بِسْمِ ٱللّٰهِ ٱلرَّحْمٰنِ ٱلرَّحِيمِ‎
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ وَعَلَى آلهِ وَصَحْبِهِ أَجْمَعِينْ.
ރަސްމާދޫގެ ކައުންސިލްގެ ރައީސް އަދި ކައުންސިލަރުން، ޑަބްލިޔު.ޑީ.ސީ. މެންބަރުން، ދާއިރާގެ ޢިއްޒަތްތެރި މަޖިލިސް މެންބަރު، ރަށުގެ މުއައްސަސާތަކުގެ ވެރިން، ރަށަށް ގިނަ ދުވަހު ޚިދުމަތް ކުރެއްވި އިސް ރަށްވެހިން، ރަށުގެ ލޮބުވެތި ރައްޔިތުން، ވަޑައިގެންނެވި ވަޒީރުންނާއި، ޢިއްޒަތްތެރި މަޖިލިސް މެންބަރުން، ކުންފުނިތަކުގެ ވެރިން އަދި މި ޖަލްސާ ބައްލަވާ، އަޑުއައްސަވަމުން ގެންދަވާ ލޮބުވެތި ހުރިހާ ރައްޔިތުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
ވަރަށް ހަވީރުގެ ވަގުތެއްގައި އަޅުގަނޑަށް މި ރަށަށް އާދެވުނީ. އަޅުގަނޑާއި އަޅުގަނޑާ އެކީގައި ވަޑައިގެންނެވި ހުރިހާ ބޭފުޅުންނަށް، ތިޔަބޭފުޅުން ވިދާޅުވި ހޫނު މަރުޙަބާއަށްޓަކައި ހިތުގެ އެންމެ ފުންމިނުން ވަރަށް ބޮޑަށް ޝުކުރު ދަންނަވަން.
އާދެ، މި ރަށުގެ ތަރައްޤީއަށް ވަރަށްގިނަ ކަންކަން ކުރަން އެބަހުރި. މި ދަތުރުގައި ތިޔަބޭފުޅުންގެ އަރިހުގައި އަޅުގަނޑު ދަންނަވަން އޮތް މައިގަނޑު ވާހަކައަކީ، އަޅުގަނޑު އިރާދަކުރެއްވިއްޔާ ވަރަށް އިސްކަމެއް ދީގެން އެ ކަންތައްތައް އަވަސްމިނެއްގައި ޙަޤީޤަތަކަށް ހަދައިދޭނެ ވާހަކަ.
މިދިޔަ އަހަރުގެ ތެރޭގައި މީގެ ގިނަ ކަންކަން ނުވެ އެހެރީ، އަޅުގަނޑުމެންނަށް އެކަމުގައި ކުރިއަށް ދެވޭނެ މަގުތައް، ބަޖެޓުގެ ތެރެއިންނާއި، އިޤްތިޞާދީ ޙާލަތު ރަނގަޅު ކުރުމަށް ކުރަންޖެހުނު މަސައްކަތުގެ ތެރެއިން ފަހިނުވެ ދިޔައިމަ. އެއީ، ރާއްޖޭގެ ހުރިހާ ރަށެއްގައިވެސް މިދިޔަ އަހަރު ތެރޭގައި ހަމަ ގާތްގަނޑަކަށް އެކަން އެހެންވީ. ނަމަވެސް، އިރާދަކުރެއްވީތީ އަޅުގަނޑުމެން އެއްވެސްވަރަކަށް ފައިސާ ޗާޕްނުކޮށް، ބޭރުގެ އެއްވެސް ތަނަކަށް އޮތް ދަރަންޏަކަށް ޑިފޯލްޓްނުވެ، ޤައުމުގެ އިޤްތިޞާދު ރަނގަޅުކުރަމުން މި އަންނަނީ.
މި އަހަރު އަޅުގަނޑުމެން ފާސްކުރި ބަޖެޓުގެ ތެރެއިން، ކެމްޕެއިން ތެރޭގައި ރިޔާސީ އިންތިޚާބުގައި އަޅުގަނޑު ވީ ވަޢުދުތައް ޢަމަލީގޮތުން ފަށައި، ނިންމުމަށް ވަރަށްގިނަ މަސައްކަތްތަކެއް ކުރެވޭނެގޮތަށް އެވަނީ ހަމަޖައްސާފައި. މި އަހަރާއި ދެން އޮތް އަހަރު، މި ދެ އަހަރަކީ މި ރަށަށާއި، މިގޮތަށް ހުރި ހުރިހާ ދިމާއެއްގައި އަޅުގަނޑު އޭރުގައި ވީ ވަޢުދުތަކަށް ޢަމަލީ ސިފަ ގެނައުމަށް ޕްލޭން ކުރެވިފައި އޮތް ދެ އަހަރު.
އެގޮތުން، މި އަހަރު މި ރަށުގައިވެސް ކުރިން ފެށިފައި، ހުއްޓިފައި ހުރި ވަރަށް މުހިންމު ކަންކަން އެބަހުރި. އެކަންކަން އަޅުގަނޑު ކޮށްދޭން އަޅުގަނޑު ވާނީ މިހާރު ވަރަށްގިނަ މަސައްކަތްތަކެއް ތަރުތީބުކޮށްފައި. މިއަދު ކައުންސިލާއި މުއައްސަސާތަކުގެ ވެރިންނާ އެކީގައި ބޭއްވި މަޝްވަރާ ބައްދަލުވުމުގައިވެސް އެކަންކަމުގެ ވާހަކަ ކޮންމެވެސްވަރަކަށް ވާނީ ދައްކާލެވިފައި.
އެގޮތުން ބައެއް ކަންކަމަށް ބަލާއިރު، ފެނުގެ ނިޒާމު ވާހަކަ ފާހަގަކުރި. ހުއްޓިފައި، ނޫނީވިއްޔާ ކުރިއަށް ނުގޮސް އެއޮތީ ވަކި ހިސާބަކަށް ގޮސްފައި. މިގޮތަށް އެބަހުރި، މި މަސައްކަތް ކުރާ ކުންފުންޏާ އެހެން ރަށްތަކުގައިވެސް ހަމަ މަސައްކަތްތަކެއް ހަވާލުކުރެވި ނުހިނގާ. އަޅުގަނޑު މިހާރު ވާނީ ފިނޭންސް މިނިސްޓަރާއި އަދި ކޮންސްޓްރަކްޝަން މިނިސްޓަރާ މަޝްވަރާތަކެއް ކޮށް، މިކަމުގައި ކުރިއަށްދާނެ ފޯރމިއުލަރއެއް، ނޫނީވިއްޔާ ކުރިއަށް ދެވޭނެ ގޮތްތަކެއް ހަމަޖައްސާފައި. އެހެންވީމާ، އިރާދަކުރެއްވިއްޔާ އެކަން ވަރަށް އަވަހަށް ފަށައިދީ، އަޅުގަނޑުމެން ނިންމާނެކަން، އަޅުގަނޑު ބޭނުން ތިޔަބޭފުޅުންނަށް ޔަޤީންކަމާ އެކީގައި ދަންނަވާލަން.
ދެންވެސް ހުރި މަޝްރޫޢުތައް ހަމަ އެގޮތަށް ގެންދާނަން. ގޮނޑުދޮށް ޙިމާޔަތް ކުރުމުގައި ތިޔަބޭފުޅުންގެ ވަރަށްބޮޑު ކަންބޮޑުވުންތަކެއް އެބަހުރި. އަދި އިތުރަށް މަސައްކަތް އެއޮތީ ކުރަން ޖެހިފައިކަން، ތިޔަބޭފުޅުން ތިޔަ ވިދާޅުވިގޮތަށް އަޅުގަނޑުވެސް ގަބޫލުކުރަން. އެހެންވީމާ، އެ މަސައްކަތްވެސް އަޅުގަނޑުމެން އިސްކަމެއްދީގެން އެގޮތަށް ކުރިއަށް ގެންދާނަން. އަދި އެއާއެކީގައި، މޫދަށް އެރުމަށް ރަނގަޅު ގޮތަކަށް ސަރަޙައްދެއްވެސް ހިމެނޭގޮތަށް މަސައްކަތް ކޮށްދޭނެ ކަމަށް އަޅުގަނޑު ދަންނަވާލަން.
އާދެ، މި އަހަރުގެ ބަޖެޓުގައި އެންމެ އިސްކަމެއްދޭ ތަރުތީބުގައި މިއޮތީ އެއްވަނައިގައި ބޯހިޔާވަހިކަން. އެއީ، މުޅި ރާއްޖޭގައިވެސް އަދި ޚާއްޞަކޮށް، އާބާދީ ބައިބޯވެފައި ހުރި ރަށްރަށުގައި އެންމެ އިސްކަންދޭންޖެހޭ، ރައްޔިތުންނަށް އެންމެދަތި މައްސަލަ. އިޖުތިމާޢީ އެކިއެކި މައްސަލަތައް ކުރިމަތިވާ ސަބަބު. ކުދިކުދި ތަންތަންކޮޅުގައި ތޮއްޖެހިގެން ޢާއިލާތައް ދިރިއުޅެން ޖެހުމަކީ، އޭގެ ސަބަބުން ނުކުމެނުދާ ކިތަންމެ ގިނަ ކަންތައްތަކެއް، މައްސަލަތަކެއް ކުރިމަތިވެގެންދާ ކަމެއް. އެހެންވެގެން އެ މައްސަލަ ޙައްލުކުރުމަށް އެންމެ އިސްކަމެއްދީގެން އަޅުގަނޑުގެ މެނިފެސްޓޯގައި އަދި ސިޔާސަތުގައި އެގޮތަށް ކަނޑައެޅީ.
މި އަހަރަށް މި ފާސްކޮށްގެން ތަންފީޛު މިކުރާ ބަޖެޓުގައިވެސް އެންމެ އިސްކަމެއް މިދެނީ، އާ މަޝްރޫޢުތަކުގައިވެސް، މި މައްސަލަ ޙައްލުކުރަން މަސައްކަތް ކުރަން. އެހެންވީމާ، އިރާދަކުރެއްވިއްޔާ އަޅުގަނޑުމެން ކުރިއަށްގެންދާ ގެދޮރުވެރިކަމުގެ މަޝްރޫޢުތަކުގެ ތެރެއިން، މި ރަށުގައި އަޅުގަނޑުމެން ހައުސިންގ ޔުނިޓް މަޝްރޫޢެއް، އިސްކަމެއް ދީގެން ކުރިއަށް ގެންގޮސްދޭނެކަން ތިޔަބޭފުޅުންނަށް ވަރަށް ސާފުކޮށް ޔަޤީންކަމާއެކު ދަންނަވާލަން.
ހަމައެއާއެކީގައި، ދެވަނައަށް އެންމެ އިސްކަމެއް މިދެނީ، ތަޢުލީމީ ދާއިރާއާއި، ޞިއްޙީ ދާއިރާއަށް ދިމާވެފައި ހުރި އެކިއެކި ދަތިތައް ޙައްލުކޮށްދޭން. ތަޢުލީމީ ދާއިރާއިން ބަލާއިރުގައި، ފަށާފައި ހުރި މަޝްރޫޢެއް، ކުރިއަށްދާ މަޝްރޫޢެއް އެބައޮތް. ތިންބުރިއަށް ހަދާ ސްކޫލް އިމާރާތެއްގެ މަސައްކަތް. އެ މަސައްކަތް ނިމުނީމަ، ވަރަށް ގިނަ މައްސަލަތަކަށް އެބަ ޙައްލުތަކެއް ލިބޭ. މުޅި މައްސަލަ ޙައްލުނުވިޔަސް، ވަރަށްގިނަ ކަންކަމަށް ޖާގަ ލިބިގެން އެބަދޭ. އެ މަސައްކަތް މިހާރު ގޮސްފައިވާ ހިސާބުން ދެން ނިންމާލަންހުރި މަސައްކަތްތަކަށް ސަރުކާރުގެ ތެރެއިން ޚާއްޞަ މަސައްކަތްތަކެއް އަޅުގަނޑުމެން ކުރާނަން، މިހާރަށްވުރެ މާ ރަނގަޅަށް އަވަހަށް ގެންގޮސް ނިންމައިލެވޭތޯ. އެހެންވީމާ، އެކަމުގައި ކަންބޮޑުވުމެއް ނުބޭއްވެވުން އެދެން. އެ މަސައްކަތް އިރާދަކުރެއްވިއްޔާ ނިންމައިދޭނަން.
ހަމައެއާއެކީގައި، ޞިއްޙީ މަރުކަޒު، ނޫނީ ޞިއްޙީ ދާއިރާއިން، ހެލްތު ސެންޓަރަށްވެސް ވަރަށް މުހިންމު ކަންތައްތަކެއް ކުރަންޖެހޭ. މީގެ ގިނަ ކަންކަމަކީ، އަޅުގަނޑު ކެމްޕެއިން ތެރޭގައި ވަޢުދުވެސް ވެފައި ހުރި ކަންތައްތައް. އެހެންވީމާ، ޞިއްޙީ މަރުކަޒުގައިވެސް ޖާގަ އިތުރުކޮށްދީ، އަދި ލެބޯރެޓަރީއެއް ހިމެނޭގޮތަށް ޖާގަ އިތުރުކޮށްދިނުމަކީ، އަޅުގަނޑު ކުރިއަށް ގެންދާނެ ކަމެއްކަން ތިޔަބޭފުޅުންނަށް ދަންނަވާލަން.
އާދެ، ކުޅިވަރުގެ ދާއިރާއަށް ދެން އެންމެ އިސްކަމެއް ދެނީ. ކުޅިވަރާއި، އިޖުތިމާޢީ އެކިކަހަލަ ފުރުޞަތުތައް ތަނަވަސްކޮށްދިނުމަށް. އެގޮތުން، އަޅުގަނޑު ވަޢުދުވީގޮތަށް، ފުޓްބޯޅަ ދަނޑުގެ މަސައްކަތް ކޮށްދޭނަން. އިރާދަކުރެއްވިއްޔާ އެކަން ކުރިއަށްދާނެ. އަދި ހަމައެއާއެކީގައި، ޔޫތު ސެންޓަރ، ނޫނީވިއްޔާ އިޖުތިމާޢީ ކުޅިވަރުތައް ކުޅެވޭ ޔޫތު ސެންޓަރުގެ މަސައްކަތްވެސް އިރާދަކުރެއްވިއްޔާ އަވަހަށް ގެންގޮސް ނިންމައިދީ، ޖުމްލަ ގޮތެއްގައި ކުޅިވަރާއި، ފިޓްނަސްގެ ދާއިރާއިން ރަށަށް ބޭނުންވާ ކަންކަމުގައިވެސް އަޅުގަނޑުމެން މި އަހަރުގެ ތެރޭގައި ޢަމަލީގޮތުން އެ މަސައްކަތްތައް ކޮށް ނިންމާނެ ކަމަށް ދަންނަވާލަން.
އާދެ، ފުލުހުންގެ ޚިދުމަތް މި ތަނުގައި ޤާއިމުކުރެވިފައެއް އަދި ނުއެއްވޭ. ފުލުހުންގެ ޚިދުމަތް، މިތަނުގައި ފުލުހުން ތިބެގެން ދޭގޮތަށް އިރާދަކުރެއްވިއްޔާ މި އަހަރުގެ ތެރޭގައި ހަމަޖެހޭނެ. ވީހާވެސް ކުރީކޮޅު، ކުރިއަށް އޮތް މަސްތަކުގައި، ވީހާވެސް އަވަސްކަމާއެކު އަޅުގަނޑުމެން އިސްކަމެއް ދީގެން، މި ރަށުގައި ފުލުހުންގެ ޚިދުމަތް ޤާއިމުކުރުމަށް މިހާރު ނިންމާފައިވާކަންވެސް ތިޔަބޭފުޅުންނަށް އަޅުގަނޑު ދަންނަވާލަން.
އާދެ، އެންޓަނާގެ ވާހަކަ ވިދާޅުވި. އިރާދަކުރެއްވިއްޔާ އެކަން ޙައްލުކޮށްދޭނަން، އަޅުގަނޑުމެން އުރީދޫއާ ވާހަކަ ދައްކައިގެން. ކަމާބެހޭ ދެ ވަޒީރުންނަށް އަޅުގަނޑު ދެންމެ މި ދަންނަވާލީ. މާލެގޮސް ވީހާވެސް އަވަހަކަށް މި މައްސަލަ ޙައްލުކުރުން މިއޮތީ. ހުރިތަނުން ބަދަލުކުރުން. ދޭންޖެހޭ ފައިސާ ދިނުން. އިރާދަކުރެއްވިއްޔާ، އަޅުގަނޑު އެކަން ބަލައި ރަނގަޅު ޙައްލެއް ހޯދައިދޭނަން.
އާދެ، ޖުމްލަ ގޮތެއްގައި ހަމަ ދަންނަވާލަން ބޭނުންވަނީ، މި ރަށުގެ ތަރައްޤީއަށް ކުރަންހުރި ކަންކަމުގައި ޢަމަލީ ސިފަ ގެނެސް، ކުލަ ޖައްސައިދޭނެ ވާހަކަ. އަދި އޭގެ ސަބަބުން ތިޔަބޭފުޅުންނަށް ފުރިހަމަ ނަފާ ލިބިދިނުމަކީ އަޅުގަނޑުގެ ހުރިހާވެސް އެދުމެއް.
އަދިވެސް އެއްފަހަރު ތިޔަބޭފުޅުންނަށް ވަރަށް ބޮޑަށް ޝުކުރު ދަންނަވަން. ތިޔަ ބަހައްޓަވާ ގާތްކަމަށްޓަކައި، ދެއްވާ ތަރުޙީބަށްޓަކައި. އިރާދަކުރެއްވިއްޔާ މި ރަށަށް ދެން އަޅުގަނޑުމެން އަންނާނީ، މިގޮތަށް ކުރަންހުރި ގިނަ ކަންތައްތަކެއް ނިންމާލައި، އެ ނިމުން ފާހަގަކުރުމުގެ އުފަލުގައި ބައިވެރިވާން. އަދިވެސް އެއްފަހަރު، ވަރަށް ބޮޑަށް ޝުކުރު ދަންނަވަން.
އަޅުގަނޑުގެ ދުޢާއަކީ، އަޅުގަނޑުމެން ކުރާ މަސައްކަތްތަކުގައި اللهُ سُبْحَانَهُ وَتَعَالَى ބަރަކާތް ލެއްވުން. އާމީން.
وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.