ކުރިއަށް އޮތް ލޯކަލް ކައުންސިލް އިންތިޚާބުގައި އަމިއްލަ ގޮތުން ވާދަކުރާ މީހުން، މަދުވެގެން 50 މީހުންގެ ތާއިދު އޮތްކަން ހާމަކޮށްދޭން ޖެހެނީ އީފާސް މެދުވެރިކޮށް އިލެކްޝަންސް ކޮމިޝަން (އީސީ)ގެ ޕޯޓަލްއަށް ވަދެގެން ކަމަށްވާއިރު، އެ އުސޫލާ ގުޅޭ ގޮތުން ކުރީގެ ހޯމް މިނިސްޓަރު އުމަރު ނަސީރު ކަންބޮޑުވުން ފާޅުކުރައްވައިފިއެވެ. އިލެކްޝަންސް ކޮމިޝަންގެ އޮންލައިން ޕޯޓަލް މެދުވެރިކޮށް އިންތިޚާބަށް ކުރިމަތިލުމަށް ހުޅުވާލީ މިމަހުގެ 17ވަނަ ދުވަހެވެ. އެ ފުރުސަތު ހުޅުވާލީ އަންނަ އާދީއްތަ ދުވަހުގެ ދަންވަރު 12 ޖެހުމުގެ ނިޔަލަށެވެ. އެ އިންތިޚާބަށް ކުރިމަތިލާން އެދޭނަމަ، ފޯމް ހުށަހަޅަން ޖެހެނީ އީސީގެ މައި ޕޯޓަލަށް އީފާސް މެދުވެރިކޮށް ލޮގިން ވެގެންނެވެ. އަދި އަމިއްލަ ގޮތުން އިންތިޚާބަށް ކުރިމަތިލާ ކެންޑިޑޭޓުން މަދުވެގެން 50 މީހުންގެ ތާއީދު ހޯދަން ޖެހޭއިރު، ތާއިދު އޮތްކަން ހާމަކުރުމަށް ވެސް އީފާސްއިން އެ ޕޯޓަލްއަށް ވަންނަން ޖެހެއެވެ. އީސީން ވަނީ، ކެންޑިޑޭޓަކަށް ތާއީދު ދޭން ބޭނުންނަމަ، ނުވަތަ ނޫން ނަމަ ދާއިރާގެ ރައްޔިތުން އީސީގެ ޕޯޓަލަށް ވަދެ، ތާއީދު ދިނުމަށް ނުވަތަ ނުދިނުމަށް ކަނޑައެޅޭނެ ކަމަށް ބުނެފައެވެ. އެ އުސޫލާ ގުޅޭ ގޮތުން ކަންބޮޑުވުން ފާޅުކުރައްވައި އުމަރު، އީސީގެ ރައީސް މުހައްމަދު ޒާހިދަށް ފޮނުއްވި ސިޓީއެއްގައި ވަނީ، އަމިއްލަ ގޮތުން ވާދަކުރާ ކެންޑިޑޭޓުން ހޯދަން ޖެހޭ 50 ސޮއި ހޯދުމުގައި، އެ ސޮއި ދޭ މީހުން އެ މީހުން އަމިއްލައަށް އީފާސް މެދުވެރިކޮށް ލޮގިންކޮށްގެން ވެރިފައި ކުރަން ޖެހޭ ގޮތަށް ހަމަޖެއްސުމަކީ، އަމިއްލަ ގޮތުން ވާދަކުރާ ކެންޑިޑޭޓުންގެ އިންތިޚާބީ ހައްގަށް އުނިކަން ލިބޭ ކަމެއް ކަމަށް ދެކޭ ކަމަށެވެ. އިލެކްޝަންސް ކޮމިޝަންގެ ރައީސް ޒާހިދު: އީފާސް މެދުވެރިކޮށް، އަމިއްލަ ކެންޑިޑޭޓުން ސޮއި ހޯދަން ޖެހޭ އުސޫލު ބާތިލުކޮށްދޭން އުމަރު ވަނީ އީސީގައި އެދިވަޑައިގެންފައި --- ފޮޓޯ/ އިލެކްޝަންސް ކޮމިޝަން އޭނާ ވިދާޅުވީ، އެކަން އީސީގެ ސަމާލުކަމަށް ގެންނަނީ، 2023 ވަނަ އަހަރުގެ ރިޔާސީ އިންތިޚާބުގައި ވާދަކޮށް، 2028 ވަނަ އަހަރުގެ ރިޔާސީ އިންތިޚާބުގައި ވެސް އަމިއްލަ ގޮތުން ވާދަކުރުމަށް ގަސްތުކޮށްފައިވާ މީހެއްގެ ހައިސިއްޔަތުން ކަމަށެވެ. އުމަރު ވިދާޅުވީ ރާއްޖޭގައި އީފާސް ބޭނުންކޮށްގެން ޚިދުމަތެއް ހޯދަން ދަންނަނީ އާބާދީގެ 10 ޕަސެންޓް މީހުން ކަމަށެވެ. "އަނެއް 90 ޕަސެންޓް މީހުންނަކީ އެކަން ދުވަހަކު ވެސް ކޮށްފައި ނެތް އަދި ކުރަން ނުދަންނަ މީހުންނެވެ. މި އުސޫލަކީ މި ދެންނެވި 90 ޕަސެންޓް މީހުންގެ ހައްގަށް އުނިކަން ލިބޭ ކަމެކެވެ." އޭނާ ވިދާޅުވިއެވެ. އެ ސިޓީގައި ވަނީ، އެފަދަ ''ހުރަހެއް ކުރިމަތިކުރުމަކީ" ގާނޫނަކުން ނޫނީ ކުރެވޭނެ ކަމެއް ނޫން ކަމަށެވެ. އަދި އިންތިޚާބުތަކުގައި މީހުން ފަރިތަ އުސޫލުތަކަށް އަމަލުކުރުމަކީ މުހިންމު ކަމެއް ކަމަށް ދެކޭ ކަމަށް އޭނާ ވިދާޅުވިއެވެ. އަދި ކައުންސިލް އިންތިޚާބަށް ބޭނުންވާ އޮފިޝަލުން ހޯދުމުގައި ވެސް އީފާސް މެދުވެރިކޮށް ނަން ހުށަހަޅަން ޖެހޭތީ، އޮފިޝަލުން ލިބުމުގައި ވެސް ދަތިތަކާ ކުރިމަތިވި ކަމަށް މައުލޫމާތު ލިބުނު ކަމަށް އުމަރު ވިދާޅުވިއެވެ. އެހެންވެ، އެ ސިޓީގައި އޭނާ ވަނީ، އެ އުސޫލު ބާތިލުކޮށްދިނުމަށް އެދިވަޑައިގެންފައެވެ. އުމަރު 2008 ވަނަ އަހަރު ވެސް ރިޔާސީ އިންތިޚާބުގައި ވެސް ވާދަކުރެއްވިއިރު، އޭރު އޭނާ ވާދަކުރެއްވީ އޭނާގެ ވެސް ބައިވެރިވެވަޑައިގަތުމާއެކު އުފެއްދި އިސްލާމިކް ޑިމޮކްރެޓިކް ޕާޓީގެ ކެންޑިޑޭޓެއްގެ ގޮތުގައެވެ. އެ އިންތިޚާބާއި 2023 ވަނަ އަހަރުގެ ރިޔާސީ އިންތިޚާބުގައި ވެސް އުމަރަށް ދެވަނަ ބުރަށް ވަޑައިނުގަނެވެއެވެ. އަންނަ އޭޕްރިލް މަހުގެ ހަތަރު ވަނަ ދުވަހު ބާއްވާ ކައުންސިލް އިންތިޚާބުގައި ކައުންސިލްތަކުގެ ޖުމްލަ 225 ދާއިރާއަކަށް މެންބަރުން އިންތިޚާބު ކުރަންޖެހެއެވެ. https://sun.mv/217024 އެ އިންތިޚާބާ ގުޅޭ ގޮތުން އެހެން ބައެއް ކަންބޮޑުވުންތައް ވެސް އިދިކޮޅުން ފާހަގަކޮށްފައިވެއެވެ. އެގޮތުން އެމްޑީޕީން ބުނީ، އިންތިޚާބަށް ކުރިމަތިލާން ދިން މުއްދަތު ކުރު ކަމަށާއި، 24 ގަޑިއިރު އޮންލައިންކޮށް ފޯމު ހުށަހެޅުމުގެ ފުރުސަތު އޮންނަން ޖެހޭނެ ކަމަށް ބުނެފައެވެ. އެ ޕާޓީގެ ކައުންސިލު އިންތިޚާބުގެ ތަރުޖަމާނު ޢަބްދުالله ވަޙީދު ލިޔުއްވި ޕޯސްޓެއްގައިވަނީ މެނުއަލްކޮށް ނުވަތަ ގަނޑުކޮށް ފޯމް ބަލައިގަތުމުގެ އިންތިޒާމް ހަމަޖެއްސުމަށް އިލެކްޝަންސް ކޮމިޝަނަށް ގޮވާލައްވައިފައެވެ. އަދި އީސީގެ ޕޯޓަލަށް ވަދެ، މައުލޫމާތުތައް ބެލުމުގެ ބާރު ސަރުކާރު ހިންގާ ޕާޓީ، ޕީއެންސީއަށް އޮންނަ ކަމަށް ވެސް އެމްޑީޕީން ތުހުމަތުކޮށްފައިވެއެވެ. ނަމަވެސް އީސީން ވަނީ އެ ތުހުމަތު ދޮގުކޮށްފައެވެ.