ޑީއާރްޕީގެ ޒައީމް މައުމޫން އަބްދުލް ގައްޔޫމް މިއަދު ހެނދުނު ގ.ދކާޑެއްދޫއަށް ވަޑައިގަތުމުން އެމަނިކުފާނަށް މަރުހަބާ ކިޔުމަށް އެއާޕޯޓު ސަރަހައްދަށް އެއްވި ތިބި ޑީއާރްޕީގެ ސަޕޯޓަރުންތަކަކާއި އެމްޑީޕީގެ ބަޔަކާ ދެމެދު ހޫނު ޒުވާބުތަކެއްކޮށް، ހަމަނުޖެހުމެއް ހިންގައިފި އެވެ.
ޑީއާރްޕީގެ އެއް ނައިބު ލީޑާ އިލްހާމް އަހްމަދު ވިދާޅުވީ، ކުރީގެ ރައީސް މައުމޫނާއެކު ޕާޓީގެ އިސް ބޭފުޅުންކޮޅެއް މިއަދު ހެނދުނު 11:30 އެހާކަންހާއިރު ކާޑެއްދޫ އެއާޕޯޓަށް ވަޑައިގެންނެވީ، ކައުންސިލް އިންތިހާބަށް ކެމްޕޭނުކުރެއްވުމަށް ގއ. ވިލިނގިއްޔަށް ވަޑައިގަތުމަށް ކަމަށެވެ. ނަމަވެސް، އެއާޕޯޓަށް ވަޑައިގެންނެވިއިރު އެތަނުގައި ޑީއާރްޕީގެ ސަޕޯޓަރުންގެ އިތުރަށް އެމްޑީޕީގެ ގާތްގަނޑަކަށް 25 މީހުން އެއްވެ ތިބި ކަމަށެވެ. އަދި އެމީހުން ތިބީ ބޮލުގައި ރީނދޫ ފޮތި ކޮޅު ބަނދެގެން، ހަތިޔާރުގެ ގޮތުގައި ބޭނުންކުރެވޭނެ ލަކުޑިބުރި ފަދަ އެއްޗެހި ހިފައިގެން ކަމަށް ވެސް ވިދާޅުވި އެވެ.
އަދި އެއާޕޯޓުން ޑީއާރްޕީގެ އިސްވެރިންނާއި ޕާލިމެންޓްރީ ގްރޫޕް މެމްބަރުން ނުކުމެވަޑައިގެންނެވުމުން، އެމީހުން "އަރައިގަތީ" ކަމަށާއި އަދި އެ މާރާމާރީ ތެރޭގައި އުމަރު ނަސީރުގެ ބޮލުގައި ދަނޑިއަކުން ޖެހި، ވަރަށް ބޮޑަށް އޭނާގެ ބޯ ދުޅަވެފައިވާ ކަމަށެވެ.
"މާރާމާރީ ހިންގުމަށް ތައްޔާރުކޮށްފަ ހުރި ޒާތަށް ދިދައިގެ ދަނޑިތައް ވެސް ހުރީ. ލަޓި ބުރި ކަހަލަ އެއްޗެހި ވެސް ހުރި އެމީހުން އަތުގައި. ދެން އެހާހިސާބުން އަރައިގަތީ. އަރައިގަތުމުގެ ތެރޭގައި އުމަރު ނަސީރުގެ ބޮލުގެ ކުރިމަތިން ކަހަލަ ގޮތަކަށް ޖެހުމުގެ ސަބަބުން ވަނީ ވަރަށް ބޮޑަށް ދުޅަވެފައި. އަޅުގަނޑުމެން ތެރެއިން މީހުންނަށް އެކިވަރުގެ ހާނިއްކަތައް ލިބިފައިވަނީ،" ރައްޔިތުންގެ މަޖިލީހުގެ ގެމަނަފުށި ދާއިރާގެ މެމްބަރު އިލްހާމް ވިދާޅުވި އެވެ.
އިލްހާމް ވިދާޅުވީ، އެ ހަމަނުޖެހުމުގައި ކުރީގެ ރައީސް މައުމޫނުގެ ހަށިކޮޅަށް އެއްވެސް ހާނިއްކައެއް ލިބިވަޑައިގެންފައިނުވާ ކަމަށެވެ.
އަދި މާރާމާރީ ހިންގި ގްރޫޕް ޖެޓީ މަތީ މަޑުކޮށްގެން ތިބެ މަސައްކަތްކުރަމުންދަނީ ޑީއާރްޕީގެ ޓީމަށް ވިލިނގިއްޔަށް ވަޑައިނުގެންނެވޭނެ ގޮތަށް ހެދުމަށް ކަމަށް ވެސް އޭނާ ވިދާޅުވި އެވެ. އަދި ސަލާމަތީ ބާރުތަކުން މިހާރު އެ ސަރަހައްދު ކްލިއާ ކުރުމުގެ މަސައްކަތް ކުރަމުންދާ ކަމަށް ވެސް އޭނާ ވިދާޅުވި އެވެ.
ސަން އަށް އެނގިފައިވާ ގޮތުގައި، ކޯސްޓްގާޑުގެ އެހީތެރިކަމާއެކު ޑީއާރްޕީގެ ޓީމު މިހާރު ވަނީ ވިލިނގިއްޔަށް ފުރާވަޑައިގެންފަ އެވެ.
ފުލުހުން ބުނީ، ކާޑެއްދޫގައި ދެޕާޓީ މެދުގައި ހިނގައިގެން އުޅޭ ހަމަނުޖެހުން ކޮންޓްރޯލްކުރުމަށް ފުލުހުން މިހާރު ހަރަކާތްތެރިވަމުންދާ ކަމަށެވެ. އެ މައްސަލައާ ގުޅިގެން އެއްވެސް މީހަކު ހައްޔަރުކޮށްފައިނުވާ ކަމަށް ވެސް ފުލުހުން ބުންޏެވެ.
މި ހަމަނުޖެހުމާ ގުޅޭ ގޮތުން ބަހެއް ހޯދުމަށް އެމްޑީޕީގެ ލޯކަލް ކައުންސިލް އިންތިހާބުގެ ކެމްޕޭނު ތަރުޖަމާނު ޑރ.އަހްމަދު ޝަހީދަށް ގުޅިއިރު، ފޯނަށް ޖަވާބުނުދެއްވާތީ އޭނާގެ ބަހެއް ވަނީ ލިބޭގޮތް ނުވެފަ އެވެ.