ހޮރްމުޒް ކަނޑުއޮޅިން މިއަދު ދަތުރުކުރަމުންދިޔަ ތިން އުޅަނދަކަށް، އީރާނާ ގުޅުން އޮންނަ ފަރާތްތަކަކުން ފޮނުވާލި ހަމަލާތަކެއް އަމާޒުވެފައިވާ ކަމަށް ކަނޑުމަތީގެ ސަލާމަތީ ކަންކަން ބަލަހައްޓާ އިދާރާތަކުން ހާމަކޮށްފި އެވެ.
ތައިލެންޑްގެ ދިދަ ޖަހާފައިވާ މަޔޫރީ ނާރީ ނަމަކަށް ކިޔާ މުދާ އުފުލާ ބޯޓަށް ހަމަލާދީފައިވަނީ އޮމާންގެ އުތުރުން ގާތްގަނޑަކަށް 11 ނޯޓިކަލް މޭލު ބޭރުންނެވެ. މި ހަމަލާގެ ސަބަބުން ބޯޓުގައި އަލިފާން ރޯވުމާ ގުޅިގެން، ބޯޓުގެ ގިނަ ފަޅުވެރިން ވަނީ ރައްކާތެރިކަމަށްޓަކައި ބޯޓުން ބާލާފަ އެވެ.
އިނގިރޭސިވިލާތުގެ މެރިޓައިމް ޓްރޭޑް އޮޕަރޭޝަންސް އިން ކަށަވަރުކޮށްދިން ގޮތުގައި، ބޯޓުގައި ރޯވި އަލިފާން މިހާރު ވަނީ ނިއްވާލާފަ އެވެ. އަދި މި ހާދިސާގެ ސަބަބުން ތިމާވެއްޓަށް އެއްވެސް ގެއްލުމެއް ލިބިފައި ނުވާ ކަމަށާއި، ބޯޓު ބެލެހެއްޓުމަށް ބޭނުންވާ މިންވަރަށް ފަޅުވެރިން ބޯޓުގައި މަޑުކޮށްފައިވާ ކަމަށް ވެސް އެ އިދާރާއިން ބުނެފައިވެ އެވެ.
މީގެ އިތުރުން ހިނގި ހާދިސާއެއްގައި، ޔޫއޭއީގެ ރައުސް އަލް-ހައިމާގެ ހުޅަނގު އުތުރުން 25 ނޯޓިކަލް މޭލު ބޭރުން، ޖަޕާނުގެ ވަން މެޖެސްޓީ ނަމަކަށް ކިޔާ ކޮންޓެއިނާ އުފުލާ ބޯޓަކަށް ވެސް ވަނީ ހަމަލާއެއް އަމާޒުވެފަ އެވެ. މި ހަމަލާގައި ބޯޓަށް ކުދިކުދި ގެއްލުންތައް ލިބުނު ނަމަވެސް، ހުރިހާ ފަޅުވެރިންގެ ހާލު ރަނގަޅު ކަމަށާއި ބޯޓު މިހާރު ރައްކާތެރި ބަނދަރަކަށް ދަތުރުކުރަމުންދާ ކަމަށް މައުލޫމާތު ލިބެ އެވެ.
ތިންވަނައަށް ހަމަލާ އަމާޒުވީ މާޝަލް އައިލެންޑްސްގެ ދިދަ ޖަހާފައިވާ ސްޓާ ގްވިނެތު ނަމަކަށް ކިޔާ ބޯޓަކަށެވެ. ދުބާއީގެ ހުޅަނގު އުތުރުން 50 މޭލު ބޭރުން ދިން މި ހަމަލާގައި ބޯޓުގެ ބޭރު ފަށަލައަށް ގެއްލުން ލިބިފައިވާ ކަމަށް މެރިޓައިމް ރިސްކް މެނޭޖްމަންޓް ކުންފުނި، ވެންގާޑުން ބުނެފައިވެ އެވެ. މި ބޯޓުގެ ފަޅުވެރިން ވެސް ތިބީ ސަލާމަތުންނެވެ.
ދުނިޔޭގެ ތެލާއި ގޭހުގެ ސަޕްލައިގެ ގާތްގަނޑަކަށް %20 ދަތުރުކުރާ ހޮރްމުޒް ކަނޑުއޮޅީގެ ދަތުރުފަތުރު ވަނީ، މިދިޔަ މަހުގެ 28ގައި އީރާނުގެ ހަމަނުޖެހުންތައް ފެށުނު ފަހުން ވަރަށް ބޮޑަށް މަދުވެފަ އެވެ.
މި ހަމަލާތަކާ އެކު، ހަމަނުޖެހުންތައް ފެށުނު ފަހުން އެ ސަރަހައްދުގައި ހަމަލާދިން އުޅަނދުތަކުގެ އަދަދު މިހާރު ވަނީ މަދުވެގެން 14އަށް އަރާފަ އެވެ. މީގެ ސަބަބުން ދުނިޔޭގެ ހަކަތަ ފޯރުކޮށްދޭ މަގުތަކުގެ ރައްކާތެރިކަމާ މެދު އޮތް ކަންބޮޑުވުންތައް ވަނީ އިތުރަށް ބޮޑުވެފަ އެވެ.