ޓެކްނިކަލް ޑައިވިންއަށް ހުއްދަ ދިނުމަށްޓަކައި ގާނޫނެއް ހެދުމުގެ ވިސްނުމެއް ސަރުކާރުގައި އެބައޮތް ކަމަށާއި، ކަމާ ގުޅުންހުރި ފަރާތްތަކާ މަޝްވަރާކުރަމުން އަންނަ ކަމަށް، ސަރުކާރުގެ އިސް ތަރުޖަމާނު މުޙައްމަދު ޙުސައިން ޝަރީފް (މުންދު) މިއަދު ވިދާޅުވެއްޖެއެވެ.އޭނާ މިހެން ވިދާޅުވީ ވ. އަލިމަތާ ކައިރީގައި އޮންނަ ކަނޑުއަޑީގެ ހޮހަޅައިގެ ތެރެއަށް ފީނި އިޓަލީގެ ޑައިވަރުންތަކެއް މަރުވި ހާދިސާގެ ކަންބޮޑުވުންތައް އޮތް ދަނޑިވަޅެއްގަ އެވެ.މިއަދު ބޭއްވި ނޫސްވެރިންގެ ބައްދަލުވުމެއްގައި މުންދު ވިދާޅުވީ ޓެކްރެކް ޑައިވިން ނުވަތަ ޓެކްނިކަލް ޑައިވިންއާ ގުޅޭ ގާނޫނެއް ރާއްޖޭގައި މިވަގުތު ނެތް ކަމަށެވެ. އެހެންވެ އެފަދަ ގާނޫނެއް ހެދުމުގެ ވިސްނުން ސަރުކާރުން އެބަ ގެންގުޅޭ ކަމަށާއި އެ މަޝްވަރާތައް ކުރަމުން އަންނަ ކަމަށެވެ. ގެއްލުނު އިޓަލީގެ ޑައިވަރުންތަކުގެ ހަށިތައް ހޮހޮޅައިން ނެގީ، ފިންލޭންޑުގެ އެކަމާ ގުޅޭ ހާއްސަ ޓީމަކުންނެވެ. އެ މީހުންގެ ހަށިތައް މިހާރު އިޓަލީއަށް ފޮނުވާލައި، ދެ ގައުމުން ވެސް އަންނަނީ އެ ހާދިސާއާ ގުޅޭ ތަހުގީގެއް މިހާރު ފަށާފަ އެވެ.ޑައިވަރުން ހޯދުމުގެ މަސައްކަތް ކުރަމުން ދަނިކޮށް މިދިޔަ ހަފުތާގެ ހޮނިހިރު ދުވަހު އެމްއެންޑީފްގެ އެންމެ ތަޖުރިބާކާރު ޑައިވަރުންގެ ތެރޭގައި ހިމެނޭ ސްޓާފް ސާޖަންޓް މުހައްމަދު މަހުދީ މަރުވެފަ އެވެ. މަހުދީ މަރުވުމުގައި އިހުމާލެއްވޭތޯ ބަލަން ދިވެހި ފުލުހުން ގެންދަނީ ތަހުގީގު ކުރަމުންނެވެ.