ތައިލެންޑްގައި ނިމިގެންދިޔަ ސާފް ފުޓްސަލް ޗެމްޕިއަންޝިޕް ހޯދި ދިވެހި ފުޓްސަލް ޓީމް ރާއްޖެ އައުމުން ވެލާނާ އިންޓަރނޭޝަނަލް އެއާޕޯޓުން ހޫނު މަރުހަބާއެއް ކިޔައިފިއެވެ.
ފުޓްސަލްޓީމް ރާއްޖެ އައުމުން ޓީމަށް އެންމެފުރަތަމަ މަރުހަބާ ދެންނެވީ ކުޅިވަރާ ބެހޭ ވަޒީރު ޢަބްދުﷲ ރާފިޢު އާއި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސް އަޙްމަދު ޠާރިޤްއެވެ. މީގެ އިތުރުން ކުޅުންތެރިންގެ އާއިލާއިންވެސް ވަނީ، ވީއައިއޭގެ ވިއައިޕީ ލައުންޖުން ކުޅުންތެރިންނަށް މަރުހަބާކިޔާފައެވެ. 
ޤައުމީޓީމަށް ވީއައިއޭއިން މަރުހަބާ ކިޔަންގޮސްތިބި ކުޅުންތެރންގެ އާއިލާގެ ބައެއް މެމްބަރުން.. ފޮޓޯ: އެމްއޭސީއެލް
ވީއައިއޭއިން ކުޅުންތެރިންނަށް މަރުހަބާކިޔުމަށް އާއްމުންނާއެކު ބާއްވާ ހަރަކާތް އޮންނާނީ، ހެންވޭރު އާޓިފިޝަލް ބީޗްގައެވެ. އެތަނުގައި ޓީމަށް މަރުހަބާ ކިޔުމުގެ ގޮތުން ހަވާއެރުވުމުގެ ހަރަކާތާއި، ކުޅުންތެރިންނާއެކު ފޮޓޯ ނެގުންވެސް ކުރިއަށްދާނެއެވެ.
ސާފް ފުޓްސަލް ޗެމްޕިއަންޝިޕްގެ ތަށި ރާއްޖެއިން ހޯދާފައިވަނީ ކުޅުނު ހުރިހާ މެޗަކުން މޮޅުވެގެންނެވެ. މި މުބާރާތުގެ ގިނަ މެޗްތައް ރާއްޖެއިން ކާމިޔާބުކުރީ ތަފާތުބޮޑު ނަތީޖާއަކުންނެވެ.