ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ރިޔާސީ ޕްރައިމަރީގައި ވާދަކުރައްވާނެކަން އިއުލާންކޮށްފައިވާ އުމަރު ނަސީރު އެޕާޓީގެ ކޮންގްރެސްގައި ތާއީދުކުރައްވާ “ޓީމް އުމަރު” ގައި ތިބީ ނިކަމެތިން ކަމަށް ޕީޕީއެމްގެ އިންތިގާލީ ނައިބު ރައީސްގެ މަގާމުގައި މިހާރު ހުންނެވި އުމަރު ނަސީރު މިރޭ ވިދާޅުވެއްޖެ އެވެ.
މިމަހުގެ 17 އިން 19 އަށް ދަރުބާރުގޭގައި އޮންނަ ޕީޕީއެމްގެ ފުރަތަމަ ކޮންގްރެސްގައި "ޓީމް އުމަރު" ގެ ފަރާތުން ކުރިމަތިލައްވާފައިވާ ކެންޑިޑޭޓުން ތައާރަފްކުރުމަށް މިރޭ އާޓިފިޝަލް ބީޗުގައި ބޭއްވި ޖަލްސާގައި ވާހަކަދައްކަވަމުން އުމަރު ނަސީރު ވިދާޅުވީ މިގައުމުގެ ރައްޔިތުންނަށް މިގައުމު ބޭނުންވި ގަޑީގައި ބަތޮލުންނަށްވެ މިގައުމު ބޭނުންވި ގަޑީގައި ކުރީ ސަފަށް އަބަދުވެސް ނިކުންނަނީ އެންމެ އާދައިގެ މީހުން ކަމަށެވެ. އަދި ޓީމު އުމަރުގައި ތިބީ އާދައިގެ މީހުންނޭ ބުނާތީ އެއްވެސް ވަރަކަށް ކަންބޮޑުވެވަޑައިނުގަންނަވާ ކަމަށް ވެސް އުމަރު ވިދާޅުވި އެވެ.
"އެއީ ތެދެކޭ އިނގޭތޯ ނިކަމެތިންނޭ އުމަރު ނަސީރު ޓީމުގައި ތިބީ، ކީއްވެގެންތޯ؟ މިގައުމުގެ ރައްޔިތުންނަށް މިގައުމު ބޭނުންވި ގަޑީގައި، މިގައުމުގެ ހީރޯއިންނަށް މިގައުމު ބޭނުންވި ގަޑީގައި ކުރީ ސަފަށް އަބަދުވެސް ނިކުންނަނީ، ދިވެހި ތާރީހް އަބަދުވެސް ހެކިދޭ ކަމަކީ ކުރީ ސަފަށް ނިކުންނާނީ އެންމެ އާދައިގެ މީހުން، ޕޯޗުގީޒުން މިގައުމު އަޅުވެތި ކުރި ގަޑީގައި ޕޯޗުގީޒުންނާއި ދެކޮޅަށް ނިކުތީ އުތީމުން އައި ތިން ކުދިން." އުމަރު ވިދާޅުވި އެވެ.
އޭނާ ވިދާޅުވީ ޓީމު އުމަރުގައި ތައުލީމީ މީހުން ވެސް ތިބިކަން، ޒުވާނުން ވެސް ތިބިކަން، ލޯޔަރުން ވެސް ތިބިކަން، ފޯވާޑް ލައިން ވެސް އެބައޮތްކަން މިރޭ އިނގިގެން ގޮސްފައިވާ ކަމަށާއި ކަރުނަ ގޭހުގެ ތެރެއިންނާއި ރަބަރު ވަޒަނުގެ ތެރެއިންނާއި ހޮސްޕިޓަލުތަކުގެ އެނދުތަންމަތީން ތިން އަހަރުވަންދެން ދަތުރުކޮށް ނަތީޖާދައްކާދީފައިވާ ކަމަށާއި އަދި ކުރިއަށް އޮތްތަނުގައި ނަތީޖާ ދައްކާދޭނެ ކަމަށެވެ. އަދި އުމަރު ވަނީ "ޓީމް އުމަރު" ގެ ބޭފުޅުންނަށް ލީޑާޝިޕް ދެއްވުމަށް މިރޭ ގޮވާލައްވާފައެވެ.
އިސްލާމިކް ޑިމޮކްރަޓިކް ޕާޓީ (އައިޑީޕީ) ގެ ރައީސްކަން ވެސް ކުރައްވާފައިވާ އުމަރު ނަސީރު ވިދާޅުވީ ޓީމް އުމަރަކީ ވޭތުވެދިޔަ ތިން އަހަރު ދުވަސް ވަންދެން ދިވެހިރާއްޖޭގެ ހުރިހާ ސަރަހައްދެއްގައި ހުރިހާ ކަންކޮޅެއްގައި ހުރިހާ ކޯޓުތަކެއްގައި ހުރިހާ ޓީވީ ސްޓޭޝަންތަކެއްގައި މަގުތަކުގައި އަދި ކޮމާންޑު ސެންޓަރުތަކުގައި ވެސް މަސައްކަތްކޮށް މިގައުމަށް ބަދަލު ގެނެސްދިން މިގައުމަށް މިގައުމުގެ ޒުވާނުންނަށް ބޭނުންވި ގަޑީގައި ނިކުމެ މިގައުމަށް ހިދުމަތްކޮށްފައިވާ ފޯވާޑް ލައިން ކަމަށެވެ.
"އަޅުގަނޑު ޕީޕީއެމްގެ ކޮންގްރެސްއަށް ވަޑައިގެން ތިއްބެވި ބޭފުޅުންނަށް ދަންނަވާނީ މި ފޯވާޑް ލައިން ތިޔަބޭފުޅުން އިންތިހާބުކޮށްދެއްވާށޭ، މި ފޯވާޑް ލައިންއަކީ ތިޔަބޭފުޅުންނަށް ނަތީޖާ މިހާ ހިސާބަށް ނެރެދިން ފޯވާޑް ލައިނެއް އަދި ކުރިއަށް އޮތްތާންގައި ނަތީޖާ ނެރެދޭނެ ފޯވާޑް ލައިނެއް، މި ޓީމުވަނީ "ޓީމު އުމަރު" ވަނީ ވޭތުވެދިޔަ ތިން އަހަރު ދުވަސްތެރޭގައި ނުކުރެވޭނެ ކަމަށް ދިވެހިރާއްޖޭގެ ހުރިހާ ސިޔާސީ މީހުން ބުނި ހުރިހާ ކަމެއްކޮށް ސާބިތުކޮށްދީފައިވަނީ." އުމަރު ނަސީރު ވިދާޅުވި އެވެ.
ވޭތުވެދިޔަ ތިން އަހަރު ދުވަސްތެރޭގައި ވަރަށް ގިނަ ކަންކަން އުމަރުގެ ޓީމުންކޮށްފައިވާކަން ފާހަގަކުރައްވަމުން އުމަރު ނަސީރު ވިދާޅުވިގޮތުގައި އޭގެ ތެރޭގައި އަޅުގަނޑުމެން މަގުތަކުގައި ހަމައެކަނި 129 ހަރަކާތް ވަނީ ހިންގާފައެވެ. 673 މީހުން ހައްޔަރުކުރެވުނު އިރު މީހުން ހޮސްޕިޓަލުތަކަށް ގެންދެވުނެވެ. 150 އަށް ވުރެން ގިނަ ޓީވީ ޕްރޮގްރާމްތަކަށް އަރާ ރައްޔިތުން އަޅުގަނޑުމެން ހޭލުންތެރިކުރެވުނެވެ. އުމަރު ވިދާޅުވީ އޭގެއިތުރުން އެތައް މައްސަލައެއް ޝަރުއީ ކޯޓުތަކަށް އުފުލާފައިވާ ކަމަށާއި މިހުރިހާ ކަމެއްކުރި ޓީމުގެ އިސް މީހެއްގެ ގޮތުގައި ހުރުމުގެ ޝަރަފްލިބުމުން އެކަމާ އުފާކުރައްވާ ކަމަށެވެ.
އުމަރު ވިދާޅުވީ އެންމެ ފުރަތަމަ، ބޭއްވޭ ޕީޕީއެމްގެ އެތެރޭގައި ދެއިންތިހާބުކަމުގައިވާ ޕީޕީއެމްގެ ކޮންގްރެސް އާއި ޕީޕީއެމްގެ ރިޔާސީ ޕްރައިމަރީގެ ސަބަބުން ޕީޕީއެމްއަށް ބައިބައިވުމެއް އަޔަކަ ނުދޭނެ ކަމަށެވެ. ނަމަވެސް ކޮންމެ އިންތިހާބެއް ހިނގާއިރު ވެސް ވާދަވެރިކަން ހިނގާނެ ކަމަށާއި ވާދަވެރިންގެ ތެރެއިން ނޫނީ އިންތިހާބު ނުހިނގާނެ ކަމަށް ވެސް އޭނާ ވިދާޅުވި އެވެ.
"އެކަމަކު އަޅުގަނޑު މިފަހަރު ޕީޕީއެމްގެ ކޮންގްރެސްއަށް ވަޑައިގަންނަވާ ޕީޕީއެމްގެ ޑެލިގޭޓުންނަށް އަޅުގަނޑު ދަންނަވާނީ ތިޔަބޭފުޅުންނާއި ހަވާލުކުރެވިފައިވަނީ ވަރަށް ބޮޑު އަމާނާތަކޭ މިފަހަރު، ތިޔަބޭފުޅުން މިފަހަރު ނިންމަވަންވީ މިޕާޓީއަށް ލީޑާޝިޕް ތިބޭފުޅުންނަށް ހަވާލުކުރާނީ މިހާހިސާބަށް ތިޔަބޭފުޅުންނަށް ނަތީޖާ ނެރި ދެއްކި މީހުންނަށްތޯ، ނޫނީ ނަތީޖާ ނެރެދޭނެ ކަމަށް ބުނާ ބަޔަކަށްތޯ މިކަންކޮށްދޭނީ މިއީ މިފަހަރުގެ ޑެލިގޭޓުން ނިންމަންޖެހޭ ކަމެއް، މިފަހަރުވެސް ތިޔަބޭފުޅުންގެ ވޯޓު އަޅުގަނޑުގެ ޓީމު އިންތިހާބުކޮށްދެއްވާ ޕީޕީއެމްގެ ހުންގާނު އުމަރު ނަސީރުގެ ޓީމާއި ހަވާލުކުރައްވައިފިއްޔާ އަޅުގަނޑު ޔަގީންކޮށް މިއަރުވަނީ މިގައުމު ޗަކަވަޅުގަނޑަށް ވެއްޓޭ ކޮންމެ ވަގުތެއްގައި އެ ޗަކަވަޅުގަނޑަށް ފައިބާން އަޅުގަނޑުމެންގެ ޓީމު ތިބޭނެ އޭ އަބަދުވެސް." އުމަރު ވިދާޅުވި އެވެ.
ޕީޕީއެމްގެ ގިނަ ބަޔަކު ބައިވެރިވި ޖަލްސާގައި އުމަރު ވިދާޅުވީ ޕީޕީއެމަކީ އެމްޑީޕީ ނޫން ކަމަށާއި އެމްޑީޕީން "ހުރިހާ އެއްޗެއް މުހަންމަދު ނަޝީދަށް ދޭހެން" ޕީޕީއެމުން ނުދޭނެ ކަމަށެވެ. އުމަރު ވަނީ އޭނާގެ ޓީމުގެ ބައިވެރިން ވަކިވަކިން ތައާރަފުކޮށްދެއްވައި އެ މީހުން ސްޓޭޖުން ގެނެސްދެއްވައިފަ އެވެ.