ރައްޔިތުންގެ މަޖިލީހުގެ މާމިގިލީ ދާއިރާގެ އެމްޑީޕީގެ ޓިކެޓް މުހައްމަދު ހަމްދާން އަށް ދީފި އެވެ. މާމިގިލީ ކަރަންކާ ވިލާ ހަމްދާނަށް ލިބުނީ މީގެ ކުރިން ބޭއްވި ޕްރައިމަރީގައި އޭނާއާ ވާދަކޮށް ކުރި ހޯދި ކެންޑިޑޭޓް ނަން އަނބުރާ ގެންދިއުމާ ގުޅިގެން އަލުން ޕްރައިމަރީ އަށް ހުޅުވައިލި ފުރުސަތުގައި އިތުރު މީހަކު ކުރިމަތިނުލުމުންނެވެ. މާމިގިލީ ދާއިރާގެ ޕްރައިމަރީ އަށް އެމްޑީޕީން އަލުން ފުރުސަތު ހުޅުވައިލީ އިއްޔެއިން ފެށިގެން މިއަދުގެ 12:00ގެ ނިޔަލަށެވެ. އެ މުއްދަތުގައި ހަމްދާން ފިޔަވައި އެހެން ފަރާތަކުން ކުރިމަތިލާފައެއް ނުވެ އެވެ. ސަރުކާރު ހިންގާ ކޯލިޝަންގެ ފަރާތުން އެ ދާއިރާ އަށް ވާދަކުރައްވަނީ މިހާރުގެ ވެސް މެންބަރު އަދި ޖުމްހޫރީ ޕާޓީގެ ލީޑަރު ގާސިމް އިބްރާހިމެވެ. ރައްޔިތުން މަޖިލީހުގެ 85 ދާއިރާ އަށް އެމްޑީޕީން ކެންޑިޑޭޓުން ނެރޭ އިރު އެ ޕާޓީގެ ހުރިހާ ކެންޑިޑޭޓުން ކަހަލަ ގޮތަކަށް ބުރާސްފަތި ދުވަހު ވަނީ ފޯމް ހުށަހަޅައިފަ އެވެ. މަޖިލީހުގެ އިންތިޚާބަށް ކުރިމަތިލުމުގެ ފުރުސަތު ހަމަވާނީ އަންގާރަ ދުވަހު އެވެ.