ހުޅުމާލޭގެ ދެވަނަ ފިޔަވައްސާއި ފުރަތަމަ ފިޔަވަހީގެ ބޮޑު ސަރަހައްދަކުން މިރޭ ކަރަންޓު ކެނޑިއްޖެ އެވެ.
ހުޅުމާލެއަށް ކަރަންޓު ފޯރުކޮށްދޭ، ސްޓެލްކޯއިން ބުނީ ކަރަންޓު ކެނޑުނީ ދިމާވި ޓެކްނިކަލް މައްސަލައަަކާ ގުޅިގެން ކަމަށެވެ. ދިމާވި މައްސަލަ ދެނެގަތުމުގެ މަސައްކަތް ކުރަމުންދާ ކަމަށް އެ ކުންފުނިން އެކްސްގައި ކުރި ޕޯސްޓެއްގައި ބުންޏެވެ.
"ހުޅުމާލޭގެ ފުރަތަމަ ފިޔަވައްސާއި ދެވަނަ ފިޔަވަހީގެ ބައެއް ސަރަހައްދުތަކުން ވަނީ ކަރަންޓުގެ ހިދުމަތް މެދުކެނޑިފައި، މައްސަލަ ދެނެގަނެ ވީ އެންމެ އަވަހަކަށް އެ މައްސަލަ ހައްލުކޮށް ހިދުމަތް މެދުކެނޑިފައިވާ ސަރަހައްދުތަކަށް އަލުން ކަރަންޓު ދިނުމުގެ މަސައްކަތް ދަނީ ކުރެވެމުން،" ސްޓެލްކޯގެ ޕޯސްޓުގައި ބުންނެވެ.
ހުޅުމާލޭގައި ހުރި މި ނޫހުގެ ކިޔުންތެރިއަކު ބުނީ ހުޅުމާލޭގެ ދެވަނަ ފިޔަވަހިން ކަރަންޓު ކެނޑިފައި ހުންނަތާ ބައިގަޑިއެއްހާއިރު ވެއްޖެ ކަމަށެވެ.
އެކަމާ ގުޅޭ ގޮތުން އިތުރު މައުލޫމާތު ދެމުން ސްޓެލްކޯގެ އޮފިޝަލެއް "އަދަދު" ނޫހަށް ވިދާޅުވީ ހިޔާގެ ބައެއް ޓަވަރުތަކުން ވެސް ކަރަންޓު ކެނޑިފައިވާ ކަމަށެވެ.
"ބޮޑަށް ބެލެވެނީ ކޭބަލްއަކަށް ދިމާވި މައްސަލައެއް ކަމަށް، މައްސަލަ ދިމާވީ ކޮން ކޭބަލަކަށް ތޯ ބެލުމުގެ މަސައްކަތް ކުރަމުން ދަނީ، ދެނެގަނެވުނުހާ އަވަހަށް ކަރަންޓު ދެވޭނެ،" އޭނާ ވިދާޅުވި އެވެ.