ހުރިހާ ރައްޔިތުންނަށް 24 ގަޑިއިރު ކަރަންޓްގެ ހިދުމަތް ދިނުމަށް ސަރުކާރުން ގެންގުޅޭ ސިޔާސަތުގެ ދަށުން ކަރަންޓްގެ އަގު ކުރިއަށް އޮތް ތަނުގައި ހެޔޮވާނެ ކަމަށް ރައީސް އަބްދުﷲ ޔާމީން މިރޭ ވިދާޅުވެއްޖެ އެވެ. ފެނަކައިން އަލަށް 77 ޖަނަރޭޓަރު ގެނެސް ރަށްރަށާ ހަވާލު ކުރުމުގެ މަޝްރޫއު ފައްޓަވައި ދެއްވުމުގެ ގޮތުން ވާހަކަފުޅު ދައްކަވަމުން ރައީސް ވިދާޅުވީ މި އަހަރުގެ ތެރޭގައި ރާއްޖެ ގެނައި ޖަނަރޭޓަރުތައް ރަށްރަށަށް ގެންގޮސް ހިދުމަތް ދޭން ފެށުމާ އެކު އަންނަ އަހަރުގެ މެދު ތެރެއިން ފެށިގެން މުޅި ރާއްޖެ އަށް 24 ގަޑިއިރު ކަރަންޓް ލިބޭނެ ކަމަށެވެ. އަދި ކަރަންޓްގެ ހިދުމަތުގެ އަގު ހެޔޮ ކުރުމަށް ސަރުކާރުން މަސައްކަތް ކުރަމުން އަންނަ ކަމަށާއި އެގޮތުން ހެޔޮ އަގުގައި ކަރަންޓް އުފައްދަން ބޭނުންވާ ތެޔޮ ލިބޭނެ އިންތިޒާމް ހަމަޖެއްސުމާއި އިއާދަ ކުރަނިވި ހަކަތަ އުފެއްދުމުގެ މަސައްކަތްތަކެއް ވެސް ކުރަމުން އަންނަ ކަމަށް ރައީސް ވިދާޅުވި އެވެ. އެމަނިކުފާނު ވިދާޅުވި ގޮތުގައި އިންޑިއާއާ ގުޅިގެން ތެޔޮ ހޯދުމުގެ މަސައްކަތް ވެސް ދަނީ ކުރިއަށެވެ. "މި މަސައްކަތްތަކުގެ ތެރެއިން އިރާދަކުރެއްވިއްޔާ ކުރިއަށް އޮތް ތަނުގައި ކަރަންޓް އަގު ހެޔޮ ކުރެވިގެން ދާނެ،" ބޮޑުތަކުރުފާނު މަގުގައި ބޭއްވި ހަފްލާގައި ރައީސް ވިދާޅުވި އެވެ. މިރޭގެ ހަފްލާގައި ފެނަކަ ކޯޕަރޭޝަންގެ ވެރިންނާއި މުވައްޒަފުން ބައިވެރިވަނީ.--ހަވީރު ފޮޓޯ: ނިޝާން އަލީ އެމަނިކުފާނު ވިދާޅުވިގޮތުގައި މި ސަރުކާރުން ވެފައިވާ ވައުދުތައް ފުއްދުމަށް ކެބިނެޓްގެ މިނިސްޓަރުން ވެސް ގުޅިގެން ބަދަހި ގޮތެއްގައި އަންނަނީ މަސައްކަތް ކުރަމުންނެވެ. ނަމަވެސް ބައެއް ކަންތައްތައް އެންމެ އެދެވޭ ބާރު މިނުގައި ކުރިއަށް ނުދާކަން ފާހަގަ ކުރައްވަމުން ރައީސް ވިދާޅުވީ ކަރަންޓާ ގުޅުން ހުރި ކަންކަން ހައްލުކޮށް އެކަމަށް ބޭނުންވާ މާލީ އެހީތެރިކަން ހޯދުމަކީ ވަރަށް އުނދަގޫ މަސައްކަތެއް ކަމަށެވެ. "ފެނަކަ އަޅުގަނޑުމެންނަށް ފެނިދާނެ އެސެޓްގެ ގޮތުން ވަރުގަދަ ކުންފުންޏެއް ގޮތަށް. އެކަމަކު ލިކުއިޑިޓީކޮށް ބަލާނަމަ މި ކުންފުންޏަށް ވެސް ހުރި ގޮންޖެހުންތައް ވެސް ވަރަށް ގިނަ. ކުރަން ހުރި މަސައްކަތް ވަރަށް ގިނަ. މި ހިދުމަތް ދިނުުމުގައި ޗެލެންޖްތައް ވަރަށް ގިނަ،" ރައީސް ވިދާޅުވި އެވެ. ރަށްރަށަށް ފޮނުވާ ޖެނެރޭޓަރުތަކުގެ ތެރެއިން ޖެނެރޭޓަރެއް.--ހަވީރު ފޮޓޯ: ނިޝާން އަލީ ސަރުކާރުގެ ކުންފުނިތަކަކީ އެ އިރެއްގައި އޮންނަ ސަރުކާރެއްގެ ސިޔާސަތުތައް ތަންފީޒް ކުރަން މަސައްކަތް ކުރަން ޖެހޭ ތަންތަން ކަން ފާހަގަ ކުރައްވަމުން ރައީސް ވިދާޅުވީ އެހެން ނޫން ނަމަ ކުންފުނިތަކުން ރައްޔިތުންނަށް ދޭ ހިދުމަތްތައް ފޯރުކޮށްދޭން އުނދަގޫވާނެ ކަމަށެވެ. ރައީސް ވިދާޅުވި ގޮތުގައި ކުންފުނިތަކުގެ ބޯޑުތަކަށް ކަންކަން ނިންމުމުގެ މިނިވަންކަން އޮތް ނަމަވެސް އެ ނިންމުންތަކަކީ ސަރުކާރުގެ ސިޔާސަތާ ތައާރުޒުނުވާ ނިންމުންތަކަކަށް ވުން މުހިންމެވެ. "ބޯޑް ރޫމުން އެ ބޭފުޅުންނަށް މިނިވަންކަން ދިނުމަށް ފަހުގައި އަޅުގަނޑުމެން އެ ކުންފުނިތަކުގެ ކަންކަން ބެލުމަށް އެކުލަވާލީ މިނިސްޓަރުންގެ ކޮމިޓީއެއް. އެ ކޮމިޓީން ކުންފުނިތަކުގެ ކަންކަން ބަލަން ފެށުމުން އެ ކުންފުނިތަކަކީ ވެސް ސަރުކާރުގެ ސިޔާސަތުތަކުގެ ތެރެއިން މަސައްކަތް ކުރާ ތަންތަން ކަމުގައި ވެގެން މި ދިޔައީ،" ރައީސް ވިދާޅުވި އެވެ. އައްޑު އަށް ޖެނެރޭޓަރު ފޮނުވުމަށް އެއްބަސްވުމުގައި ސޮއިކުރުމަށް ފަހު ފޮޓޯ އަށް ހުއްޓިގެން.--ހަވީރު ފޮޓޯ: ނިޝާން އަލީ އެ މަނިކުފާނު ވިދާޅުވިގޮތުގައި ސަރުކާރުން ދޭ ހިދުމަތްތައް ރައްޔިތުންނަށް ދެވޭނީ ކެބިނެޓްގެ ހުރިހާ ވަޒީރުން ޓީމެއްގެ ގޮތުގައި މަސައްކަތް ކޮށްގެންނެވެ. އެކަމަކު ރައްޔިތުންނަށްނަށް ކަންކަން ފޯރުކޮށް ދިނުމުގައި، އެއް މިނިސްޓަރަކު އަނެއް މިނިސްޓަރަކާ ވާދަ ކުރެއްވުމަށް ވެސް ރައީސް އެދިވަޑައިގެންނެވި އެވެ. "އެ ވާދަވެރިކަމަކީ ރައްޔިތުންނަށް އެ ވަޒީރަކު އެ ކޮށްދެއްވާ ހިދުމަތް ވީހާ ވެސް ބޮޑަކަށް ޑެލިވާ ކޮށްދިނުމުގައި އޮންނަ ވާދަވެރިކަމަކަށް ވާން ޖެހޭ. އަޅުގަނޑުމެންގެ މި ގޯލް އޮންނަ ނަމަ އަޅުގަނޑުމެންނަށް ސަރުކާރަށް ހިދުމަތްތައް ފޯރުކޮށްދެވޭނެ،" ރައީީސް ވިދާޅުވި އެވެ. މިރޭގެ ހަފްލާގައި ރައީސް ޔާމީން ވާހަކަފުޅުދައްކަވަނީ.--ހަވީރު ފޮޓޯ: ނިޝާން އަލީ ސަރުކާރުގެ ވައުދުތައް ފުއްދުމުގެ ގޮތުން އިތުރު ވަޒީފާތައް އުފެއްދުމުގެ މަސައްކަތް ކުރަމުން އަންނަ ކަމަށް ރައީސް ވިދާޅުވި އެވެ. ނަމަވެސް އެ މަނިކުފާނު ވިދާޅުވީ ވަޒީފާތައް އުފެއްދުމަކީ ގަނޑެއްގައި ލިޔެލާ އެއްޗަކުން ކުރެވޭނެ ކަމެއް ނޫން ކަމަށާއި ސަރުކާރުން އެކަން ކުރަނީ ރޭވުންތެރިކަމާ އެކު ކަމަށެވެ.