ލޮސް އެންޖެލްސް، ޔުނައިޓެޑް ސްޓޭޓްސް (މާޗް 4) - މި އަހަރުގެ ޖޫން/ޖުލައި މަހު އެމެރިކާ އާއި މެކްސިކޯ އަދި ކެނަޑާގައި ބާއްވާ ފީފާ ވޯލްޑް ކަޕްގައި ކުޅެން އިރާނުން އެމެރިކާ އަށް ދިއުމާ މެދު ދެ ވަނަ ވިސްނުމަކަށް ދާން ޖެހިދާނެ ކަމަށް ބުނެފައިވާއިރު، އެކަމާ އެއްވެސް ވަރަކަށް ނުވިސްނާ ކަމަށް އެމެރިކާގެ ރައީސް ޑޮނާލްޑް ޓްރަމްޕް ވިދާޅުވެއްޖެ އެވެ.
އެމެރިކާ އާއި އިޒްރޭލުން އިސްވެ، އިރާނާ ދެކޮޅަށް ފެށި ހަނގުރާމައިގައި، އިރާނަށް ދެމުންދާ ހަމަލާތަކުގައި މިހާތަނަށް 750 އަށްވުރެ ގިނަ މީހުން ވަނީ މަރުވެފަ އެވެ. އިރާން ފުޓްބޯޅަ ފެޑެރޭޝަން ރައީސް، މަހުދީ ތާޖު ވަނީ ވޯލްޑް ކަޕުގައި ކުޅުމާ މެދު ދެ ވަނަ ވިސްނުމަކަށް ދާން ޖެހިދާނެ ކަމަށް ވިދާޅުވެފަ އެވެ.
އެކަމާ ގުޅޭގޮތުން، އެމެރިކާގެ މީޑިއާ އިން ޓްރަމްޕާ ކުރި ސުވާލަށް އޭނާ ވިދާޅުވީ، އިރާނުން ވޯލްޑް ކަޕްގައި ކުޅޭނެތޯ އެއްވެސް ވަރަކަށް ނުވިސްނާ ކަމަށެވެ. އަދި، އިރާނަކީ ވަރަށް ބޮޑަށް "ބަލިކަށިވަމުން،" އަންނަ ގައުމެއް ކަމަށް ވެސް ޓްރަމްޕް ވަނީ ވިދާޅުވެފަ އެވެ.
މިހާރު އޮތްގޮތުން، އިރާނުން ވޯލްޑް ކަޕްގައި ކުޅޭ ފުރަތަމަ މެޗުގައި ޖޫން މަހުގެ 15 ވަނަ ދުވަހު ނިއު ޒީލެންޑާ ކުޅޭނެ އެވެ. އަދި، 21 ޖޫންގައި ބެލްޖިއަމާ ކުޅުމަށް ފަހު 26 ޖޫންގައި މިސްރާ ބައްދަލުކުރާނެ އެވެ.
ވޯލްޑް ކަޕް ޝެޑިއުލްކޮށްފައި އޮތީ ޖޫން 11 އިން ޖުލައި 19 ގެ ނިޔަލަށެވެ.
ޓްރަމްޕަށް ފީފާ އިން ޕީސް އެވޯޑް އެރުވި ނަމަވެސް، އޭނާ ކަންކަން ކުރައްވަމުން އަންނަ ގޮތުން ގިނަ ބަޔެއްގެ ހިތްހަމަނުޖެހުން ވަނީ އަމާޒުވެފަ އެވެ.
އެ ގޮތުން، ގިނަ ގައުމުތަކެއްގެ ރައްޔިތުންނަށް އެމެރިކާ އަށް ނާދެވޭ ގޮތަށް ޓްރެވަލް ބޭން ގައުމުތަކުގެ ލިސްޓެއް ހެދިއިރު، އެ ގައުމުތަކުގެ ތެރޭގައި މި ފަހަރުގެ ވޯލްޑް ކަޕަށް ކޮލިފައިވި ގައުމުތައް ވެސް ހިމެނެ އެވެ. އިރާނަކީ އެ ލިސްޓުގައި ވެސް ހިމެނޭ ގައުމެކެވެ.
އިރާނުން ވޯލްޑް ކަޕްގައި ކުޅުމުގައި އަަަމަލުކުރާނެ ގޮތެއް ނިންމަން ފީފާގައި އެދިފައިވާއިރު، އެ މައުލޫމާތު ހޯދަން މީޑިއާ އިން ކުރި މަސައްކަތް ވެސް އަދި ކާމިޔާބުނުވެ އެވެ.