އެމެރިކާގެ ރައީސް ޑޮނަލްޑް ޓްރަމްޕް، ދެކުނު ކޮރެއާއިން އެމެރިކާއަށް އެތެރެކުރާ މުދަލުން ނަގާ ޓެރިފް %25އަށް ބޮޑުކުރައްވާނެކަން އިއްޔެ އިއުލާނު ކުރައްވައިފި އެވެ.
ޓްރަމްޕް މި ނިންމެވުން ނިންމެވީ މިދިޔަ އަހަރު ދެ ގައުމުގެ ދެމެދުގައި ވެވުނު ވިޔަފާރީގެ އެއްބަސްވުމަށް ދެކުނު ކޮރެއާއިން ފުރިހަމައަށް އަމަލުކުރަމުން ނުދާ ކަމަށް ތުހުމަތުކުރެއްވުމަށް ފަހުގަ އެވެ.
ސޯޝަލް މީޑިއާގައި ކުރެއްވި ޕޯސްޓެއްގައި ޓްރަމްޕް ވިދާޅުވީ، މީގެ ކުރިން %15ގައި ހުރި މި ޓެރިފް، އުޅަނދުތަކާއި ލަކުޑި ބޭސްފަރުވާގެ ސާމާނު އަދި އެހެނިހެން ހުރިހާ ބާވަތްތަކަކުން ބޮޑުކުރައްވާނެ ކަމަށެވެ.
ޓްރަމްޕް ވިދާޅުވި ގޮތުގައި، އެމެރިކާއިން އެއްބަސްވުމާ އެއްގޮތަށް ޓެރިފްތައް ކުޑަކުރުމުގެ މަސައްކަތް އަވަސްކުރި ނަމަވެސް، ދެކުނު ކޮރެއާގެ ގާނޫނު ހަދާ މަޖިލީހުން މި އެއްބަސްވުން ފާސްކުރުމަށް ވަނީ ލަސްތަކެއް ވެފަ އެވެ.
މި ނިންމުމާ ގުޅިގެން ދެކުނު ކޮރެއާއިން ބުނެފައިވަނީ ޓެރިފް ބޮޑުކުރިކަމުގެ ރަސްމީ އެންގުމެއް އަދި ލިބިފައިނުވާ ކަމަށާއި، މި މައްސަލައިގައި ވޮޝިންޓަނާ އެކު ކުއްލި މަޝްވަރާތަކެއް ބޭއްވުމަށް ބޭނުންވާ ކަމަށެވެ. އެ ގައުމުގެ އިންޑަސްޓްރީ މިނިސްޓަރު ކިމް ޖުންގް-ކްވާން، އެމެރިކާގެ ކޮމާސް ސެކްރެޓަރީ ހައޮވާޑް ލަޓްނިކްއާ ބައްދަލުކުރެއްވުމަށް ވީހާ ވެސް އަވަހަކަށް ވޮޝިންޓަނަށް ވަޑައިގަތުމަށް ވަނީ ހަމަޖެހިފަ އެވެ.
ދެ ގައުމުގެ ދެމެދުގައި މިދިޔަ އޮކްޓޯބަރު މަހު ވެވުނު އެއްބަސްވުމުގައި، ދެކުނު ކޮރެއާއިން އެމެރިކާގައި 350 ބިލިއަން ޑޮލަރު އިންވެސްޓްކުރުމަށް ވަނީ އެއްބަސްވެފަ އެވެ. މީގެ ބައެއް އިންވެސްޓްމަންޓްތައް އާގުބޯޓު ބަނުމުގެ ދާއިރާއަށް ހަރަދުކުރުމަށް ވަނީ ހަމަޖެހިފަ އެވެ.
މި އެއްބަސްވުން ދެކުނު ކޮރެއާގެ ގައުމީ މަޖިލީހަށް ހުށަހެޅީ މިދިޔަ 26 ނޮވެމްބަރުގަ އެވެ. އަދި އަންނަ މަހު މި އެއްބަސްވުން ފާސްކުރާނެ ކަމަށް އެ ގައުމުގެ މީޑިއާތަކުން ލަފާކުރެ އެވެ.
ޓެރިފަކީ މުދާ އެތެރެކުރާ ކުންފުނިތަކުން ދައްކަންޖެހޭ ޓެކްސެކެވެ. އެހެންކަމުން، މި ނިންމުމުގެ ސަބަބުން ދެކުނު ކޮރެއާއިން މުދާ ގަންނަ އެމެރިކާގެ ކުންފުނިތަކުން %25ގެ ޓެކްސެއް ދައްކަންޖެހޭނެ އެވެ.
ޓްރަމްޕްގެ ދެވަނަ ދައުރުގައި، ހާރިޖީ ސިޔާސަތުތައް ކުރިއަށްގެންދިއުމަށް ޓެރިފްގެ ބޭނުން ހަތިޔާރެއްގެ ގޮތުގައި ވަރަށް ގިނައިން ކުރައްވަމުން ގެންދަވަ އެވެ.
އެގޮތުން، ކެނެޑާއިން ޗައިނާއާ އެކު ވިޔަފާރީގެ އެއްބަސްވުމެއް ހަދައިފި ނަމަ %100ގެ ޓެރިފެއް ނަގާނެކަމުގެ އިންޒާރު މިދިޔަ ހޮނިހިރު ދުވަހު ވަނީ ދެއްވާފަ އެވެ. ނަމަވެސް ކެނެޑާގެ ބޮޑުވަޒީރު މާކް ކާނީ ވިދާޅުވީ އެ ގައުމުން ޗައިނާއާ އެކު މިނިވަން ވިޔަފާރީގެ އެއްބަސްވުމެއް ހެދުމަށް މަސައްކަތް ކުރަމުން ނުދާ ކަމަށެވެ.
މީގެ އިތުރުން، ޑެންމާކުގެ ބައެއްގެ ގޮތުގައި އޮންނަ ގްރީންލޭންޑް އެމެރިކާގެ ދަށަށް ގެނައުމަށް ކުރި މަސައްކަތަށް ދެކޮޅު ހެދި އަށް ގައުމަކުން އެތެރެކުރާ މުދަލުން ވެސް ޓެކްސް ނަގާނެކަމުގެ އިންޒާރު ޓްރަމްޕް ކުރިން ދެއްވި އެވެ. ނަމަވެސް ފަހުން އެ އިންޒާރު އަނބުރާ ގެންދެވީ އެކަމާ ގުޅޭ ގޮތުން ކުރިއެރުންތަކެއް ލިބިފައިވާ ކަމަށް ވިދާޅުވަމުންނެވެ.