ފުލުހުންގެ ވަޒީފާއިން ވަކިކުރި އިންސްޕެކްޓާ އޮފް ޕޮލިސް އަހުމަދު ޝިޔާމަށް އަލުން ވަޒީފާދޭން ހައިކޯޓުން ކުރި ހުކުމުގައި، 12 އަހަރުގެ މުސާރަ ދިނުމަށް އަންގައިފައިވާ ބައި އިސްތިއުނާފުކުރަން އެޓާނީ ޖެނެރަލް (އޭޖީ) އޮފީހުން ނިންމައިފިއެވެ. ޕޮލިސް މީޑިއާގައި މަސައްކަތްކުރިއިރު އާއްމުންގެ ތެރޭގައި މަޝްހޫރުވި ޝިޔާމް، ވަޒީފާއިން ވަކިކުރީ 2014 ވަނަ އަހަރެވެ. މެއި 2014 ގައި ޝިޔާމް ފުލުހުންގެ ވަޒީފާއިން ވަކިކުރިއިރު ހުންނެވީ ނޯތު ޕޮލިސް ޑިވިޝަންގެ ކޮމާންޑަރަކަށެވެ. އޭނާ ވަކިކުރީ، މަގާމުގެ ނުފޫޒު ބޭނުންކޮށްގެން އަމަލުތަކެއް ހިންގިކަމުގެ ތުހުމަތުގައެވެ. ޝިޔާމް ވަޒީފާއިން ވަކިކުރުމުން އޭނާ އެ މައްސަލަ ސިވިލް ކޯޓަށް ހުށަހެޅުން އެ ކޯޓުން އޭނާއަށް އެ ކޯޓުން އެ މައްސަލަ ކާމިޔާބު ނުވިއެވެ. އެ މައްސަލަ އެ ކޯޓުން ނިންމިއިރު، އޮތީ އޭނާއަށް އަލުން ވަޒީފާ ދޭން ޖެހޭނެ ތަނެއް ނެތް ކަމަށް ކަނޑައަޅައިފައެވެ. އޭގެ ފަހުން 2019 ވަނަ އަހަރު ސިވިލް ކޯޓަށް ހުށަހެޅި އެ މައްސަލަ އެ ކޯޓުން ނިމުނީ 2020 ގައެވެ. އެ އަހަރު މައްސަލަ ނިމުމުން ހައިކޯޓަށް އެ މައްސަލަ ހުށަހެޅީ 2021 ވަނަ އަހަރުގެ ކުރީކޮޅެވެ. ހައިކޯޓުގައި ހަ އަހަރު ދުވަހަށްވުރެ ގިނަ ދުވަސްވުމަށް ފަހު މައްސަލަ ނިންމީ މިއަދެވެ. https://sun.mv/220716 ހައިކޯޓުން ބުރާސްފަތި ދުވަހު ކުރި ހުކުމުގައިވަނީ ޝިޔާމް ވަޒީފާއިން ވަކިކުރަން ފުލުހުންގެ ޑިސިޕްލިނަރީ ބޯޑުން ނިންމުމުގައި ރިއާޔަތްކުރި ހެއްކަކީ ކޮބައިކަން އެނގޭނެ ހެއްކެއް ކޯޓަށް ހުށަހަޅާފައި ނުވާތީ އެ ބޯޑުން އެކަށީގެންވާ މިންވަރުގެ ތަހުގީގެއް ކޮށްފައިވާކަން ދައުލަތަށް ބުނެދެވިފައިނުވާ ކަމަށެވެ. އެހެންވެ، ޝިޔާމަށް އަލުން ވަޒީފާ ދިނުމަށާއި ވަކިކުރި ދުވަހުން ފެށިގެން ވަޒީފާ އަނބުރާ ދިނުމާ ހަމައަށް ލިބެންޖެހޭ މުސާރައާއި އިނާޔަތްތައް ދޭން އަންގާ ކަމަށް ތިން ފަނޑިޔާރުންގެ އިއްތިފާގުން ކުރެއްވި އެ ހުކުމުގައިވެއެވެ. ހައިކޯޓުގައި ހަ އަހަރުވީ މި މައްސަލަ ބެއްލެވީ ފަނޑިޔާރު މުހައްމަދު ޝަނީޒް އަބްދުﷲ އާއި ފަނޑިޔާރު ހަސަން ޝަފީއު އަދި ފަނޑިޔާރު އަބްދުލްމާނިއު ހުސައިނެވެ. އެ ހުކުމާ ގުޅޭ ގޮތުން އޭޖީ އޮފީހުގެ އޮފިޝަލަކު "ސަން"އަށް ވިދާޅުވީ، ޝިޔާމަށް 12 އަހަރުގެ މުސާރައާއި އިނާޔަތް ދިނުމަށް ހުކުމުގައި ބަޔާންކޮށްފައިވަނީ ސުޕްރީމް ކޯޓުގެ ނިންމުމަކާ ޚިލާފަށް ކަމަށެވެ. އެގޮތުން އެ ކޯޓުން އެންމެ ފަހުން ނިންމައިފައިވާ ގޮތުން، މީހަކަށް އަނބުރާ ވަޒީފާ ދޭ ހާލަތުގައި އެ މީހަކަށް އެންމެ ގިނަވެގެން ނަގައިދެވޭނީ ހަ މަސް ދުވަހުގެ މުސާރައާއި އިނާޔަތް ކަމަށް އޮފިޝަލް ވިދާޅުވިއެވެ. އެހެންވެ، 12 އަހަރުގެ މުސާރަ ދިނުމަށް ހައި ކޯޓުގައި ބުނެފައިވާ ބައި އިސްތިއުނާފު ކުރަން މިހާރު ނިންމާފައިވާ ކަމަށް އޮފިޝަލް ވިދާޅުވިއެވެ. ޕޮލިސް ވަޒީފާއިން ވަކިކުރުމުން ޝިޔާމް އުޅުއްވީ ވިޔަފާރީގައެވެ. އޭނާއަކީ މާލޭގެ ބައެއް މަޝްހޫރު ރެސްޓޯރެންޓްތައް ހިންގުމުގައި މިހާރު އުޅުއްވާ ވިޔަފާރިވެރިއެކެވެ. އޭނާ، މި ފަހުން ކުޅިވަރު ހިންގުމުގެ ތެރޭގައިވެސް މަސައްކަތް ކުރެއްވިއެވެ.