އިޖްތިމާއީ އަދި އާއިލީ ތަރައްޤީއާ ބެހޭ ވުޒާރާއާއި، އެހީ ޖަމުއިއްޔާ އަދި ވ އަތޮޅު ކައުންސިލް ގުޅިގެން، ވ އަތޮޅުގައި ނާޒުކު އަދި ދަތި ހާލަތްތަކުގައި ދިރިއުޅޭ ފަރާތްތަކަށް އެހީތެރިކަން ފޯރުކޮށްދިނުމުގެ މަސައްކަތް ވަނީ ފަށައިފިއެވެ.
އިޖްތިމާއީ އަދި އާއިލީ ތަރައްޤީއާ ބެހޭ ވުޒާރާއިން ހާމަކުރި ގޮތުގައި، އެހީ ޖަމުއިއްޔާއާއި އެ ވުޒާރާއާ ދެމެދު ވެފައިވާ ފަހުމުނާމާގެ ދަށުން، ވ އަތޮޅު ކައުންސިލްގެ އެހީތެރިކަމާއެކު، އެ ކައުންސިލުން ދެނެގަނެފައިވާ ދަތި ހާލުގައި އުޅޭ އާއިލާތަކަށް ދާއިމީ ބޯހިޔާވަހިކަން ހޯދައިދިނުމުގެ ޕްރޮގްރާމެއް މިހާރު ވަނީ ފަށައިފައެވެ.
މީގެ އިތުރުން، ވ އަތޮޅުގައި ދަތި ހާލުގައި ދިރިއުޅޭ އިތުރު އާއިލާތަކުގެ ދިރިއުޅުމުގެ ހާލަތު ދެނެގަނެ، އެފަރާތްތަކަށް ދެވެން ހުރި އެހީތެރިކަން ފޯރުކޮށްދިނުމާ ގުޅޭ މަޝްވަރާތައް ވެސް ކުރެވިފައިވާ ކަމަށް އެ ވުޒާރާއިން މައުލޫމާތު ދެއެވެ.
Advertisement
އިޖްތިމާއީ އަދި އާއިލީ ތަރައްޤީއާ ބެހޭ ވުޒާރާއިން ވަނީ، ދަތި ހާލުގައި އުޅޭ ފަރާތްތަކަށް އެހީތެރިކަން ފޯރުކޮށްދިނުމާއި، އެމީހުންގެ ހާލަތު ރަނގަޅުކުރުމަށް ކުރެވޭ މަސައްކަތްތަކުގައި އެންމެހާ ފަރާތްތަކުގެ ބައިވެރިވުން މުހިންމުކަން ފާހަގަކޮށްފައެވެ.
މިގޮތުން، ސަރުކާރުގެ ކަމާ ބެހޭ މުއައްސަސާތަކާއި، އިޖްތިމާއީ ޚިދުމަތްތެރިންނާއި، ދަރުމަވެރިންނާއި، އާންމު ފަރުދުންގެ އެއްބާރުލުން މި މަސައްކަތަށް ބޭނުންވާކަން ވުޒާރާއިން ވަނީ ފާހަގަކޮށްފައެވެ.