އިސްރާއިލުން ޣައްޒާގައި ހުއްޓުމެއް ނެތި ދެމުންގެންދާ އުދުވާނީ ހަމަލާތައް ހުއްޓާލުމުގެ އެއްބަސްވުމާއެކު، ޣައްޒާގައި އުފާ ފާޅުކޮށް, ޢައްޒާގެ ހަނގުރާމަ ހުއްޓާލިއިރުވެސް, މުއިއްޒު ގެންދަވަނީ އިޒްރާއީލުގެ ގާތިލުން ރާއްޖެ އައުން މަނާކުރާނެކަމުގެ ދޮގު ވައުދު ވަމުންނެވެ.
އެހެންނަމަވެސް މިއަދާއި ހަމައަށްވެސް, އިސްރާއީލުގެ ގާތިލުން ރާއްޖެ އެތެރެވުން މިސަރުކާރުން މަނާ ކޮށްފައެއް ނުވެއެވެ. އަދި އިސްރޭލުގެ ޕާސްޕޯޓު މަނާކުރުމަށް ގާނޫނު އިސްލާހު ކުރުމަށް އިދިކޮޅު އެމްޑީޕީން ރައްޔިތުންގެ މަޖިލިހަށް ހުށަހެޅި ބިލްވެސް މުއިއްޒުގެ އެންގުނަށް މަޖިލިހުގައި އަދިވެސް ވަނީ ހިފަހައްޓާފައެވެ.
ހަމައެއާއެކު, އިސްރާއީލުން ފަލަސްތީނުގެ 46,000 ރައްޔިތުން ޝަހީދުކޮށް, އަހަރު ދުވަހަށްފަހު ހަނގުރާމަ ހުއްޓާލުމަށް އެއްބަސްވިއިރު, އެގައުމާ ދެކޮޅަށް ފިޔަވަޅު ނާޅާ ހަމައެކަނި މުސްލިމް ގައުމަކަށް އޮތީ ރާއްޖެކަންވެސް ވަނީ ހާމަވެގެން ގޮސްފައެވެ.
ރައީސް މުއިއްޒުގެ ކެބިނެޓުން ވަނީ އިސްރާއީލުގެ ރައްޔިތުންގެ ޕާސްޕޯޓުތައް މަނާކުރުމަށް ނިންމާ, އެހެންނަމަވެސް އެނިންމުންވެސް ތަންފީޒު ކުރުމަށް ދެކޮޅު ހަދާފައެވެ. އަދި, އަނިޔާވެރި އިސްރާއީލުގެ ޕާސްޕޯޓު މަނާކުުރަށް އިދިކޮޅު އެމްޑީޕީން މަޖިލިހަށް ހުށަހެޅި ބިލްވެސް މުއިއްޒުގެ އަމުރަށް ވަނީ ހުއްޓުވާފައެވެ. އޭގެ އިތުރަށް, އިސްރާއީލަށް ފިޔަވަޅު އެޅުމަށް ގޮވާލި އާންމު ދިވެހި ރައްޔިތުން މުއިއްޒުގެ އަމުރަށް ވަނީ ހިފާ ހައްޔަރުވެސް ކޮށްފައެވެ.
ހަމަ އެއާއެކު މުއިއްޒުގެ ސަރުކާރުން ދަނީ, އިސްރާއިލުން ގާތިލުންނަށް ރާއްޖެއަށް އައިސް ޗުއްޓީ ހޭދަކުރުމުގެ ފުރުސަތުވެސް ފަހިކޮށް ދެމުންނެވެ.
އިސްރާއީލުގެ ޕާސްޕޯޓު މަނާކުރުމަށާއި, އިސްރާއީލާއި ގުޅުންހުރި ވިޔަފާރިތައް ހުއްޓުވުމަށް މެދު ނުކެނޑި ރައްޔިތުން އަޑުއުފުލަމުންދާއިރުވެސް މުއިއްޒު ގެންދަވަނީ އިސްރާއީލާ ދެކޮޅަށް އެއްވެސް ފިޔަވަޅެއް އެޅުމަށް ދެކޮޅު ހަދަމުންނެވެ. އެމައްސަލާގައި ރައްޔިތުން އެދެމުންދާ އެދުންތަކަށް ދެމުންދަނީ ބީރު ކަންފަތެކެވެ. އަދި މުއިއްޒު ކުރައްވަމުން ގެންދަވާހާކަމަކީވެސް, ބަޔާންތައް ނެރުމާއި ޓުވީޓުކޮށް, ބަޔާންތަކާއި ޓުވީޓުތަކުގެ ނިވަލުގައި ފޮރުވިގެން ހުރުމެވެ.
ހަމަ އެއާއެކު, ފަލަސްތީނަށް ތާއީދުކޮށް, އިސްރާއީލުގެ ގަތުލު އާންމާ ދެކޮޅަށް އަޑު އުފުލި އަންހެން ކަނބަލުންތަކެއް މުއިއްޒުވަނީ ހިފާ ހައްޔަރުކޮށް ޖަލަށްވެސް ލާފައެވެ. ފަލަސްތީނާއި އެއްކޮޅަށް އަޑު އުފުލައިގެން ރާއްޖޭގެ އެއްވެސް ވެރިކަމެއްގައި މިނޫނީ މިހާތަނަށް ދިވެހިން ހިފާ ހައްޔަރު ކޮށްފައި ނުވާކަން ފާހަގަ ކޮށްލެވެއެވެ.
2022 ވަނަ އަހަރުގެ އޮކްޓޯބަރު މަހުގެ 7 ވަނަ ދުވަހު, ހަމާސްގެ މުޖާހިދުން އިސްރާއީލަށް ދިން ކާމިޔާބު ވަރުގަދަ ހަމަލާތަކަށްފަހު, އިސްރާއީލުގެ އަނިޔާވެރި ސިފައިން ޣައްޒާއަށް އަރާ, ފަލަސްތީނުގެ އެތައްހާސް ރައްޔިތުންނެއް ޝަހީދުކޮށްލުމަށްފަހު, އެމީހުންގެ އުދާސްތައް ފިލުވާލުމަށް, ރާއްޖޭގެ ގޮނޑުދޮށްތަކާއި ރަށްތަކަށް އަންނަމުންދާއިރުވެސް, މި އަނިޔާވެރިން ރާއްޖެއަށް އެތެރެވަމުން ދިއުން މަނާކުރުމަށް ސަރުކާރުން މިހާތަނަށް އެއްވެސް ފިޔަވަޅެއް އަޅާފައެއް ނުވެއެވެ.
ހަމައެއާއެކު އިސްރާއީލުގެ ޕާސްޕޯޓު މަނާކުރުމަށް އަންގާ ރައްޔިތުންގެ މަޖިލީހުން މުއިއްޒުއަށް ސިޓީ ފޮނުވިތާ 15 މަސްވެގެންދާއިރުވެސް އެ ސިޓީއަށްވެސް މުއިއްޒު ޖަވާބެއް ދެއްވާފައެއް ނުވެއެވެ.
މި ސަރުކާރުން ދަނީ ބޭރުގެ ބާރުތަކުގެ އުނގަށް ވެއްޓި, ރާއްޖޭގެ ދީނާއި މިނިވަންކަން ގުރުބާން ކުރަމުންނެވެ. އެގޮތުން ރައްޖޭގެ ކަނޑުގައި ޖާސޫސް ކުރުމުގެ ބާރު ޗައިނާއަށް ދޫކޮށް, އެމެރިކާއާއި ހުޅަނގުގެ ގައުމުތަކުގެ ނުފޫޒަށް ދީލާލައި, އިޒްރޭލުގެ ޕާސްޕޯޓު މަނާކުރުމަށް ދިވެހި ރައްޔިތުން އުފުލަމުންދާ އަޑުތަކަށް މުއިއްޒު ދަނީ ބީރުކަންފަތެއް ދެމުންނެވެ.
ހަގީގަތުގައިވެސް, ޣައްޒާގެ ރައްޔިތުންގެ އިހުސާސްތަކާއި, އެ ސިޓީގައި ހިންގަމުންދާ ގަތުލުއާންމުތަކަށް ދެލޯ މަރާލުމަށްފަހު, އިސްރާއީލުގެ ގާތިލުން ރާއްޖެއަށް ދޭ މަދު ފައިސާކޮޅެއްގެ ދަހިވެތިކަމުގައި, އެމީހުންނަށް ރާއްޖޭގެ ބޯޑަރުތައް ހުޅުވާލައިގެން މުއިއްޒުއަށް ކަހާތަން ހިރުވާވެސް ނުލާ ހުރެވެނީ އަގަލެއް ކުލުނެއް ނެތުމުންނެވެ.
ރާއްޖޭގައި ހިންގަމުންދާ އިޒްރާއީލުގެ ފުޑް ޗެއިންތަކުން ލިބޭ މަދު ފައިސާކޮޅެއްގެ ދަތިވެތިކަމުގައި އެތަންތަނަށް ފިޔަވަޅު ނާޅާ މުއިއްޒުއަށް ހުރެވެނީ ތިމާއަކީ އިންސާނިއްޔަތުކަމުގެ ކަންފުޅެއްވެސް ނެތް މީހަކަށް ވާތީއެވެ. މިއީ މުއިއްޒު ދީނާއި ގައުމަށްވަމުންދާ ބޮޑު ޚިޔާނާތެކެވެ.
ރާއްޖޭގެ ކުރީގެ ހުރިހާ ރައީސުންނަކީވެސް ފަލަސްތީނުގެ މިނިވަންކަމަށް ގޮވާލާ, އަދި އަމަލާއި ބަހުން ފަލަސްތީނަށް ކުރާތާއީދު ހާމަކޮށްފައިވާ ރައީސުންނެވެ. އެހެންނަމަވެސް މުއިއްޒު ފާހަގަ ކުރެވިފައިވަނީ, ފަލަސްތީނު މައްސަލާގައި ދިމާވާ ކޮންމެ ކަމެއްގެ ނާޖާއިޒު ފައިދާ ނަންގަވާ, ހަމައެކަނި ޕްބްލިސިޓީއަށް ޓުވީޓު ކުރައްވާ ރައީސެއްގެ ގޮތުގައެވެ.
ޣައްޒާގައި މިފަހުން ބޮޑު ގަތުލުއާންމު ފެށުނީ 2023 ވަނަ އަހަރުގެ އޮކްޓޯބަރު މަހުގެ ހަތް ވަނަ ދުވަހެވެ. އެ ދުވަހުގެ ފަހުން މިހާތަނަށް ޣައްޒާގައި 46،707 މީހަކު ޝަހިދުކޮށްލައި، 110،265 މީހުން ޒަހަމްކޮށްލާފައި ވެއެވެ.