ހަވީރު ނޫހާއި ހަވީރު އޮންލައިން އަކީ، ހަވީރު މީޑިއާ ގުރޫޕުގެ މިލްކެއް ކަމަށް އެކުންފުނިން ބުނެފިއެވެ.
އެކުންފުނިން ނެރުނު ބަޔާނެއްގައި ބުނީ، ހަވީރު ނޫހާއި ހަވީރު އޮންލައިން އަކީ އެކުންފުނީގެ ނަމުގައި ރަޖިސްޓްރީކޮށް ޝާއިއުކުރެވެމުންދާ އެކުންފުނީގެ މިލްކެއް ކަމަށެވެ. އަދި އަދި އެ ކުންފުނީގައި ޑރ.މުހައްމަދު ޒާހިރު ހުސައިންގެ އެއްވެސް ހިއްސާއެއް އޮތް ނޯންނާނެ ކަމަށް އެ ބަޔާނުގައި ބުނެފައިވެއެވެ.
"ހަވީރު ނޫހާއި ހަވީރު އޮންލައިން އަކީ ހަވީރު މީޑިއާ ގުރޫޕް ޕްރައިވެޓް ލިމިޓެޑްގެ މިލްކުވެރި ތަކެތި ނޫންކަމުގައި އެއްވެސް ޝަރުއީ ކޯޓަކުން މިހާތަނަށް ކަނޑައަޅުއްވާފައެއް ނުވެއެވެ" އެ ބަޔާނުގައި ބުނެފައިވެއެވެ.
އަދި ހަވީރު ނޫހާއި އޮންލައިން ހިންގުން ވަގުތީ ގޮތުން މެދުކަނޑާލާފައި ވަނީ، އުފެދިފައިވާ ހިލާފަކާއި ގުޅިގެން ގާނޫނީ ލަފާ ހޯދަމުންދާތީ ކަމަށްވެސް އެ ބަޔާނުގައި ބުނެފައިވެއެވެ. ހަވީރު މީޑިޔާ ގްރޫޕްގެ ހައްގުތަކާއި މަސްލަހަތުތަށް ހިމާޔަތްކުރުމުގެ ގޮތުންކުރަންޖެހޭ ހުރިހާކަމެއް ކުރަމުންދާ ކަމަށްވެސް އެ ބަޔާނުގައި ބުނެފައިވެއެވެ.
ހަވީރު ނޫސް ހުއްޓާލާފައިވާތީ އެ ނޫސް ފަށަން އެންގުމުގެ އަމުރަކަށް، ބައެއް ހިއްސާދާރުން ވަނީ ސިވިލް ކޯޓަށް މައްސަލައެއް ހުށައަޅާފައެވެ. އެ މައްސަލައިގެ އަޑުއެހުމެއް މާދަމާ އޮންނާނެއެވެ.