މިދިޔަ ހުކުރު ދުވަހު މަރުވީ ވައްކަން ކުރަން އުޅުމުގެ ތެރޭގައި ކަރަންޓުގައި ޖެހުނު މީހެއް ކަމަށް ފުލުހުން ބުނެފިއެވެ.
ހެންވޭރު ގެއެއްގައި ހަބަރު ހުސްވެފައި މީހަކު އޮތް ކަމުގެ ރިޕޯޓު ފުލުހުންނަށް ލިބިފައިވަނީ މިދިޔަ ހުކުރު ދުވަހުގެ މެންދުރު 1:20 ގައެވެ. އުމުރުން 43 އަހަރުގެ ފިރިހެން މީހާއަށް ފަރުވާދިނުމަށް އެޑީކޭ ހޮސްޕިޓަލަށް ގެންދިޔަ އިރުވެސް މަރުވެފައިވާ ކަމަށް ފުލުހުން ވަނީ ބުނެފައެވެ.
ފުލުހުން މީޑިއާތަކަށް މިއަދު ފޮނުވި މެސެޖެއްގައި ބުނީ ހެންވޭރު ގެއެއްގެ ތެރޭގައި ހަބަރު ހުސްވެފައި އޮއްވައި ފެނުނު މީހާއަކީ އެގެއިން ކަރަންޓު ކޭބަލެއް ވަގަށް ނެގުމަށް އެ ގެއަށް ވެދެ އުޅުނު މީހެއް ކަމަށާއި އޭނާ މަރުވެފައިވަނީ ކަރަންޓު ކޭބަލް ބުރިކުރަން އުޅުމުގެ ތެރޭގައި ކަރަންޓުގައި ޖެހިގެން ކަމަށް ތަހުގީގަށް ބެލެވޭ ކަމަށެވެ.
މަރުވި މީހާގެ ހަށިގަނޑުން، ކަރަންޓުގައި ޖެހިފައި ހުރިކަމުގެ ނިޝާންތައް ފެންނަން ހުރި ކަމަށާއި އޭނާ ބިންމައްޗަށް ވެއްޓިފައި އޮތް ތަނުން، ވައްކަން ކުރަން ބޭނުންކުރާ އާލާތްތައް ވެސް ފެނިފައިވާ ކަމަށް ފުލުހުން ބުންޏެވެ.