އަތޮޅުތެރޭގެ 153 ރަށެއްގައި ކަރަންޓްގެ ޚިދުމަތް ދެމުން އަންނަ ފެނަކަ ކޯޕަރޭޝަން އިން ކަރަންޓް ޔުނިޓަކުން ފިއުލް ސާޗާޖުގެ ގޮތުގައި ހަތަރު ލާރި ނަގަން ފެށުމާއި އެކު އަނެއްކާވެސް އަތޮޅުތެރޭގެ ކަރަންތްގެ އަގު އުފުލިއްޖެއެވެ.
ފެނަކަ އިން އޮކްޓޯބަރ މަހުގެ ބިލްތައް މިހާރު ބަހަމުން އަންނަ އިރު އެބިލް ތައްޔާރު ކޮށްފައި ވަނީ ފިއުލް ސާޗާޖް ހިމަނައިގެންނެވެ. ބިލްގައި ފިއުލް ސާޗާޖް ހިމަނަން ފަށާފައި ވަނީ ސެޕްޓެމްބަރ 19 އިން ފެށިގެންނެވެ.
ފެނަކަ އިން ބުނެފައި ވަނީ ފިއުލް ސާޗާޖް ނަގަން ފެށި އެ ކުންފުންޏަށް ސެޕްޓެމްބަރު 19 ވަނަ ދުވަހުން ފެށިގެން ޑީސަލް ލީޓަރެއް ގަންނަން ލިބޭ އަގު 8.12ރ. އަށް ބޮޑުވުމުން ކަމަށެވެ.
ނަމަވެސް ފެނަކަ އިން އެކި ރަށްރަށަށް ތެޔޮ ސަޕްލައި ކުރަނީ އެކި ކުންފުނިތައް މެދުވެރިކޮށް ކަމަށްވާތީ ހުރިހާ ކުންފުންޏަކުން އެއްދުވަހެއްގައި ހުރިހާ ރަށަކަށް ސަޕްލައި ކޮށްދޭ ތެލުގެ އަގު ބޮޑުކުރީކަން ވަނީ "ވަގުތަށް" ކަށަވަރު ނުކުރެވިފައެވެ.
ފެނަކަ ކޯޕަރޭޝަނަށް ޑީސަލް ގަންނަން ލިބޭ އަގު ލީޓަރެއް 8ރ. އަށް ވުރެ ބޮޑު ވާ ނަމަ އިތުރުވާ ކޮންމެ 10 ލާރިއަކަށް ތިން ލާރި ފިއުލް ސާޗާޖުގެ ގޮތުގައި ނެގުމުގެ ހުއްދަ އެނާޖީ އޮތޯރިޓީން ވަނީ ދީފަ އެވެ.
ފެނަކައިގެ އިތުރުން ސްޓެލްކޯ އިން ވެސް ވަނީ އޮކްޓޯބަރު މަހުން ފެށިގެން ކަރަންޓް ޔުނިޓަކަށް ހަތަރު ލާރި ފިއުލް ސާޗާޖުގެ ގޮތުގައި ނަގަން ފަށައިފަ އެވެ. ކުރިޔަށް އޮތް ތަނުގައި ތެލުގެ އަގު މައްޗަށް ދާ މިންވަރަކަށް ފިއުލް ސާޗާޖުގެ ގޮތުގައި ނަގާ މިންވަރު ބޮޑުވެ ޖުމްލަ ބިލް ބޮޑުވަމުންދާނެ އެވެ.
ދުނިޔޭގެ ބާޒާރުގައި ފާއިތުވި ދުވަސްތަކުގައި ވަރަށް ބޮޑަށް ތެލުގެ އަގު ދަށްވަމުން ދިޔަނަމަވެސް މީޑިއާ ރިޕޯޓްތައް ބުނާ ގޮތުގައި ކުރިއަށް އޮތްތަނުގައި ތެލުގެ އަގު މައްޗަށް ދާނެއެވެ. އެއީ ދުނިޔޭގެ އިޤުތިޞާދު ކުރިއަށް ގޮސް ތެލަށް އޮންނަ ޑިމާންޑް އިތުރުވާނެ ކަމަށް ލަފާކުރެވޭތީ އާއި ތެޔޮ އުފައްދާ ގައުމުތަކުން ތެލުގެ ސަޕްލައި ދަށްކުރަން އެއްބަސްވުމުގެ ފުރުސަތު ބޮޑުވަމުން އަންނާތީއެވެ.