ތޫބާއަށް ގާނޫނީ ވަކީލުކަމުގެ ހުއްދަ ދޫނުކުރާކަން ފާހަގަކުރެވިފައިވާ ކަމަށެވެ. އިތުރަށް ބާ ކައުންސިލުން ބެލިބެލުމުން، ތޫބާއަށް ދޫކުރި ކަމަށް ބުނާ ވަކީލުކަމުގެ ހުއްދައަކީ ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަންގެ ނަމާއި ސުޕްރީމް ކޯޓުގެ ނަމާއި ލޯގޯ ބޭނުންކޮށްގެން 2020ވަނަ އަހަރު ގާނޫނީ ވަކީލެއްގެ ހައިސިއްޔަތުން މަސައްކަތްކުރުމުގެ ހުއްދައިގެ ގޮތުގައި ތައްޔާރުކޮށްފައިވާ ލިޔުމެއް ކަމަށް ވަނީ އެނގިފައެވެ. އަދި އެ ލިއުމުގައިވާ ސޮޔަކީ އެ ތާރީޚުގައި ސުޕްރީމް ކޯޓުގެ ފަނޑިޔާރުކަމުގައި ހުންނެވި ފަނޑިޔާރެއްގެ ސޮއެއް ނޫންކަން ފާހަގަކުރެވިފައިވާ ކަމަށް، އެ ކައުންސިލުން ބުންޏެވެ. އެ ކައުންސިލުން ބުނިގޮތުގައި ބާ ކައުންސިލްގެ ވަކީލުންގެ ދަފްތަރުގައި ތޫބާގެ ނަމެއް ނޯވެއެވެ. އަދި ކުރީގެ ފަނޑިޔާރު އަރީފްގެ ސޮއި ފޯޖްކޮށްގެން ސެޕްޓެމްބަރު 20، 2020ގައި ތޫބާ ތައްޔާރުކުރި ލިއުމުގެ ސައްހަކަން ކަށަވަރުކުރުމަށް ޓަކައި އެ ކައުންސިލުން ބެލިބެލުމުން ތޫބާއަށް ވަކީލުކަމުގެ ހުއްދަ ދޫކޮށްފައިނުވާކަން ކަށަވަރުކުރެވިފައިވާ ކަމަށް ވެސް، ބާ ކައުންސިލުން ބުންޏެވެ. އެހެންވެ، ބާ ކައުންސިލުން ވަނީ މި މައްސަލަ ބަލައިދިނުމަށް އެދި ފުލުހުންނަށް މައްސަލަ ހުށަހަޅައިފައެވެ. ސޮއި ފޯޖުކުރުމަކީ ގާނޫނީ ކުށެކެވެ. ރާއްޖޭގައި ގާނޫނީ ވަކީލެއްގެ ހައިސިއްޔަތުން މަސައްކަތްކުރުމުގެ ހުއްދަ ދީފައިވާ ވަކީލުންގެ ދަފްތަރު ބާ ކައުންސިލުގެ ވެބްސައިޓުން ފެންނަން އޮވެއެވެ. އެއާއެކު ބާ ކައުންސިލުން ވަނީ ޚިދުމަތްދޭ ނުވަތަ ދޭން ހުށަހަޅާ ފަރާތަކީ ހުއްދަ އޮތް ފަރާތެއްތޯ ކަށަވަރުކުރުމަށް އިލްތިމާސްކޮށްފައެވެ.