ކުޑަކަމުދާން ބޭނުންވެފައި ހުރި ނަމަވެސް، ކުޑަކަމުދާއިރު މަދު މިންވަރަކަށް ދެވި ދިލަނެގުމުގެ އިހުސާސް ކުރެވޭ ހެއްޔެވެ؟ ގިނަ ބަޔަކު މިއަށް "ދިލަނެގުން" ނުވަތަ "ކުޑަކަމުދާއިރު އުނދަގޫވުން" ކިޔާއިރު، ބައެއް މީހުން ގިނައިން ފެންބޮއެގެން ނުވަތަ ފައިގެ ބޮޑުވައި އިނގިލީގައި ރަބަރު ބޭންޑެއް އައްސައިގެން މިއަށް ފަރުވާ ހޯދަން އުޅެއެވެ. ނަމަވެސް, މިއީ އެއްވެސް އިލްމީ އަސާސެއް ނެތް، އަދި މި މައްސަލައަށް އޮތް ހައްލެއް ނޫން ކަމަށް އިންޑޮނޭޝިއާގެ އީއެމްސީ ހެލްތުކެއާގައި މަސައްކަތް ކުރައްވާ ކުޑަކަމުދާ ނިޒާމުގެ ބަލިތަކާއި އޮޕަރޭޝަންތަކަށް ޚާއްޞަ ޑޮކްޓަރު ކެވިން އެންތަނީ ޖީ. ޓަމްޕުބޮލޮން ވަނީ ވިދާޅުވެފައެވެ. 'ޔޫޓީއައި' މިއީ ކޮންމެ މީހަކަށްވެސް ތަހައްމަލުކުރަން ޖެހިދާނެ ބައްޔަކަށްވީ ނަމަވެސް، ފިރިހެނުންނަށް ވުރެ އަންހެނުންނަށް މި މައްސަލަ ދިމާވާ މިންވަރު ގިނަ ކަމަށް ދިރާސާވެރިން ވިދާޅުވޭ--ފޮޓޯ/އީއެމްސީ ކުޑަކަމުދާއިރު އުނދަގޫވުމަކީ ކުޑަކަމުދާ ނިޒާމަށް ޖެހޭ އިންފެކްޝަން 'ޕާސިސްޓެންޓް ޔުރިނަރީ ޓްރެކްޓް އިންފެކްޝަންސް' (ޔޫޓީއައި) ޖެހިފައިވާ ކަމުގެ ވަރުގަދަ ނިޝާނެކެވެ. މިކަމަށް އެކަށީގެންވާ ފަރުވާ ނުދީފިނަމަ، އިންފެކްޝަން ކިޑްނީއާ ހަމައަށް ފެތުރި، ސީރިއަސް މައްސަލަތަކެއް ކުރިމަތިވެދާނެއެވެ. ކުޑަކަމުދާ ނިޒާމުގެ އިންފެކްޝަން ނުވަތަ 'ޔޫޓީއައި'އަކީ ކޮބާ؟ މި އިންފެކްޝަނަކީ، ބެކްޓީރިއާ (ގިނައިން E. coli) ކުޑަކަމުދާ ހޮޅީގެ ތެރެއިން ވަދެ، ބްލެޑާގައި އާލާވުމުން ދިމާވާ ހާލަތެކެވެ. މިއީ ކޮންމެ މީހަކަށް ވެސް ތަހައްމަލުކުރަން ޖެހިދާނެ ބައްޔަކަށްވީ ނަމަވެސް، ފިރިހެނުންނަށް ވުރެ އަންހެނުންގެ ކުޑަކަމުދާ ހޮޅި ކުރުވުމުގެ ސަބަބުން އަންހެނުންނަށް މި ބަލި ޖެހުމުގެ ފުރުސަތު ބޮޑުކަމަށް ޑރ. ކެވިން އެންތަނީ ޖީ. ޓަމްޕުބޮލޮން ވަނީ ވިދާޅުވެފައިވެއެވެ. ކުޑަކަމުދާއިރު އިންތިހާއަށް ތަދުވުމުގެ ކުރިން މި އަލާމާތްތަކަށް ވަގުތުން ސަމާލުވާށެވެ. ގިނަގިނައިން ކުޑަކަމުދާން ބޭނުންވީ ނަމަވެސް، ކުޑަކަމުދާއިރު މަދު މިންވަރެއް ބޭރުވުން. ކުޑަކަމުދާއިރު ނުވަތަ ދިޔުމަށް ފަހު ދިލަނެގުމުގެ އިހުސާސްވުން. ކުޑަކަމުދާ އެއްޗެހި ފުސްވުން، ނުވަތަ ނުބައި ވަސް ދުވުން. ބައެއް ފަހަރު ކުޑަކަމުދާ އެއްޗެހީގައި ލޭގެ އަސަރު ހުރެ ރަތްކުލައަކަށް ހުރެދާނެއެވެ. އުނަގަނޑާ ދިމާލުން ބަނޑުގެ ތިރީގައި ރިއްސުން ނުވަތަ އުނދަގޫވުން. ހުން އައުމާއި ހީކެރުވުން މި ދެންނެވުނު އަލާމާތްތައް ފެނިއްޖެނަމަ، އިންފެކްޝަން ކިޑްނީއަށް ފެތުރެމުންދާކަމުގެ ބިރު އޮންނަކަމަށް ޑރ. ކެވިން ފާހަގަކުރައްވާފައިވެއެވެ. ޑޮކްޓަރެއްގެ ލަފައާ ނުލައި އަމިއްލައަށް ސިއްހީ މައްސަލަތަކަށް ފަރުވާ ހޯދުމަކީ ރައްކާތެރިގޮތެއް ނޫންކަމަށް ސިއްހީ މާހިރުން ވިދާޅުވޭ--ފޮޓޯ/އީއެމްސީ ދިރިއުޅުމުގެ ބައެއް އާދަތަކުގެ ސަބަބުން ނޭނގި ނަމަވެސް 'ޔޫޓީއައި' ޖެހުމުގެ ފުރުސަތު އިތުރުވެއެވެ. އޭގެ ތެރޭގައި: ކުޑަކަމު ނުގޮސް ގިނައިރު ހިފަހައްޓައިގެން ހުރުން. ބޯންވާ ވަރަށް ފެން ނުބުއިން. ފާޚާނާ ކުރުމަށް ފަހު ސާފުކުރުމުގައި ގެންގުޅޭ ނުބައި އާދަތައް (ސާފުކުރަންވާނީ ކުރިމަތިން ފަހަތަށެވެ) ސިއްހީ ގޮތުން އެކަށީގެންނުވާ، ބާރުގަދަ ސައިބޯނި ފަދަ ތަކެތި ލަދުވެތި ގުނަވަންތަކުގައި ބޭނުންކުރުމުގެ ސަބަބުން ހަށިގަނޑަށް ފައިދާހުރި ބެކްޓީރިއާތަކަށް ގެއްލުންވުން، ހިމެނެއެވެ. މިފަދަ ކަންކަމަށް ޑޮކްޓަރެއްގެ ލަފައާ ނުލައި އަމިއްލައަށް އެންޓިބަޔޮޓިކް ނުވަތަ ތަފާތު "ހާބަލް" ފަރުވާ ހޯދުމަކީ ނުރައްކާތެރި ކަމެއް ކަމަށް ޑރ. ކެވިން އެންތަނީ ފާހަގަކުރައްވާފައިވާއިރު، މިގޮތަށް އަމަލުކުރުމުން ބެކްޓީރިއާތައް އެ ބޭހަށް ނުގުޑާ ގޮތް މެދުވެރިވުމުގެ ފުރުސަތު ބޮޑު ކަމަށް ވަނީ ވިދާޅުވެފައެވެ. ކުޑަކަމުދާ މިންވަރު އިތުރުވުން ނުވަތަ ތަދުވުން 24 ގަޑިއިރަށްވުރެ އިތުރުވާނަމަ، ލަސްނުކޮށް ސިއްހީ އެހީތެރިކަން ހޯދުމަށް ސިއްހީ މާހިރުން އިރުޝާދު ދެއްވައެވެ.