ކާބޯތަކެތީގެ ރައްކާތެރިކަމުގެ ގާނޫނުގެ ދަށުން ހަދަން ޖެހޭ 20 ގަވާއިދުގެ ދަށުން މިހާތަނަށް ހަދާފައި އޮތީ އެންމެ ހަތަރު ގަވާއިދު ކަމަށްވާތީ އެ މައްސަލަ ރައްޔިތުންގެ މަޖިލީހަށް ހުށަހަޅައިފި އެވެ.
އޮގަސްޓު 2021، ގައި މަޖިލީހަށް ހުށަހެޅި މި ބިލު ފާސްކޮށް ގާނޫނެއްގެ ގޮތުގައި އަމަލުކުރަން ފެށީ އޮގަސްޓު 23، 2024 ގަ އެވެ. އެ ގާނޫނުގައި ޖުމުލަ 20 ގަވާއިދެއް އެކުލަވާލަން ޖެހޭނެ ކަމަށް ބަޔާންކޮށްފައިވެ އެވެ.
އޭގެ ތެރެއިން ބައެއް ގަވާއިދުތައް ގާނޫނަށް އަމަލުކުރަން ފަށާތާ ތިން މަސްދުވަހުގެ ތެރޭގައި އަދި އަނެއް ބައި ގަވާއިދުތަ ހަ މަސްދުވަހުގެ ތެރޭގައި އެކުލަވާލައި ގެޒެޓު ކުރަން ޖެހެ އެވެ.
މި ގަވާއިދުތައް ހަދަން ޖެހެނީ މޯލްޑިވްސް ފުޑް އެންޑް ޑްރަގު އޮތޯރިޓީ (އެމްއެފްޑީއޭ) އިންނެވެ.
މި މައްސަލަ މަޖިލީހަށް ހުށަހެޅުއްވީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) އެވެ. އޭނާ ވަނީ މަޖިލިސް ގަވާއިދު ކޮމިޓީ މެދުވެރިކޮށް ހެލްތު މިނިސްޓްރީން މި ގަވާއިދުތައް އެކުލަވާލައި ގެޒެޓުނުކުރާ ސަބަބު ސާފުކޮށްދިނުމަށް އެދިފަ އެވެ.