ގދ. ތިނަދޫ އިންޖީނުގޭގައި ރޭ ރޯވެ ތިން ޖަނޭޓަރު ބޭނުންނުކުރެވޭ ވަރަށް ހަލާކުވުމުން ރަށް ހާލުގައި ޖެހިއްޖެ އެވެ. އަދި ވީހާވެސް އަވަހަކަށް ދާއިމީ ކަރަންޓް ފޯރުކޮށްދިނުމުގެ މަސައްކަތް ފަށާފައިވާ ކަމަށް ފެނަކަ އިން މިއަދު ބުނެފި އެވެ. ރޭ ދަންވަރު ހިނގި އަލިފާނުގެ ހާދިސާގައި 1،000 ކޭވީ އާއި 720 އަދި 600 ކޭވީގެ ތިން ޖަނެރޭޓަރު ވެސް ބޭނުން ނުކުރެވޭ ވަރަަށް އަނދާފައި ކަމަށް ފެނަކައިގެ މެނޭޖިން ޑިރެކްޓަރު މުހައްމަދު ނިމާލް "ހަވީރަ"ށް ވިދާޅުވި އެވެ. އަދި އިންޖީނުގޭގެ ފުރާޅުމަތީގައި ބަހައްޓާފައި ހުރި 172 ސޯލާ ޕެނަލްގެ ތެރެއިން ދެބައިކުޅަ އެއްބައި އަނދާފައިވާ ކަމަށް ވެސް އޭނާ ވިދާޅުވި އެވެ. "މީގެ އިތުރުން އިންޖީނުގެ ޕެނަލްތައް ވެސް އެވަނީ އަނދައިގެން ގޮސްފައި. މިއީ ވަރަށް ބޮޑު ގެއްލުމެއް. ލިބުނު ގެއްލުން ބަލަމުން މިހާރު މި އަންނަނީ،" ނިމާލް ވިދާޅުވި އެވެ. ފެނަކައިގެ އެމްޑީ ނިމާލް ނޫސްވެރިންނާ ވާހަކަ ދައްކަވަނީ: ތިނަދު އަށް ވީހާވެސް އަވަހަަކަށް ދާއިމީ ކަރަންޓު ފޯރުކޮށްދެވޭތޯ ބަލަމުން އަންނަ ކަމަށް ވިދާޅުވި.---ހަވީރު ފައިލް ފޮޓޯ ގާތްގަނޑަކަށް 10،000 މީހުންގެ އާބާދީއެއް އޮންނަ ތިނަދޫގައި ރޭ ދަންވަރުން ފެށިގެން ކަރަންޓެއް ނެތެވެ. ގދ. އަތޮޅުގައި އޮތް އެންމެ ބޮޑު ރަށުގެ މީހުން މިވަގުތު އުޅެނީ ވަރަށް ދަތި ހާލުގަ އެވެ. ރަށަށް ފެން ދޫކުރަނީ ފެން ޕްލާންޓުން ކަމަށް ވާއިރު، ހުރީ ދެ ދުވަހަށް ބޭނުންވާ ފެނެވެ. ރަށުގެ ފިހާރަތަކާއި ގޭގޭގައި ހުރި ފިނިކުރި މަހާއި ކުކުޅުގެ ބާވަތްތަކަށް ހަދާނެ ގޮތެއް ނެތެވެ. މިރެ އަށް ފުޅިބައްތި ބޭނުންވާއިރު، ސާފުތެޔޮ ގަތުމަށް މިހާރު ވެސް ބައެއް ފިހާރަތަކުގެ ކައިރީގައި ވަނީ ކިޔޫ ހަދާފައި ކަމަށް ތިނަދޫން ވާހަކަ ދެއްކި މީހަކު ބުންޏެވެ. ނިމާލް ވިދާޅުވީ ތިނަދު އަށް ވަގުތީ ކަރަންޓު ދިނުމުގެ މަސައްކަތް ވަގުތުން ފަށައި މިހާރު ވަނީ ކުޑަ ޖަނެރޭޓަރަކުން ތިނަދޫ ހޮސްޕިޓަލަށް ކަރަންޓު ދޫކޮށްފައި ކަމަށެވެ. އެއީ ތިނަދޫގައި މަގު ހަދާ މީހުން ބޭނުންކުރާ ޖަނެރޭޓަރެކެވެ. "ރަށުގައި ހުރީ ދެ ދުވަހަށް ބޭނުންވާ ފެން ކަމަށް ވުމުން، ފެން ޕްލާންޓު ހިންގުމަށްޓަކައި، ގާދޫގައި ހުރި 150 ކޭވީގެ ޖަނެރޭޓަރެއް މިހާރު ތިނަދު އަށް ގެންދިއުމަށް އެދަނީ ދަތުރުކުރަމުން. މިއަދު ހަވީރު ވާންވާއިރަށް އެ ޖަނެރޭޓަރު ތިނަދު އަށް ގެންދެވޭވަރުވާނެ،" ނިމާލް ވިދާޅުވި އެވެ. ތިނަދޫ އިންޖީނުގޭގައި ރޭ ދަންވަރު ރޯވެ އަނދާފައި: އެތަނުގައި ހުރި ތިން ޖަނެރޭޓަރު ވެސް ވަނީ ބޭނުން ނުކުރެވޭ ވަރަށް އަނދާފައި. މީގެ އިތުރުން ގުޅިފަޅުގައި އެމްޑަބްލިއުއެސްސީން ބަހައްޓާފައިވާ އެއް މެގަވޮޓުގެ ޖަނަރޭޓަރެއް ވެސް މިއަދުގެ ވަގުތެއްގައި ތިނަދު އަށް ފުރުވާލަން މަސައްކަތް ކުރައްވާ ކަމަށް އޭނާ ވިދާޅުވި އެވެ. "އެ ޖަނެރޭޓަރު ވެސް މިއަދު ހަވީރު ތިނަދު އަށް ފުރުވާލާނަން. ދެން ނަގާނީ އެ ރަށަށް ދާން ނަގާނެހާ ވަގުތު،" ނިމާލް ވިދޅުވި އެވެ. އޭނާ ވިދާޅުވި ގޮތުގައި ތިނަދު އަށް ދާއިމީ ކަރަންޓު ފޯރުކޮށްދިނުމާ ގުޅޭ ގޮތުން ކަމާ ބެހޭ އިދާރާތަކާ އެކު އަންނަނީ މަޝްވަރާ ކުރައްވަމުންނެވެ. ތިނަދޫން ވާހަކަ ދެއްކި މީހަކު ބުނީ ޕްލާންޓުން ފެން ދޫކުރުން ލިމިޓް ކުރަން ވާހަކަ ދައްކަމުން އަންނަ ކަމަށެވެ. "އޭރުން ވެސް ހަފުތާއެއްހާ ދުވަސް ވަންދެން ހިފަހައްޓާލެވޭވަރުވާނީ،" އޭނާ ބުންޏެވެ. ތިނަދޫ އިންޖީނުގޭގައި ރޯވި ސަބަބެއް އަދި ނޭނގެ އެވެ. ރަށުގެ ކައުންސިލަރަކު މިއަދު ވިދާޅުވީ ފުރަތަމަ ރޯވީ، އިންޖީނުގެއާ ޖެހިގެން ހުރި، އެތަނުގެ ގުދަނުގައި ކަމަށާއި އިންޖީނުގެއާ ހަމައަށް އަލިފާންގަނޑު ފެތުރުނީ ކަމަށް ބައެއް މީހުން ބުނާ ކަމަށެވެ. އެ ގުދަނުގައި ހުރީ ޕްލާސްޓިކް ޑަސްޓްބިންތަކެއް ކަމަށް ކައުންސިލްގެ މެމްބަރު ވިދާޅުވި އެވެ.