ކިއުބާގެ ކަރަންޓު ވިއުގަ އަލުން ގުޅާލެވުނު ނަމަވެސް، ކަރަންޓް އުފެއްދުން ދަށްކަމަށާޢި، ގިނަބަޔަކު އަދިވެސް ތިބީ ކަނުއަނދިރީގައި ކަމަށް މީޑިއާ ރިޕޯޓްތައް ބުނެފިއެވެ.
ކިއުބާގެ ވެރިރަށް ހަވާނާ އިން މިއަދު ހާމަކުރި ގޮތުގައި، އެ ޤައުމުގެ ޤައުމީ ކަރަންޓު ވިއުގަ ވަނީ އަލުން ގުޅާލެވިފައެވެ. ނަމަވެސް، އިއްޔެ ކަރަންޓު ޕްލާންޓެއް ހަލާކުވެ، އެތައް މިލިއަން ރައްޔިތުންނަށް ކަރަންޓުގެ ޚިދުމަތްވަނީ މެދުކެނޑިފައެވެ.
ކިއުބާގެ އެނަރޖީ މިނިސްޓްރީގެ ދާއިރާ ބަލަހައްޓާ ލާޒަރޯ ގުއެރާ ވިދާޅުވީ، ކަރަންޓު ވިއުގަ މިހާރު ދަނީ އާންމު ގޮތެއްގައި މަސައްކަތްކުރަމުންނެވެ. ނަމަވެސް، އުފެއްދުން ދަށްވެފައިވާތީ، ބޭނުންވާ މިންވަރަށް ކަރަންޓު އުފެއްދޭ ވަރަށް ޤާބިލުކަމެއް ނެތެވެ.
ހަވާނާގެ ކަރަންޓު ކުންފުނިން ބުނި ގޮތުގައި، ވެރިރަށުގެ ހުރިހާ ހޮސްޕިޓަލްތަކަކަށް ކަރަންޓު ލިބެމުންދެއެވެ.
ކިއުބާގެ ކަރަންޓު ވިއުގަ ވަނީ އަހަރުތަކެއް ވަންދެން މެދުކެނޑިފައެވެ. ތެލުގެ ދަތިކަމާއި، ގުދުރަތީ ކާރިސާތަކާއި، އިޤްތިޞާދީ ހީނަރުކަމުގެ ސަބަބުން، ސަރުކާރަށް ވަނީ ކަރަންޓު ވިއުގައިގެ ވީރާނާވެފައިވާ ވަސީލަތްތައް ބެލެހެއްޓުމަށް ދަތިވެފައެވެ.
ވެނެޒުއެލާ، ރަޝިޔާ އަދި މެކްސިކޯ އިން އިމްޕޯޓްކުރާ ތެލުގެ މިންވަރު ދަށްވުމުގެ ސަބަބުން، މިއަހަރު ކަރަންޓު ވިއުގަ ވަނީ ނިކަމެތި ހާލަތަކަށް ގޮސްފައެވެ. މީގެ ސަބަބުން، މުޅި ޤައުމަށް ކަރަންޓު ކެނޑުމުގެ ހާދިސާތައް ތަކުރާރުވެ، ރައްޔިތުންގެ މެދުގައި ހަމަނުޖެހުމާއި ނުރުހުން އިތުރުވެފައި ވެއެވެ.