ރ. ރަސްމާދޫ ތަރައްޤީއަށް ކަނޑައަޅުއްވާފައިވާ މަޝްރޫޢުތައް މިއަހަރު ކުރިއަށް ގެންގޮސްދެއްވާނެކަމަށާއި، އެކަމުގައި ކަންބޮޑުވުމެއް ނުބޭއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެދިވަޑައިގެންފިއެވެ. އެމަނިކުފާނު މިކަމަށް އެދިވަޑައިގަތީ ރަސްމާދޫ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ރަސްމާދޫގެ ތަރައްޤީއަށް ވަރަށް ގިނަ ކަންކަން އެބަހުރިކަމަށާއި، އެ ހުރިހާ ކަމެއް ވަރަށް އަވަސްމިނުގައި ހަގީގަތަކަށް ހަދައިދޭނެކަމަށެވެ. މިއަހަރާއި އަންނަ އަހަރަކީ ރަސްމާދޫއާއި އެނޫންވެސް ރަށްރަށަށް ވެވަޑައިގެންފައިވާ ވަޢުދުތަކަށް އަމަލީ ސިފަ ގެންނާނެ ދެ އަހަރުކަމަށް ރައީސް ވިދާޅުވިއެވެ.
އެމަނިކުފާނުގެ ވާހަކަފުޅުގައި ފެނުގެ ނިޒާމު ރަސްމާދޫގައި ހުއްޓިފައިވާކަން ފާހަގަކުރައްވާ ވިދާޅުވީ އެ މަޝްރޫޢު ކުރިއަށްގެންދެވޭނެ ގޮތްތަކެއް މިހާރު ހަމަޖެހިފައިވާކަމަށާއި، އެ މަޝްރޫޢު ނިންމަވައިދެއްވާނެކަމުގެ ޔަޤީންކަން ދެއްވާކަމަށެވެ.
ރައީސުލްޖުމްހޫރިއްޔާ ރަސްމާދޫ ރައްޔިތުންނާ ބައްދަލުކުރެއްވުމަށް ބޭއްވެވި ބައްދަލުވުމުގައި ކައުންސިލްގެ ރައީސް މުޙައްމަދު އާސިފް ވަނީ ތިރީސް ހެކްޓަރުގެ އެރަށުން ބޮޑުބައެއް ގިރައިގެންގޮސްފައިވާކަމަށް ވިދާޅުވެ އެކަމުގެ ކަންބޮޑުވުން ފާޅުކުރައްވާފައެވެ. ޒަމާންވީ އެ މައްސަލައަށް މިހާތަނަށް ޙައްލެއް އައިސްފައިނުވާކަމަށް ކައުންސިލްގެ ރައީސް ވިދާޅުވިއެވެ.
އެ މައްސަލައަށް އަލިއަޅުއްވާލައްވާ ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ރައްޔިތުންގެ އެ ކަންބޮޑުވުމަށް އިސްކަމެއްދެއްވައިގެން ހައްލު ގެނެސްދެއްވާނެކަމަށެވެ. އަދި މޫދަށް އެރޭނެ ސަރަހައްދެއް ރަށުގައި ތަރައްޤީކޮށްދެއްވާނެކަމަށްވެސް ރައީސް ވިދާޅުވިއެވެ.
މިއަހަރުގެ ބަޖެޓުގައި އެންމެ އިސްކަންދެއްވާފައިވަނީ ބޯހިޔާވަހިކަމަށްކަން ފާހަގަކުރައްވަމުން ރައީސް ވިދާޅުވީ ބޯހިޔާވަހިކަމަށް އިސްކަންދެއްވީ އިޖުތިމާޢީ ހުރިހާ މައްސަލައިގެ އަސްލުކަމަށްވާތީކަމަށެވެ. އެހެންކަމުން ގެދޮރުވެރިކަމުގެ މަޝްރޫޢުގެ ދަށުން ރަސްމާދޫގައި ހައުސިންގ ޔުނިޓް އެޅުމުގެ މަޝްރޫޢުއެއް ގެންދަވާނެކަމަށް ވިދާޅުވިއެވެ.
"ތަޢުލީމީ ދާއިރާއަށް ބަލާއިރު ފަށާފައި ހުއްޓިފައިވާ މަޝްރޫޢުއެއް އެބައޮތް. 3 ބުރިއަށް ހަދާ ކްލާސްރޫމްތައް، އެ މަޝްރޫޢު ނިމުމުން ވަރަށް ގިނަ މައްސަލައަށް ހައްލު އެބަލިބޭ. އެކަމަށް ސަރުކާރުގެ ތެރެއިން މަސައްކަތްކުރާނަން. އަދި މާ އަވަހަށް އެ މަސައްކަތް ނިންމައިދޭނަން. އެކަމުގައި ކަންބޮޑުވުން ނުބޭއްވުމަށް އެދެން." ރައީސުލްޖުމްހޫރިއްޔާ ވިދާޅުވިއެވެ.
ރައީސް ވިދާޅުވީ، ސިއްޙީ މަރުކަޒަށް ޖާގަ އިތުރުކޮށްދީ ލެބޯޓްރީއެއްވެސް ރަސްމާދޫގައި ތަރައްޤީކޮށްދެއްވާނެކަމަށެވެ. އަދި ކުޅިވަރުގެ ދާއިރާއިން ފުޓުބޯޅަ ދަނޑަކާއި، ކުޅިވަރު ކުޅެވޭނެ އިޖުތިމާޢީ މަރުކަޒެއްވެސް ތަރައްޤީކުރުމަށް މިއަހަރު ފަށްޓަވާނެކަމަށް ރައީސް ވިދާޅުވިއެވެ.
މީގެ އިތުރުން ރަސްމާދޫއަކީ ފުލުހުންގެ ޚިދުމަތް ފަށާފައި ނުވާރަކަށްވާތީ، މިއަހަރުގެ އެންމެ ކުރީކޮޅު އެކަމަށް އިސްކަންދެއްވައި ފުލުހުންގެ މަރުކަޒެއް ޤާއިމްކޮށް ޚިދުމަތް ދިނުމަށް ނިންމަވާފައިވާކަމަށް ރައީސް ވިދާޅުވިއެވެ. އަދި ރަސްމާދޫގެ އެންޓަނާ އެހެން ސަރަހައްދަކަށް ބަދަލުކުރުމަށް ރައްޔިތުން ބޭނުންވާތީ އެކަމަށްވެސް ޙައްލު ގެނެސްދެއްވާނެކަމަށް ރައީސް ވިދާޅުވިއެވެ.
ރަސްމާދޫގެ ތަރައްޤީއާއެކު ފުރިހަމަ ނަފާ ރައްޔިތުންނަށް ގެނެސްދެއްވުމަކީ އެމަނިކުފާނު ބޭނުންފުޅުވާ ގޮތްކަމަށްވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.