މަރުގެ ހުކުމް ތަންފީޒުކުރުމަށް ޓަކައި، އެކަމަށް ޚާއްސަ ގާނޫނެއް އެކުލަވައިލުމަށް ޓަކައި ބަންޑާރަ ނައިބުގެ އޮފީހުން ޚާއްސަ ބިލެއް ޑްރާފްޓުކުރުމުގެ މަސައްކަތް އެބަކުރިއަށްދާ ކަމަށާއި، ރައްޔިތުންގެ މަޖިލީހުގެ މި ދައުރުގައި އެ ބިލް ހުށަހަޅާނެ ކަމަށް ރައީސް ޑރ. މުޙައްމަދު މުއިއްޒު މިއަދު ވިދާޅުވެއްޖެއެވެ. ރައީސް އޮފީހުގައި މިއަދު އޮތް ނޫސްވެރިންގެ ބައްދަލުވުމުގައި ރައީސް ވިދާޅުވީ، މަރުގެ އަދަބު ތަންފީޒުކުރުމަށް ޓަކައި ހުރިހާ މަރުހަލާއެއް ފުރިހަމަވެފައި ތިބި މީހުން އެބަތިބި ކަމަށެވެ. އެ ފަދަ ފަރާތްތަކަށް އެ އަދަބު ތަންފީޒުނުކުރުވައި މަޑު ޖެއްސުމަކީ އެ މަނިކުފާނަށް އޮތް ބާރެއް ނޫންކަމަށް ވެސް ރައީސް ވިދާޅުވިއެވެ. ނަމަވެސް މަރުގެ އަދަބު ތަންފީޒުކުރަންވާނީ ގަވައިދެއްގެ ދަށުން ނޫން ކަމަށާއި، އެއީ އެކަމަށް ޚާއްސަ ގާނޫނީ އޮނިގަނޑެއްގެ ތެރެއިން ކުރަންޖެހޭ ކަމެއް ކަމަށް ރައީސް ވިދާޅުވިއެވެ. އެހެންވެ، ބަންޑާރަ ނައިބުގެ އޮފީހުން މަރުގެ އަދަބު ތަންފީޒުކުރުމާ ބެހޭ ޚާއްސަ ގާނޫނެއް ތައާރަފްކުރަން ބިލެއް ޑްރާފްޓުކުރަމުން އަންނަކަމަށާއި، އެ މަސައްކަތް އޮތީ ނިމުމާ ގާތުގައިކަމަށް ރައީސް ވިދާޅުވިއެވެ. އަދި ރައްޔިތުންގެ މަޖިލީހުގެ މިހާރު ހިނގަމުން އަންނަ ދައުރުގެ ތެރޭ ބަންޑާރަ ނައިބުގެ އޮފީހުން އެ ބިލް ހުށަހަޅުއްވާނެކަމަށް ވެސް ރައީސް ވިދާޅުވިއެވެ.