ސިޔާސީ ޕާޓީ ހިންގާ ގޮތް ވާދަވެރިންނަށް ޕީއެންސީން ދަސްކޮށްދޭނެ ކަމަށް ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއާޕާސަން އަބްދުލްރަހީމް އަބްދުﷲ ވިދާޅުވެއްޖެ އެވެ.
ޕީއެންސީގެ އެތެރޭގެ އިންތިހާބާއި ގުޅޭގޮތުން ރޭ ބޭއްވި ނޫސްވެރިންގެ ބައްދަލުވުމުގައި އަބްދުލްރަހީމް ވިދާޅުވީ ރައީސް ޑރ. މުހައްމަދު މުއިއްޒު ޕީއެންސީއާ ހިންގުމާ ހަވާލުވެވަޑައިގެން އެންމެ ފުރަތަމަ ވެސް ބާރުއެޅުއްވީ ޕާޓީއާ އާންމު މެމްބަރުންނާއި ދެމެދު އޮންނަ ގުޅުން އިތުރަށް ވަރުގަދަކުރުން ކަމަށާއި އެގޮތުން އެކަމަށް އެންމެ ފުރަތަމަ ކުރަންޖެހޭ ކަމަކީ ސްޓިއަރިން ކޮމިޓީތައް އެކުލަވާލުން ކަމަށެވެ.
މިވަގުތު ރާއްޖޭގައި މީހުން ދިރިއުޅޭ ކޮންމެ ރަށެއްގައި ޕީއެންސީގެ ސްޓިއަރިން ކޮމިޓީއެއް އޮންނާނެ ކަމަށާއި ކޮންމެ ދާއިރާއެއްގައި ރައީސަކާއި ނައިބު ރައީސެއް އަދި އަންހެނުންގެ ހަރަކާތުގެ ރައީސަކާއި ޒުވާނުންގެ ހަރަކާތުގެ ރައީސެއް ހުންނާނެ ކަމަށް އަބްދުލްރަހީމް ވިދާޅުވި އެވެ.
އަބްދުލްރަހީމް ވިދާޅުވީ ޕީއެންސީން ދެން ކުރާނެ މަސައްކަތަކީ ޕާޓީގެ އެހެނިހެން ހަރަކާތްތައް ވަރުގަދަކުރުން ކަމަށާއި ކުރިއަށް އޮތް ތަނުގައި ރާއްޖޭގައި ސިޔާސީ ޕާޓީ ހިންގާ ގޮތް ވާދަވެރިންނަށް ޕީއެންސީން ދަސްކޮށްދޭނެ ކަމަށެވެ.
"ކުރިއަށް އޮތް ތަނުގައި ރާއްޖޭގައި ސިޔާސީ ޕާޓީއެއް ކަންތައްތައް ކުރާ ގޮތާއި، ސިޔާސީ ޕާޓީ ހިންގާ ގޮތާއި، ސިޔާސީ ޕާޓީތަކުގެ ހަރަކާތްތައް ރާވައި އިންތިޒާމު ކުރާ ގޮތް، ވާދަވެރިންނަށް އަޅުގަނޑުމެން ދަސްކޮށްދޭނެ،" އަބްދުލްރަހީމް ވިދާޅުވި އެވެ.
ޕީއެންސީގެ އެތެރޭގެ އިންތިހާބުގައި އެ ޕާޓީގެ ​​​1،984 މަޤާމަށް މީހުން އިންތިޚާބުކޮށްފައިވެ އެވެ.