ނެޝަނަލް އާޓު ގެލެރީގައި މިހާރު ކުރިއަށްދާ މައުރަޒު ބަލައިލަން އެ ތަނަށް ދިޔައީމެވެ. ދޮރުން ވަދެގެން އައިިއިރު، ޚިޔާލުތައް ސޮއްސާލަނީ ރާއްޖޭގެ ތާރީޚާއި މުއްސަނދި ސަގާފަތަށެވެ. އެކި އަތްތެރި މަސައްކަތްތަކާއި އުވެމުން އަންނަ ކުޅިވަރުތަކެވެ. ލިބާހާއި ހުނިގޭނުމާއި އެކި ފަންނުވެރިންނެވެ. މަސްވެރިކަމާއި ލިޔެލާޖެހުމާއި ތާރަ ޖެހުމެވެ. މި ކިޔައިދިނީ، 'ވިވިޑް ރިއަލިޒަމް'ގެ ނަމުގައި ކުރެހުންތެރިޔާ ހުސައިން އަލީ މަނިކު މިހާރު ކުރިއަށް ގެންދާ މައުރަޒުގެ ވާހަކައެވެ. ހަސަންގެ މައުރަޒުގައި ހުރި ކުރެހުމެއް ----- ސަން ފޮޓޯ/ މޫސާ ނަދީމް އެ މައުރަޒުގެ ކުރެހުންތަކުގެ ޖަރީކަން ބަލައިލަން ވަގުތުކޮޅަކު އެ ތަނުގައި ހޭދަކޮށްލީމެވެ. ރާއްޖޭގެ މުއްސަނދި ސަގާފަތުގެ އެކި ކަންކަން ކުރެހުމަށް ތިލަކޮށްފައި ހުރީ، މީހުންގެ ސަމާލުކަން ދަމައިގަންނަ އަލިގަދަ ކުލަތަކުން ޖަރީކޮށްގެނެވެ. ކޮންމެ ކުރެހުމަކުން ދޭހަކޮށްދޭ މާނަ ފުންވެފައި ތަފާތެވެ. ދިވެހީންގެ ތާރީޚާއި ސަގާފަތް ރަމްޒުކޮށްދެއެވެ. އެ އިން ކޮންމެ ކުރެހުމަކުން މުއްސަނދި ސަގާފަތެއް އޮތް ގައުމަކަށް ނިސްބަތްވީތީ ފަޚުރުވެރިވުމުގެ އިހުސާސްކޮށްދެއެވެ. އޭގެތެރެއިން ވެސް އެންމެ އަޅައިގަތީ، މީގެ އަހަރުތަކެއް ކުރިން މަރުވެފައިވާ, ނާސިރާ އަބްދުﷲގެ ތަސްވީރަށެވެ. ބާޒާރުމަތީގައި އެކިއެކި މަސައްކަތްތަކުގައި އުޅުނު ނާސިރާގެ އެ ތަސްވީރު, ތަފާތު އެކި ކުލަތަކުން ފުރިފައިވާއިރު, އެ ކުރެހުމުން އޭނާގެ ހަޔާތް ކުލަކޮށްދެއެވެ. ދަބަހެއް ކޮނޑުގައި އަޅުވައިގެން، ކުޑަކުދިންގެ ކޮއްޓަކަށް އެއްޗެއް ލައިގެންދާ މަންޒަރު ވަނީ ކުރެހުމަށް ތިލަކޮށްފައެވެ. ހުސައިން ވިދާޅުވި ގޮތުގައި، އެ ކުރެހުމުން ދައްކައިދެނީ، ނާސިރާގެ މަސައްކަތްތެރިކަމެވެ. ނާސިރާ ފެންނަ ކުރެހުން: އެ ކުރެހުމުން ދައްކުވައިދެނީ އޭނާގެ މަސައްކަތްތެރިކަން ---- ސަން ފޮޓޯ އާއިލާގެ އެއްވެސް އެހީއެއް ނެތި، މަރު ދުވަހާ ޖެހެން ދެން ނާސިރާ އުޅުނީ، ބިއްލޫރި ފުޅި ފަދަ ތަކެތި ހޮވައިގެން ވިއްކައި، އެކި މަސައްކަތްތަކުގައެވެ. ނާސިރާގެ އިތުރަށް، ޖޭމު ދޮންކަމަނަގެ ކުރެހުމެއް ވެސް ވަނީ މި މައުރަޒުގައި ހިމަނަފާއެވެ. ކުޑައިރުން ފެށިގެން ކުރެހުމަށް ޝައުގު ހުންނަ ހުސައިން މި މައުރަޒުން ކިޔައިދެއްވަން ބޭނުންފުޅުވީ، ރާއްޖޭގެ 'ދިއްލިފައި އޮންނަ' މުއްސަނދި މަސައްކަތްތަކާއި ސަގާފަތެވެ. ކުރެހުންތައް ތައްޔާރު ކުރެއްވީ، ހުރިހާ އުމުރުފުރައަކާ ގުޅޭހެނެވެ. މައުރަޒަށް އޭނާ ކިޔުއްވި ނަން ވެސް ތަފާތެވެ. 'ވިވިޑް ރިއައިލިޒަމް'އެވެ. އެ ކަމުން ވެސް ދައްކުވައިދިނީ، ރާއްޖެއެވެ. އެތައް ގޮތަކުން މުއްސަނދި ސަގާފަތެވެ. "އަޅުގަނޑު ދެކޭ ގޮތުގައި، ވަރަށް ވިވިޑްކޮށް ކުލަތައް އެބަހުރި ކަނޑު އަޑީގައާއި ސަންސެޓުގައި. އެހެންވީމައި އެ ކުލަތައް އަޅުގަނޑު މި ބޭނުންކުރީ ތީމެއް ގޮތަށް. ހުރިހާ ކުރުހުމަކަށް އެ ކުލަތައް ލައިގެން [މަސައްކަތް ކުރީ] ރާއްޖެއަކީ ބްރައިޓް، ކަލަފުލް މުއްސަނދި ސަގާފަތެއް އޮތް ގައުމެއްކަން [ދައްކައިދޭން]," ހަސަން ވިދާޅުވިއެވެ. މުއްސަނދި ސަގާފަތް ކިޔައިދިން ކުރެހުންތައް ނިންމާލުމަށް ގާތްގަނޑަކަށް ދެ އަހަރެއްހާ ދުވަސް އޭނާ ހޭދަކުރެއްވިއެވެ. އެއީ، ސޯލޯ މައުރަޒަކަށް ބޭނުންވާ މިންވަރަކަށް އޭނާއަށް ތައްޔާރު ނުވެވޭތީއެވެ. ހަސަން ކުރެހުމެއް ކައިރީ މަޑުކޮށްލައިގެން ---- ސަން ފޮޓޯ/ މޫސާ ނަދީމް ތިރީސް ކުރެހުމެއް މި މައުރަޒުގައި ފެންނަން އެބަހުއްޓެވެ. އެ ހުރިހާ ކުރެހުންތައް ވެސް ވިއްކުމަށް ހަސަން ވަނީ ނިންމަވާފައެވެ. މި މައުރަޒުގައި ހިމަނާފައި ވަނީ، ހަމައެކަނި ކުރެހުންތައް އެކަންޏެއް ނޫނެވެ. ކުރެހުންތަކުގެ ތަފްސީލުތައް ކިޔައިދޭ ފޮތެއް ހިމަނާފައިވާއިރު، ރާއްޖޭގެ މަސައްކަތްތެރިކަމުގެ ވަރަށް ގިނަ ވާހަކަތައް އެ ފޮތުގައި ކިޔައިދީފައިވެއެވެ. އަދި، އެކި ކުރެހުންތައް ހިމެނޭ ސުވެނިއާ ތަކެތި ވިއްކަން އެ މައުރަޒުގައި ވަނީ ބަހައްޓާފައެވެ. މި މައުރަޒުން، ރާއްޖޭގެ މުއްސަނދި ސަގާފަތާއި ތާރީޚު އެއް ތަނަކުން ފެންނާނެ ތަނަކަށް ވާނެއެވެ. ސަގާފަތަށް ލޯބިކުރާ މީހުންނަށް މި މައުރަޒުގެ ކުރެހުންތައް ކަމުދާނެއެވެ. އަންނަ ހުކުރު ދުވަހުގެ ނިޔަލަށް ކުރިއަށްދާ މި މައުރަޒު ހުޅުވާފައި ހުންނަނީ، ކޮންމެ ދުވަހަކު 10:00އަކުން 22:00އަށެވެ. ނަމަވެސް، ނަމާދު ވަގުތުތަކަށް މެދު ކަނޑާލާނެއެވެ.